काठमाडौं (अस) । गत आर्थिक वर्ष २०७७/७८ मा रू. ७ अर्ब ५ करोड बराबरको स्याउ आयात भएको छ । विगत १३ वर्षको तथ्यांक हेर्दा यस अवधिमा स्याउ आयातको औसत वार्षिक वृद्धिदर करीब ३५ प्रतिशत रहेको देखिन्छ । कृषि श्रमिकको कमी, स्याउ खेतीयोग्य कृषि भूमिको विनाश, बढ्दो भूमि मूल्य, ठूला कृषकलाई शोषक सामन्त भन्दै असुरक्षा उत्पन्न गर्ने राजनीतिक प्रवृत्ति, ग्रामीण क्षेत्रमा बढ्दो असुरक्षा, अराजकता एवं कृषिमा ठूलो अनुदानयुक्त मुलुकहरूको स्याउ उत्पादन रणनीतिका कारण स्वदेशमा माग बमोजिम स्याउ उत्पादन हुन नसक्दा आयातमा यस प्रकारको वृद्धि देखिएको हो । उक्त परिस्थितिलाई दृष्टिगत गर्दै सही रणनीति अवलम्बन गर्ने हो भने मुलुक केही वर्षभित्रै स्याउमा आत्मनिर्भर हुने निश्चित छ । यहाँ प्रस्तुत तथ्यांकले स्याउखेतीमा व्यावसायिक लगानीको उज्ज्वल सम्भावना रहेको पुष्टि हुन्छ । यसका लागि सरकारले उचित वातावरण सृजना गर्नु आवश्यक देखिन्छ ।
