काठमाडौं । नेपाल पे क्यूआर र स्मार्ट क्यूआरले नेटवर्कस्तरमा अन्तरआबद्ध भई सेवा शुरू गरेका छन् । आइतवार आयोजित एक कार्यक्रमका बीच विभिन्न बैंक तथा वालेटका प्रतिनिधिले दुवै नेटवर्कमा भुक्तानी गरेर सेवाको शुभारम्भ गरेका हुन् ।
सो कार्यक्रममा स्मार्ट च्वाइस टेक्नोलोजीज लिमिटेड (एससीटी)का प्रमुख कार्यकारी अधिकृत नारायण प्रकाश भुजु र नेपाल क्लियरिङ हाउस लिमिटेडका प्रमुख कार्यकारी अधिकृत नीलेशमान सिंह प्रधान लगायत विभिन्न बैंक तथा वित्तीय संस्थाका प्रतिनिधि कार्यक्रममा उपस्थित थिए ।
क्यूआर भुक्तानीलाई थप प्रवर्द्धन गर्न नेटवर्कस्तरको अन्तरआबद्धता सहित सञ्चालनका लागि सहकार्य भएसँगै नेपाल पे क्यूआरमार्फत आबद्ध भएका विभिन्न मोबाइल बैंकिङ, वालेट र कनेक्ट आईपीएसका प्रयोगकर्ताले स्मार्ट क्यूआर नेटवर्कमा आबद्ध सम्पूर्ण मर्चेन्टमा सजिलै भुक्तानी गर्न सक्ने भएका हुन् । यसैगरी स्मार्ट क्यूआर नेटवर्कको मोबाइल बैंकिङ र वालेटले नेपाल पे क्यूआर नेटवर्कमा आबद्ध मर्चेन्टमा सजिलै भुक्तानी गर्न सक्ने बताइएको छ ।
