नेपाली क्लब फुटबलको सबैभन्दा ठूलो प्रतियोगिता शुक्रबारदेखि सुरु हुँदै छ । अवसर छ, सहिद स्मारक लिग ‘ए’ डिभिजन २०७८ । त्यसको पूर्वसन्ध्यामा हिमालयन शेर्पा क्लबबाहेक अन्य सहभागी टिमका प्रशिक्षक तथा कप्तान बिहीबार मिडियासामु प्रस्तुत भए । कुनै क्लबको उद्देश्य लिग जित्नु थियो भने कसैको रेलिगेसनबाट मात्र बच्ने । अनि केही क्लब भने यसअघिका संस्करणको तुलनामा राम्रो प्रदर्शनको अपेक्षा राखिरहेका थिए । यसपालि प्रतियोगितामा कुल १४ टिमको सहभागिता रहनेछ ।
