पुस २५, काठमाडौं । महालक्ष्मी विकास बैंक लिमिटेडले सञ्चालक निर्वाचनको कार्यक्रम हाललाई स्थगित गरेको छ ।
कम्पनीले पुस २५ गतेका लागि आयोजना गरेको २०औं वार्षिक साधारण सभामार्फत निर्वाचन गर्ने तयारी गरेको ६ जना सञ्चालकहरुको निर्वाचन कार्यक्रम स्थगित गरेको हो । उक्त सभाले संस्थापकतर्फको तीन जना र सर्वसाधारण तर्फको तीन जना सञ्चालक निर्वाचनको कार्यक्रम तय गरेको थियो ।
कम्पनीका शेयरधनीहरु गिरिराज पोखरेल र प्रमोद श्रेष्ठले उच्च अदालत पाटनमा निवेदन दिएको कम्पनीले जानकारी दिएको छ । कम्पनीले उक्त निवेदन उपर माघ ३ गते छलफल पेशी तोकिएकाले सो अवधिसम्म निर्वाचनको बाँकी काम कारवाही नगर्ने निर्णय गरिएको बताएको छ ।
उच्च अदालतको अन्तरिम आदेशलाई पालना गर्दै अर्को निर्णयपछि मात्र निर्वाचनको कार्यक्रम अघि बढ्ने पनि कम्पनीले बताएको छ ।
यद्यपि वार्षिक साधारण सभाका अन्य प्रस्ताव भने तोकिएकै अविधिभित्र पारित हुनेछ । कम्पनीले सभा आर्मी अफिसर्स क्लब भद्रकाली, काठमाडौंमा विहान ११ बजे सभा बोलाएको हो । सभाले गत आर्थिक वर्ष २०७७/ ७८ सम्मको वार्षिक प्रतिवेदनसहितका वित्तीय विवरणहरु पारित गर्नुका साथै चालू आवको लागि लेखापरिक्षक नियुक्ती र निजको पारिश्रमिक निर्धारणको विषयलाई पनि टुङ्ग्याउनेछ ।
यस वर्ष कम्पनीले कुल २१ दशमलव शून्य ५३ प्रतिशत लाभांश प्रस्ताव गरेको छ । कम्पनीको मंसिर १२ गतेको सञ्चालन समितिको बैठकले हाल कायम चुुक्तापूँजीको आधारमा २० प्रतिशत बोनस शेयर र कर प्रयोजनका लागि १ दशमलव शून्य ५३ प्र्रतिशत नगद लाभांश वितरणको प्रस्ताव गरेको हो । हाल कम्पनीको चुक्तापूँजी रू. ३ अर्ब ३४ करोड २४ लाख २ हजार रहेको छ ।
यस वर्ष कम्पनीले हालसम्मकै उच्च लाभांश प्रस्ताव गरेको हो । यसअघि आर्थिक वर्ष २०७५/ ७६ को मुनाफाबाट कम्पनीले ८ प्रतिशत बोनस शेयर र कर प्रयोजनसमेत ९ दशमलव ८९ प्रतिशत नगद लाभांश गरी कुल १७ दशमलव ८९ प्रतिशत लाभांश वितरण गरेको थियो ।
गत वर्ष भने कम्पनीले ८ दशमलव ८ प्रतिशत बोनस शेयर र कर प्रयोजनका लागि शून्य दशमलव ४६ प्रतिशत गरी कुल ९ दशमलव २६ प्रतिशत लाभांश वितरण गरेको थियो । साधारण सभा प्रयोजनका लागि कम्पनीले पुस १३ गते एक दिन बुक क्लोज गरेको छ । बुक क्लोजको आधारमा पुस १२ गतेसम्म कायम शेयरधनीहरु मात्र सभामा भाग लिन र लाभांश प्राप्त गर्न योग्य भएका छन् ।
