काठमाडौं । हिमालय ट्राभल मार्टको चौथो संस्करण आगामी जेठ २३ देखि २६ (जुन ६ देखि ९) सम्म काठमाडौंमा आयोजना हुने भएको छ । प्यासिफिक एसिया ट्राभल एशोसिएशन (पाटा) नेपाल च्याप्टरले नेपाल पर्यटन बोर्ड, नेपाल वायुसेवा निगमका साथै विभिन्न अन्तरराष्ट्रिय संघसंस्थाको सहकार्यमा मार्ट आयोजना गर्न लागिएको पाटा नेपालले बताएको छ ।
सन् २०१७ देखि हरेक वर्ष आयोजना हुँदै आएकोमा कोभिड–१९ महामारीका कारण सन् २०१९ पछि उक्त कार्यक्रम हुन सकेको थिएन । पाटा नेपाल च्याप्टरका अध्यक्ष विभूतिचन्द ठाकुरले ‘हिमालयन ट्राभल मार्ट २०२३’ मा सहभागी हुन राष्ट्रिय तथा अन्तरराष्ट्रिय प्रतिनिधिलाई निमन्त्रणा गरिएको जानकारी दिए । मार्टमा सहभागी भई महामारीपछि पर्यटन व्यवसायको पुनरुत्थान अभियानमा सहयोग गर्न सम्बद्ध सबै पक्षलाई उनले आह्वान गरे ।
