चैत १६, काठमाडौं । काठमाडौंको कीर्तिपुरस्थित ल्याबरोटरी विद्यालय परिसरमा अहिले म्यादी प्रहरी छनोटको प्रक्रिया शुरु भइरहेको छ ।
छनोटमा सहभागी हुन आएका युवाहरुमध्ये ट्याटु खोपेका कतिपय त युवाहरु गेटबाटै छिर्न पाएनन् । प्रहरीले ट्याटु खोपेका युवायुवातीलाई म्यादी प्रहरीको प्रारम्भिक प्रक्रियामा नै सहभागी नगराउने बताएपछि उनीहरु खिन्न बनेका थिए ।
अझ तीमध्ये एक जना युवाले त ४ हजार रुपैयाँको ट्याटुका कारण ४० हजार रुपैयाँको जागिर नै गुमेको गुनासो गरेका थिए । उनले सोखले बनाएको ट्याटुका कारण प्रहरी बन्नु त परको कुरा ४० दिने कार्यावधिको म्यादी प्रहरी पनि बन्न नपाएको बताए । त्यसैगरी म्यादी प्रहरी छनोटको क्रममा ट्याटु मात्र होइन प्रष्टसँग देखिने घाउ तथा खतलाई निगरानीमा राखिएको छ ।
उक्त परीक्षणमा सामान्य लेखपढ मात्र नभएर एसएलसीदेखि स्नातक उत्तिर्ण युवायुवतीहरु पनि सामेल छन् । उक्त विद्यालय परिसरमा छनौट प्रक्रियालाई नजिकबाट नियालिरहेका एक जना अभिभावकले ४० दिने कार्यावधिको म्यादी प्रहरी हुन लागेको भिडले मुलुकमा बेरोजगारीलाई स्पष्ट रुपले चित्रण गरेको बताए ।
मंगलवारदेखि शुरु भएको छनोट प्रक्रियामा प्रहरीले आवेदन दिएका युवायुवतीको उचाई, तौल स्वास्थ्य परीक्षण, दौड, पुसअपदेखि विभिन्न प्रक्रियाको परीक्षण गर्ने गरिएको छ ।
स्वास्थ्य तन्दुरुस्ती परीक्षणमा सफल उम्मेदवारको केहि दिनपछि लिखित परीक्षा हुने छ । नापतौल,दौड लगायतका विभिन्न प्रक्रिया पुरा गर्ने युवायुवती मात्र म्यादी प्रहरीका लागि योग्य हुने प्रहरी प्रधान कार्यालयले बताएको छ । उक्त परीक्षणपछि नतिजा भने आगामी चैत २२ गते प्रकाशित हुने छ । आगामी चैत २८ गतेदेखि म्यादी प्रहरीको प्रशिक्षण शुरु हुनेछ ।
आगामी वैशाख ३० गते हुन गइरहेको स्थानीय तहको निर्वाचनका लागि विभिन्न जिल्लाबाट म्यादी प्रहरी भर्ना गर्न शुरु गरिएको छ । म्यादी प्रहरीको जम्मा तलब ३० हजार २४० रुपैयाँ, खाद्यान्नबापतको एकमुष्ट ७ हजार २०० रुपैयाँ र अन्य पोसाक तथा सामान खरीद गर्नेगरी प्रतिव्यक्ति ६ हजार रुपैयाँ उपलब्ध हुनेछ ।
निर्वाचनका क्रममा म्यादी प्रहरीलाई खटिएको ठाउँमा जान आउन तयारी स्वरूप प्रतिम्यादी प्रहरी (एक पटकका लागि) १ हजार रुपैयाँ उपलब्ध हुने छ । सरकारले म्यादी प्रहरीलाई बीमा सुविधा पनि दिएको छ ।
यसैक्रममा अभियान संवाददाता सुनिल शर्माले म्यादी प्रहरी छनौटका गतिविधिलाई आफ्नो क्यामेरामा कैद गरेका छन् । तस्वीरमा हेरौं :