भदौ १, काठमाडौं । मन्दाकिनी हाइड्रोपावर लिमिटेडले आईपीओ निष्कासन प्रक्रिया अगाडि बढाएको छ ।
कम्पनीले आईपीओ निष्कासन तथा विक्री प्रबन्धकमा बीओके क्यापिटल मार्केट लिमिटेडलाई नियुक्त गरेको छ। सो कार्यका लागि मंगलवार कम्पनी र बीओके क्यापिटल बीच सम्झौता भएको हो।
सम्झौतापत्रमा मन्दाकिनी हाइड्रोपावरका तर्फबाट सञ्चालक समितिका अध्यक्ष महेशबहादुर बस्नेत र बीओके क्यापिटलका तर्फबाट प्रमुख कार्यकारी अधिकृत कुन्दन शर्माले हस्ताक्षर गरेका हुन्। यसैगरी कम्पनीको शेयर रजिस्ट्रारसम्बन्धी सम्पूर्ण कार्य पनि बीओके क्यापिटल गर्ने छ।
कम्पनीले १७ करोड ६४ लाख रुपैयाँ बढीको आईपीओ निष्कासन गर्ने भएको छ। कम्पनीले १०० रुपैयाँ अंकित दरका कुल १७ लाख ६४ हजार १११ कित्ता आईपीओ निष्कासन गर्ने तयारी गरेको हो।