साउन ३२, बैतडी । डिभिजन वन कार्यालय बैतडीले गत आर्थिक वर्षमा राजस्व संकलनमा वृद्धि गरेको छ । कार्यालयले आर्थिक वर्ष २०७६/०७७ को भन्दा आर्थिक वर्ष २०७७/०७८ मा ९ लाख १५ हजार ४११ रुपयाँ बढी राजस्व संकलन गरेको छ ।
अघिल्लो आर्थिक वर्षमा ३ लाख ३८ हजार ८११ रुपयाँ राजस्व संकलन गरेको थियो भने गत आर्थिक वर्षमा १२ लाख ५४ हजार २२२ रुपयाँ राजस्व संकलन गरेको छ ।
कोरोना माहामारी नियन्त्रणको लागि गरिएको निषेधाज्ञाले आर्थिक वर्ष २०७६/०७७ मा विक्री हुन नपाएको गैर काष्ठ वन पैदावार गत आर्थिक वर्षमा नै विक्री गरीएकाले गत आर्थिक वर्षमा राजस्वमा वृद्धि भएको डिभिजन वन कार्यालय बैतडीका सूचना अधिकारी श्यामसुन्दर माझीले बताए ।
उनले भने ‘गत आर्थिक वर्षमा पञ्चवर्षिय योजना पनि स्वीकृत भयो । यसले गर्दा गैर काष्ठ वनपैदावारको मात्र बढी विक्री भयो यसले पनि राजस्व बढाएको हो’ ।
यसैगरी कार्यालयले गत आर्थिक वर्षमा प्रदेशको पूँजीगत खर्चभन्दा संघबाट प्राप्त पूँजीगत खर्च बढी गरेको छ । चालू आवमा भने संघको भन्दा प्रदेशको खर्च बढी भएको पाइएको छ ।
प्रदेशको पूँजीगत खर्चको जम्मा ७६ दशमलव १३ प्रतिशत र संघबाट प्राप्त जम्मा पूँजीगत खर्चको ९७ दशमलव ३० प्रतिशत खर्च गरेको छ । प्रदेशको चालू आवमा ९० प्रतिशत र संघको चालू आवमा ८४ दशमलव ३ प्रतिशत खर्च गरेको छ ।
संघको पूँजीगत ५० लाख ४० हजारमध्ये ४९ लाख ४ हजार ३४० खर्च गरेको छ भने प्रदेशबाट प्राप्त पूँजीगत ३ करोड २२ लाख ५५ हजार मध्ये २ करोड ४५ लाख ५८ हजार ५३६ रुपयाँ खर्च गरेको छ ।
यस्तै, संघको चालू १ करोड ६० लाख ४ हजार मध्ये ८९ लाख ११ हजार ३७१ खर्च गरेको छ । यस्तै प्रदेशको चालू ११ करोड ४७ लाख ३१ हजारमध्ये १० करोड ३३ लाख ५ हजार ३४५ रुपयाँ खर्च गरेको कार्यालयले बताएको छ ।
