म्याग्दी । म्याग्दीको बेनी नगरपालिका–५, पछैमा रामायण पार्क निर्माण हुने भएको छ । संस्कृति, पर्यटन तथा नागरिक उड्डयन मन्त्रालय र नगरपालिकाको साझेदारीमा पछैमा रामायण पार्क निर्माण हुने भएको हो । निर्माण हुन लागेको रामायण पार्कको विस्तृत परियोजना प्रतिवेदन डिपिआर तयार भएको छ ।
डिपिआर अनुसार पहिलो चरणमा रामायण पार्क निर्माणको विषयमा शुक्रवार पछैमा स्थानीय र सरोकारवालाहरूबीच छलफल भएको छ । पौराणिक प्रमाणलाई यथावत् राखेर पार्क बनाइने भएको छ ।
पहिलो चरणमा रामायणसम्बन्धिको मूर्ति, बगैंचा, विश्रामस्थल, धर्मशाला लगायत पूर्वाधार बनाइने भएको छ । बजेटको उपलब्धता र आवश्यकताको आधारमा पूर्वाधार निर्माणलाई क्रमागत रूपमा निरन्तरता दिइने नगर प्रमुख हरिकुमार श्रेष्ठले बताए । उनले मन्त्रालय र नगरपलिकाबीच समन्वय नहुँदा ढिलाइ भएको जानकारी दिए । पुलह पुलत्स्य क्षेत्रको १४ रोपनी जग्गामध्ये पहिलो चरणमा चार रोपनीमा रामायण पार्क बनाउन लागिएको नगरपालिकाका इन्जिनियर विमलरञ्जन कार्कीले बताए ।
डिपिआरमा उल्लेख भए अनुसार हालको मन्दिर, हवन कुण्ड, रावणको नाभी गाडेको मानिने ठाउँ लगायत पुरानो संरचनालाई यथावत् राखेर पूर्वाधार बनाइने भएको छ । २३ करोड रुपैयाँ लागत अनुदान गरिएको पार्कका लागि चालू आर्थिक वर्षमा पर्यटन मन्त्रालयले २ करोड ११ लाख र नगरपालिकाको १ करोड १४ लाख विनियोजन गरेका छन् । धेरै प्राविधिक काम भएको कारण ठेक्का प्रक्रियाबाट योजना कार्यान्वयन गर्न लागिएको नगरपालिकाका प्रमुख प्रशासकीय अधिकृत छविलाल सुवेदीले बताए ।
उनका अनुसार योजना २ वर्षभित्र सक्ने लक्ष्य राखिएको छ । २०६६ सालमा म्याग्दी उद्योग वाणिज्य संघका अध्यक्ष प्रमोदकुमार श्रेष्ठ लगायतले म्याग्दी भित्रने पर्यटकको बसाइ लम्ब्याउन र मुक्तिनाथ आवतजावत गर्ने धार्मिक पर्यटकलाई लक्षित गरेर बेनीमा रामायण पार्क बनाउने योजनाको परिकल्पना गरेका थिए ।
२०७४ देखि नै बजेट विनियोजन गरिए पनि ठाउँ छनोट हुन नसकेको र स्रोत अभावमा रोकिएको रामायण पार्कको योजनालाई नगरपालिकाको गौरवको आयोजनाको रूपमा कार्यान्वयनमा लैजान लागिएको नगर कार्यपालिकाको भौतिक पूर्वाधार विकास समितिका संयोजक कृष्णकुमार विश्वकर्माले बताए ।
निवर्तमान संघीय सांसद भूपेन्द्रबहादुर थापाले रामायण पार्क म्याग्दीको गौरवको योजना मात्र नभएर पौराणिक महत्वको उजागर र धार्मिक पर्यटनको विकासमा सहयोग पुग्ने बताए । उनले निर्माण हुने पार्कको भौतिक संरचनालाई दिगो बनाउन स्थानीयको भूमिका महत्वपूर्ण भएको बताए । स्तरोन्नतिको क्रममा रहेको अर्थुङे–पुलाचौर र पुलाचौर–पूर्णगाउँ सडक आयोजनालाई प्रभावकारी बनाउन सकेमा रामायण पार्क आवतजावत गर्ने पर्यटकलाई सुविधा पुग्ने उनको भनाइ छ ।
