राष्ट्रपति विद्यादेवी भण्डारीले बाङ्लादेश भ्रमणको क्रममा २० मिनेटभित्र दुई देशलाई जोड्ने सैयदपुर-विराटनगर हवाई सेवा सञ्चालन तत्कालै अघि बढाउनेबारे नेपालले विशेष इच्छा रहेको जाहेर गरेकी थिइन्। बाङ्लादेशले नेपालको प्रस्तावलाई स्वागत गरेको बताइएको छ।
नेपाल र बाङ्लादेशबीच काठमाण्डू जोड्ने सिधा उडान सञ्चालित छ जसबाट बर्सेनि लगभग ३० हजार बाङ्लादेशी नागरिकहरू नेपालको भ्रमणमा आउने गरेको बताइन्छ।
नयाँ हवाई मार्ग सञ्चालनमा आए त्यसले दुई देशबीचको सम्पर्क सञ्जाललाई विस्तार गर्ने र थप पर्यटक नेपाल भित्र्याउन सहयोग गर्ने अधिकारीहरूको अपेक्षा छ।
ढाकास्थित नेपाली राजदूत वंशिधर मिश्रका अनुसार सैयदपुर-विराटनगर हवाई मार्ग सञ्चालनमा आउँदा नेपालका अरू धेरै निजी वायुसेवाहरूलाई बाङ्लादेशसम्म उडान गर्न बाटो खुल्नेछ।
