सिन्धुपाल्चोक (अस) । सिन्धुपाल्चोकको इन्द्रावती गाउँपालिका–१० मा १० करोड रुपैयाँ लगानीमा लिफ्ट खानेपानी परियोजना निर्माण भएको छ । परियोजनाबाट ५०० घरधुरी लाभान्वित हुने बताइएको छ ।
‘जापान एशियन एशोसिएशन एण्ड एशियन फ्रेन्डशिप सोसाइटी नेपाल’ नामक संस्थाको सहयोगमा निर्माण गरिएको लिफ्ट खानेपानी परियोजना स्थानीय सरकारलाई हस्तान्तरण गरिएको छ । इन्द्रावती गाउँपालिकाका अध्यक्ष वंशलाल तामाङको रोहवरमा सोसाइटीको अध्यक्ष नोरीको आचुताबाट बुढिचौर खानेपानी उपभोक्ता समितिका अध्यक्ष लीलामणि आचार्यलाई परियोजना हस्तान्तरण गरिएको छ ।
सोसाइटीले ३ वर्ष अघिदेखि लिफ्ट परियोजना कार्यक्रम सञ्चालनमा ल्याएको थियो । इन्द्रावती गाउँपालिका–१० को पुछार झ्याँडी खोलादेखि बोरिङ गरी लिफ्टमार्फत पालिकाको पर्यटकीयस्थल बुढीचौरसम्म पानी लिफ्ट गरेर ल्याइएको इन्द्रावती गाउँपालिका–१० का वडाध्यक्ष जीवनकुमार थापा मगरले बताए । उनका अनुसार यो कार्यक्रमले इन्द्रावती गाउँपालिका–१० का सम्पूर्ण बस्तीलाई समेटेको छ । परियोजनाबाट पिउने पानी मात्रै नभई वडाभरकै सम्पूर्ण घर परिवारलाई कृषिमार्फत जीविकोपार्जनमा सहयोग पुग्ने उनको भनाइ छ ।
स्थायी र अस्थायी गरी करीब ४ हजार २०० जनसंख्या बसोवास गर्ने सो वडामा लामो समयदेखि पानीको समस्या थियो ।
