सामूहिक लगानी (म्युचुअल फन्ड) नियमावली र पोर्टफोलियो लगानी निर्देशिका दुई हप्ताभित्र आउने भएको छ । ‘म्युचुअल फन्डसम्बन्धी नियमावली प्रक्रियामा रहेको धेरै भयो । तर, अब ढिलोमा एक हप्तामा अर्थमन्त्रालयबाट पास भएर आइपुग्छ,’ धितोपत्र बोर्डका अध्यक्ष डा. शूरवीर पौड्यालले बताए । आउँदो बजेटमा नै म्युचुअल फन्डका लगानीकर्तालाई ५० हजारसम्मको आम्दानीमा आयकर छुटको व्यवस्था पनि गर्न लागिएको पौड्यालले बताए ।
म्युचुअल फन्ड सम्बन्धी नियमावली आएपछि लगानी व्यवस्थापन कम्पनीले बोर्डबाट अनुमति लिने बाटो खुल्छ । पर्याप्त ज्ञान नभएका र विश्लेषण गरेर लगानी गर्न नसक्ने साना लगानीकर्ताले यस्ता कम्पनीमार्फत पुँजी बजार तथा वित्तीय उपकरणहरूमा लगानी गर्न सक्छन् । यो नियमावली ल्याउने तयारी एक वर्षदेखि अघिदेखि भएको हो ।
म्युचुअल फन्डसम्बन्धी काम गर्ने कम्पनीको चुक्ता पुँजी न्यूनतम रू. १० करोड हुनुपर्नेछ । यस्तो कम्पनीले विशेष गरेर साना लगानीकर्ताबाट रकम संकलन गर्ने भएकाले सर्वसाधारणका हितमा काम गर्नुपर्छ । त्यसैले नियमावलीमार्फत यी कम्पनीको जिम्मेवारी रू. ५० करोडभन्दा बढी चुक्ता पुँजी भएका बैंक तथा वित्तीय संस्थाले लिनुपर्ने व्यवस्था गर्न लागिएको बोर्ड सुपरिवेक्षण विभागका निर्देशक निरज गिरीले बताए ।
पोर्टफोलियो लगानी सम्बन्धी निर्देशिका पनि छिट्टै लागू हुनेछ । धितोपत्र बोर्डअन्तर्गतको कानुन तथा प्रबलीकरण समितिले अन्तिम स्वरूप तयार पारेर एक हप्ताभित्र यो निर्देशिका जारी गर्ने अध्यक्ष पौड्यालले बताए ।
वर्ष ५, अंक ४३, २०६७, असार १४–२०
