भारत–नेपाल दुवैतर्फ सडक निर्माणमा समस्या, मेची पुलको उद्घाटन अन्योलमा

तीनकुने जडीबुटी सडकखण्डको उद्घाटन

जापान अन्तरराष्ट्रिय सहयोग नियोग (जाइका) को सहयोगमा निर्माण भएको तीनकुने जडीबुटी सडकखण्डको औपचारिक रूपमा उद्घाटन भएको छ । हाजमा कर्पोरेशनले निर्माण गरेको ६ लेनको फराकिलो सो सडकको सोमवार नेपालका लागि जापानी राजदूत तात्सुओ मिजुनो, जाइकाका आवासीय प्रतिनिधि मित्सुयोशी कावासाकी र सडक विभागका महानिर्देशक रामकुमार लम्सालले संयुक्त रूपमा उद्घाटन गरे । सन् २००८ को जनवरीबाट निर्माण शुरू भएको तीनकुने सूर्यविनायक सडक विस्तार आयोजनामध्ये जडीबुटीसम्मको निर्माण कार्य सम्पन्न भई औपचारिक उद्घाटन गरिएको हो । सो सडक निर्माणमा कुल २ अर्ब ५० करोड जापानी येन खर्च हुने अनुमान गरिएको बताइएको छ । तीनकुनेदखि जडीबुटीसम्मको सडक निर्माण गर्न ७४ करोड जापानी येन लागेको आयोजना प्रमुख सरोज प्रधानले जानकारी दिए । तीनकुनेदेखि सूर्यविनायकसम्मको ९ दशमलव १ किलोमिटर सडकमध्ये जडीबुटीसम्मको लम्बाई १ दशमलव ७ किलोमिटर छ । आगामी चैत महिनासम्म आयोजनाको सम्पूर्ण कार्य सक्ने बताउँदै प्रधानले हाल आयोजनाको ७० प्रतिशत कार्य पूरा भइसकेको दाबी गरे । बेलाबेलामा हुने बन्दहडतालजस्ता कारणले काम गर्न अप्ठ्यारो परेको उनको गुनासो छ । १० दशमलव ६ टन क्षमताको सो सडक कम्तीमा ७ वर्षसम्म केही नहुने प्रधानको दाबी छ । जडीबुटीसम्मको ६ लेनको सडक खुला गर्दा ट्राफिक जामको समस्या केही हदसम्म समाधान हुने बताउँदै प्रधानले सवारी चालक, ट्राफिक प्रहरी, यात्रु सबैले मिलेर काम गर्ने हो भने जामको समस्या नहुने बताए ।  वर्ष ६, अंक ३४, सोमवार, २५ असोज २०६७