आर्थिक वृद्धिको लक्ष्य चुनौतीपूर्ण रहेको चेम्बरको ठहर

काठमाडौं (अस) । सरकारले आगामी आर्थिक वर्षको बजेट वक्तव्यमार्फत प्रक्षेपण गरेको आर्थिक वृद्धिको लक्ष्य चुनौतीपूर्ण रहेको नेपाल चेम्बर अफ कमर्शले बताएको छ । ८ प्रतिशत आर्थिक वृद्धि हासिल गर्ने र मुद्रास्फीति ७ प्रतिशतमा सीमित राख्ने सरकारको लक्ष्य प्राप्ति कठिन रहेको चेम्बरले सोमवार जारी गरेको विज्ञप्तिमा उल्लेख छ । ‘विश्व अर्थतन्त्रका विद्यमान समस्या, देशमा ह्रास हुँदै गएको विदेशी मुद्राको सञ्चिति र तरलता समस्याका कारण बजेटको कार्यान्वयन पक्ष अत्यन्त चुनौतीपूर्ण देखिएको छ,’ विज्ञप्तिमा भनिएको छ, ‘कार्यान्वयन चुनौतीपूर्ण हुनाले बजेटले लक्षित गरेको ८ प्रतिशत आर्थिक वृद्धिदर हासिल गर्न र मुद्रास्फीति दर ७ प्रतिशतमा सीमित गर्न कठिन देखिएको छ ।’ कृषिको रूपान्तरण अभियान, उत्पादकत्व वृद्धिका लागि यस क्षेत्रको व्यावसायिकीकरण, यान्त्रिकीकरण र आधुनिकीकरण गर्न आवश्यक पूर्वाधार तथा खाद्यान्नमा देशलाई आत्मनिर्भर बनाउन ५५ अर्ब ९७ करोड विनियोजन गरिनु सराहनीय भएको चेम्बरले बताएको छ । यस्तै कृषि प्रवद्र्धनका लागि ५ खर्बको कृषि लघुवित्त कोषको स्थापना गर्ने घोषणा स्वागतयोग्य रहेको चेम्बरको भनाय छ । ऊर्जातर्फ विद्युतीय चुल्हो वितरण गर्नेदेखि गार्हस्थ्य र औद्योगिक ग्राहकलाई सस्तो दरमा विद्युत् उपलब्ध गराउने, प्रतिव्यक्ति विद्युत् खपत वार्षिक ४०० किलोवाट घण्टा पुर्‍याउने, प्रसारण लाइन दु्रतगतिले निर्माण गर्ने लगायत योजना समावेश गरिनु सकारात्मक भएको चेम्बरले बताएको छ । यसैगरी स्वदेशमा औद्योगिक वातावरण बनाई रोजगारी सृजना गर्न विदेशी लगानीको सीमा घटाउनेदेखि उद्योगलाई छूट दिनेसम्मको घोषणाले उत्साहित बनाएको विज्ञप्तिमा उल्लेख छ । बजेटले उद्योग लगायत विभिन्न क्षेत्रमा प्रदान गरेका सुविधा प्रभावकारी ढंगले प्रवाह गर्न प्रक्रिया तथा नीतिनियम तर्जुमा गर्दा सरोकारवाला निकायसँग छलफल गरिनुपर्नेमा समेत चेम्बरले जोड दिएको छ ।