साउन ११, सिन्धुपाल्चोकको बाढी प्रभावित ३ ओटा स्थानीय तहलाई ६६ लाख ८९ हजार ९९७ रुपैयाँ सहयोग गरिएको छ ।
गएको असार १ गतेको हेलम्बु–मेलम्ची पहिरोबाट प्रभावित मेलम्ची नगरपालिका, हेलम्बु गाउँपालिका र पाँचपोखरी थाङ्पाल गाउँपालिकालाई सो रकम प्रदान गरिएको छ । सोमवार नेकपा माओवादी केन्द्र, वाग्मती प्रदेश कमिटिले बाढी प्रभावित क्षेत्रका लागि राहत रकम उपलब्ध गराएको हो ।
बाढीबाट सर्वाधिक क्षति बेहोरेको हेलम्बु गाउँपालिकालाई २३ लाख २९ हजार ९९९ रुपैयाँ, मेलम्ची नगरपालिकालाई २३ लाख २९ हजार ९९९ रुपैयाँ र पाँचपोखरी थाङ्पाल गाउँपालिकालाई २० लाख २९ हजार ९९९ रुपैयाँ प्रदान गरिएको वाग्मती प्रदेशका सांसद एवम् नेकपा माओवादी केन्द्रका केन्द्रीय सदस्य युवराज दुलालले जानकारी दिए ।
माओवादी केन्द्रको समन्वयमा वाग्मती प्रदेशमा माओवादी केन्द्रले नेतृत्व गरेका स्थानीय तहबाट सहयोग संकलन गरेर हस्तान्तरण गरिएको दुलालले बताए । वाग्मती प्रदेशभरीबाट संकलित रकम ३ ओटै स्थानीय तहलाई उपलब्ध गराइएको हो ।
माओवादी केन्द्रका बागमती प्रदेश कमिटी अध्यक्ष नारायण दाहालले
मेलम्ची नगरपालिकाका प्रमुख डम्बर अर्याल र पाँचपोखरी थाङ्पाल गाउँपालिकाका अध्यक्ष टासी लामालाई सहयोग रकम हस्तान्तरण पत्र प्रदान गरेका थिए । त्यस्तै, हेलम्बु गाउँपालिका अध्यक्षको उपस्थिति हुन नसकेपछि गाउँपालिका प्रतिनिधिलाई रकम हस्तान्तरण पत्र प्रदान गरिएको थियो ।
मेलम्ची नगरपालिकाको कार्यालयमा भएको हस्तान्तरण कार्यक्रममा बोल्दै अध्यक्ष दाहालले अझै अन्य सहयोग गर्नका लागि आफूहरु तयार रहेको बताए । ‘मेलम्ची तथा हेलम्बुका बाढी पीडितको दैनिकी सहजीकरणका लागि हामीले माथिल्लो निकायमा अनुरोध गरेका छौं’, दाहालले भने ‘अर्थ मन्त्रालयमा हामीले बेलिब्रिज निर्माणको लागि अनुरोध ग¥यौं ।
अब तत्काल मेलम्ची र हेलम्बुका दुई स्थानमा पुल निर्माण शुरु हुन्छ ।’ उनका अनुसार बेलिब्रिज निर्माणका लागि अर्थ मन्त्रालयले काम अघि बढाइसकेको छ ।
सहयोग ग्रहण गर्दै मेलम्ची नगरपालिकाका प्रमुख डम्बर अर्यालले माओवादी केन्द्रको सहयोगबाट बाढी पीडितको उद्दार तथा पुर्नस्थापनाका लागि महत्वपूर्ण सहयोग मिलेको बताए । ‘हामीलाई यहाँहरुले गर्नुभएको सहयोगले धेरथोर भएपनि राहत महसुस भएको छ’, अर्यालले भने ‘यसरी हामीलाई यो संकटमा सहयोग गर्नुभएकोमा हाम्रो पालिका आभार व्यक्त गर्दछ ।’
सहयोग हस्तान्तरण कार्य पूर्वसांसद तथा माओवादी नेता हितमान शाक्य, हितबहादुर तामाङ, माओवादी केन्द्रका केन्द्रीय सदस्य माधव सापकोटा, मेलम्ची खानेपानीका बोर्ड सदस्य चन्द्रबहादुर थापा लगायतको उपस्थिति थियो ।
