काठमाडौं । केएल ग्रूप अन्तर्गतको नारायणी इस्पात प्राइभेट लिमिटेडले वित्तीय वर्ष २०२२ मा ९ अर्ब रुपैयाँभन्दा बढी सञ्चालन नाफा गरेको छ ।
रेटिङ कम्पनी केयर रेटिङ्स नेपालका अनुसार नारायणी इस्पातले वित्तीय वर्ष २०२१ मा ५ अर्ब ६० करोड रुपैयाँ सञ्चालन नाफा कमाएको थियो । वित्तीय वर्ष २०२२ मा भने कम्पनीको सञ्चालन नाफा ६५ दशमलव ७९ प्रतिशतले बढेर ९ अर्ब २९ करोड रुपैयाँ पुगेको छ ।
नारायणी इस्पातले केयर रेटिङ्स नेपालबाट १ अर्ब ५१ करोड रुपैयाँ बराबरको दीर्घाकालीन कर्जा र ३ अर्ब ५२ करोड रुपैयाँ बराबरको अल्पकालीन कर्जासहित कुल ५ अर्ब ४ करोड रुपैयाँ बराबरको कर्जाका लागि रेटिङ गराएको थियो । केयर रेटिङ्सले कम्पनीको दीर्घकालीन कर्जाको लागि डबल बी र अल्पकालीन कर्जाको लागि ए फोर रेटिङ पुनर्पुष्टि गरेको छ ।
सन् २०१८ को जुलाईबाट सञ्चालनमा आएको नारायणी इस्पातको उद्योग बाराको चटापिप्रामा रहेको छ । कम्पनीको अध्यक्षमा विकासकुमार केएल रहेका छन् भने कम्पनीको सञ्चालकमा केएल ग्रूप अफ कम्पनिजका अध्यक्ष सत्यनारायण केएल पनि रहेका छन् ।
कम्पनीले ‘नारायणी स्टिल्स’ ब्रान्डमा १५ ओटा आन्तरिक हार्डवेयर ट्रेडिङ आउटलेट र देशभर १२९ स्थानमा रहेका डिलर/वितरकहरूमार्फत टीएमटी बार्स विक्री गर्दै आएको छ ।