काठमाडौं । वैशाख २४ गते 'नेपाल व्यवसाय शिखर सम्मेलन, २०८०' आयोजना हुने भएको छ । नेपाल सरकार, बैंक तथा वित्तीय संस्था परिसंघ नेपाल (सिबिफिन) र नेपाल विजनेश इन्स्टिच्युटको संयुक्त आयोजनामा उक्त सम्मेलन हुन लागेको हो ।
सिबिफिनले वैशाख १५ गते काठमाडौंमा पत्रकार सम्मेलनको आयोजना गरी सम्मेलन हुन लागेको जानकारी दिएको हो ।
यस सम्मेलनको उद्घाटन प्रधानमन्त्री पुष्पकमल दाहाल ‘प्रचण्ड’ ले र समापन पूर्व प्रधानमन्त्री केपी शर्मा ओलीबाट हुने जानकारी आयोजकले दिएको छ ।
‘अर्थतन्त्रका वर्तमान चुनौति तथा समृद्धिको मार्गचित्र’ मूल विषयवस्तु रहेको उक्त सम्मेलनमा नेपालको वर्तमान आर्थिक एवम् बैंकिङ अवस्था, चुनौती तथा समाधानका उपायहरुमा गहन विचार विमर्स हुनेछ ।
हाल उद्योगि व्यवसायीको मनोबल निकै घटेको , विभिन्न कारणले मागमा संकुचन आई उत्पादन प्रभावित भएको जस्तो समस्या समाधानका विषयमा समेत सरोकारवालाहरुले विशेष प्रस्तुती दिने कार्यक्रम तय भएको छ ।
चालू आर्थिक वर्षमा सरकारले राखेको लक्ष्य अनुसारको राजश्व संकलन नभएको, पूँजीगत खर्च अपेक्षित हुन नसकिरहेको र राष्ट्रिय त था अन्तरराट्रिय परिवेशका कारण मूल्यवृद्धि बढिरहेको कारण अर्थतन्त्रमा परेको नकारात्मक प्रभाव जस्ता विषयहको पनि गम्भीर चिरफार हुने जानकारी आयोजकले दिएको छ ।
यस सम्मेलनमा आर्थिक, बैंकिङ एवम् व्यवसायिक क्षेत्रका विभिन्न शीर्षकमा गरिने व्यापक छलफल तथा बहसमा प्राप्त हुने पृष्ठपोषणहरूलाई संश्लेषण गरी आर्थिक एवम् बैंकिङ सुधार तथा आत्मनिर्भर अर्थतन्त्रको भावी कार्यदिशाका वारेमा बहुपयोगी भिजन डकुमेन्ट तयार गर्ने लक्ष्य आयोजकको छ ।
उक्त बहुपयोगी भिजन डकुमेन्ट नेपाल सरकार तथा सरोकारवाला निकायहरू समक्ष बुझाउने सम्मेलनको मुख्य उद्देश्य रहेको सिबिफिनका अध्यक्ष गोल्यानले प्रष्ट पारेका छन् ।
सिबिफिनका अध्यक्ष पवनकुमार गोल्यानको अध्यक्षतामा सम्पन्न हुने उक्त सम्मेलनमा अर्थमन्त्री डा. प्रकाशशरण महल, विश्व बैंक समूहको इन्टरुनेशनल फाइनान्स कर्पोरेसन (आईएफसी) का एशिया प्यासिफिक क्षेत्रका भाइस प्रेसिडेन्ट सल्लाहकार कमर सलिम, वरिष्ठ उद्यमी तथा प्रतिनिधिसभाका सदस्य विनोदकुमार चौधरी, वरिष्ठ अर्थशास्त्री तथा प्रतिनिधि सभा सदस्य डा. स्वर्णिम वाग्ले, नेपाल राष्ट्र बैंकका गभर्नर महाप्रसाद अधिकारी, उद्योग मन्त्रालयका सचिव मधु कुमार मरासिनी, विश्व बैंकका कन्ट्री डाइरेक्टर फारिस हदाद जर्भोस, एफएनसीसीआईका पूर्व अध्यक्ष भवानी राणा, सीएनआईका पूर्व अध्यक्ष हरिभक्त शर्भा, म्यानेजमेन्ट एशोसिएशन नेपालका अध्यक्ष उपेन्द्र प्रसाद पौडेल, नेपाल बैंकर्स संघका अध्यक्ष सुनिल के.सी, वोल्ड लिंकका अध्यक्ष दिलिप अग्रवाल, डोल्मा अर्गनाइजेशनका प्रबन्धक निर्देशक जोसेफ अल्भानस लगाएत विभिन्न देशका राजदुतहरू, अर्थशास्त्रीहरू, उद्यमी–व्यवसायीहरू, विभिन्न मन्त्रालयका सचिव तथा सहसचिवहरूले सम्बोधन गर्नेछन् ।
