चितवन । चितवनको कालिका नगरपालिकाले दूध उत्पादक किसानलाई प्रोत्साहन स्वरूप ३४ लाख ४७ हजार ६९३ रुपैयाँ अनुदान उपलब्ध गराएको छ । गत आर्थिक वर्ष २०७८/७९ मा नगरभित्रका विभिन्न वडामा रहेका समूह, दुग्ध उत्पादक सहकारी संस्थामार्फत दूध विक्री गरेका किसानलाई नगरपालिकाले प्रतिलिटर १ रुपैयाँका दरले उक्त अनुदान रकम उपलब्ध गराएको हो ।
नगरपालिकाका मेयर विनोद रेग्मीले नगरमा दूध उत्पादन वृद्धि गर्न र किसानलाई व्यावसायिक बनाउन अनुदान रकम उपलब्ध गरिएको बताए । अनुदान वितरणबाट नगरका विभिन्न वडामा २ हजार २४७ जना दुग्ध किसान प्रत्यक्ष लाभान्वित भएका छन् । यो वर्ष सहकारी केन्द्रबाट २२ करोड ४१ लाख ४५ रुपैयाँ र निजी क्षेत्रबाट २४ करोड १३ लाख ३८ हजार ५१० रुपैयाँ बराबरको दूध विक्री भएको नगरपालिकाको तथ्यांक छ । सहकारी केन्द्रमार्फत विक्री भएको दूधका आधारमा प्रत्येक किसानलाई प्रतिलिटर १ रुपैयाँका दरले एकमुष्ट अनुदान उपलब्ध गराएको नगरपालिकाका पशु विकास शाखा प्रमुख ईश्वरीप्रसाद पौडेलले जानकारी दिए । नगरपालिकाले विगत ४ वर्षदेखि १० हजार लिटरभन्दा धेरै दूध विक्री गर्ने किसानलाई अनुदान दिन शुरू गरेको थियो । दुग्ध विकास संस्थानले निर्धारण गरे बमोजिमको मूल्यमा संकलन केन्द्रमा दूध उपलब्ध गराउने किसानलाई नगरपालिकाले अनुदान दिने गरेको हो ।