एभरेष्ट बैंकले निकट भविष्यमा द्रुत विप्रेषण सेवा (रियल टाइम रेमिट्यान्स) शुरू गर्ने भएको छ । आफ्नो भारतीय साझेदार पन्जाब नेशनल बैंक (पीएनबी) सँगको सहकार्यमा उसले यो सेवा शुरू गर्न लागेको हो । ‘एभरेष्टले गर्नुपर्ने सबै तयारीहरू गरिसकेको छ । पीएनबीको तर्फबाट प्राविधिक तयारी पूरा हुनासाथ विप्रेषण कारोबार शुरू हुनेछ,’ बैंकका सचिव प्रमोदराज शर्माले बताए । पीएनबीले प्राविधिक तयारी पूरा गरेको तीन दिनभित्रमा बैंकले कारोबार थाल्ने उनले जानकारी दिए ।
यो सेवा शुरू भएपछि पीएनबीका ४ हजार ५ सय २५ शाखा मार्फत नेपालमा रकम पठाउन सकिनेछ । त्यस्तै एभरेष्ट बैंकका ३८ शाखाबाट पनि भारतमा रकम पठाउन सकिनेछ । साथै, पीएनबीका भुटान शाखाबाट नेपालमा रकम पठाउन सकिने बैंकले जानकारी दिएको छ । हाल नेपाल र भारतबीच संस्थागत र व्यक्तिगत गरी दुई किसिमका विप्रेषण हुने गरेको छ । नेपालका धेरै बैंकले संस्थागत विप्रेषण सेवा सञ्चालन गरिरहेका छन् । तर भारतमा काम गरिरहेका श्रमिक नेपालीहरूले सरल रूपमा रकम पठाउने व्यवस्था हुन सकेको थिएन ।
अहिले पनि पीएनबी र एभरेष्ट बैंकमार्फत पनि एक अर्को देशमा पैसा पठाउन सकिने सुविधा छ तर, अहिले भारतबाट नेपालमा पैसा पठाउँदा दुईदेखि तीन दिनसम्म लाग्ने गर्दछ ।
एभरेष्टको द्रुत विप्रेषण शुरू भएपछि भारतमा काम गरिरहेका नेपालीहरूले पठाएको रकम तुरुन्तै नेपालमा पाउन सकिनेछ ।
वर्ष ५ अंक ५०, २०६७, साउन ३१–भदौ ६
