जनकपुरधाम । रामजानकी अन्तरराष्ट्रिय क्रिकेट रंगशाला निर्माणमा ढिलाइ भएको छ । संघीय सरकारको युवा तथा खेलकुद मन्त्रालयले २०६६ असार १० गते जनकपुरधाममा रंगशाला निर्माण गर्ने निर्णय गरेको थियो ।
उक्त रंगशाला जनकपुरमा रहेको गुठी संस्थानको १६ बिघा १७ कठ्ठा १९ धुर जमीनमा वार्षिक रू. ९ लाख भाडा बुझाउनेगरी बनाउने सम्झौता भएको रामजानकी खेलकुद संस्थानका स्थापक अध्यक्ष दिनेश पुर्वेले बताए । २०७४ मङ्सिर ३ मा उक्त सम्झौता भएको थियो । रंगशाला निर्माणका लागि रू. ६ अर्ब १९ करोड १८ लाख लाग्ने अनुमान गरिएको छ ।
संघीय सरकारले आर्थिक वर्ष २०७५/७६ देखि २०७९/८० सम्ममा रू. ९ करोड ६० लाख बजेट विनियोजन गरे पनि रू. १ करोड ४० लाख रकम मात्र उपलब्ध गराएको पुर्वेले बताए । संघीय सरकारले उपलब्ध गराएको रकमबाट गुठी संस्थानलाई वार्षिक रू. ९ लाख भाडा र बाँकी कार्यालय सञ्चालनमा खर्च भएको उनको भनाइ छ । त्यस्तै प्रदेश सरकारबाट रंगशाला निर्माणका लागि २०७५/७६ देखि २०७९/८० सम्ममा रू. ६० लाख रकम उपलब्ध भएको उनले बताए ।
प्रदेश सरकारबाट उपलब्ध गराएको रकमबाट क्रिकेट ग्राउन्डको डिजाइन र घेराबार पर्खाल निर्माण गरिएको उनले जानकारी दिए । अहिलेसम्म रंगशालाको विस्तृत परियोजना प्रतिवेदन (डीपीआर) समेत तयार नभएको उनले बताए । रंगशाला निर्माणका लागि प्रक्रिया अघि बढे पनि कामले गति लिन नसकेको उनको भनाइ छ ।
