काठमाडौं (अस) । युनियन लाइफ इन्स्योरेन्स कम्पनीले प्रत्येक तीन वर्षमा अग्रिम रकम भुक्तानी गर्ने गरी जीवन उत्थान बीमा योजना सार्वजनिक गरेको छ । बीमा समितिबाट स्वीकृत भई कार्यान्वयनमा आएको सो योजनाबाट बीमा गर्ने व्यक्तिले अधिक लाभ लिन सक्ने कम्पनीले बताएको छ ।
जीवन बीमा उत्थान बीमा योजना न्यून आय भएका व्यक्तिदेखि अधिक आय भएकासम्मले खरिद गर्न सक्नेछन् । न्यूनतम ५० हजारदेखि आयस्रोतका आधारमा चाहेअनुसार बीमांक रकमको बीमा गर्न सक्ने व्यवस्था रहेकाले बीमा योजनामा सबैको पहुँच पुग्ने विश्वास कम्पनीको छ । योजनामा न्यूनतम ९ वर्षदेखि अधिकतम १८ वर्षसम्मको अवधि कायम गरी १६ वर्षदेखि ५० वर्षका व्यक्तिले बीमा गर्न सक्नेछन् । बीमा गर्ने व्यक्ति बीमा अवधिसम्म जीवित रहे अग्रिम भुक्तानी गरी बाँकी हुन आएको बीमांक रकम र बोनस उपलब्ध हुनेछ भने बीमा अवधिभित्र कालगतिले मृत्यु भएसमेत बीमांक रकम र बोनस उपलब्ध गराइने कम्पनीले जनाएको छ ।
