काठमाडौं । एन आई सी एशिया लघुवित्त वित्तीय संस्थाले लुम्बिनी प्रदेशमा व्यावसायिक तरकारीखेती सम्बन्धी तालीम दिएको छ । संस्थाको नवलपरासीस्थित भुताहामा रहेको उपप्रादेशिक कार्यालयले संस्थामा आबद्ध सदस्यहरूलाई व्यावसायिक तरकारीखेती सम्बन्धी तालीम दिएको हो । संस्थामा आबद्ध भई तरकारीखेती तथा पशुपालनमा संलग्न तथा व्यावसायिक कृषि गर्न इच्छुक सदस्यहरूलाई तालीम दिइएको संस्थाले जानकारी दिएको छ ।
तालीम लिएपछि स्थानीय क्षेत्रमा नै व्यावसायिक कृषि पेशातर्फ उत्प्रेरित गरी आम्दानी बढाउने उद्देश्यले तालीम दिइएको संस्थाका लुम्बिनी प्रदेश कार्यालय प्रमुख अमरनाथ सेढार्इंले बताए ।
संस्थाको उपप्रादेशिक कार्यालय भुताहा अन्तर्गतका बेलाटारी, बरुवा, गोबरिया र बर्दघाट शाखामा आबद्ध ५० जना सदस्य तालीममा सहभागी थिए । तालीममा आधुनिक कृषि प्रणाली तथा भइरहेका अभ्यासहरू, व्यावसायिक कृषिसम्बन्धी जानकारी, गुणस्तरीय उत्पादन तथा बजारीकरण, व्यवसाय गर्दाको लागत विश्लेषण, व्यवसायको सुरक्षण लगायतबारे जानकारी गराइएको थियो ।