म्याग्दीको अन्नपूर्ण गाउँपालिका-५ शिखमा एक अमेरिकी नागरिक अवैधरूपमा बस्दै आएका छन्। एक्लै रहेका उनी असामान्य व्यवहार र गतिविधि गर्छन्। खेतबारीमा खाडल खन्ने, किलो गाड्ने र एक्लै डुल्ने गर्छन्। स्थानीयवासीले उनको मानसिक अवस्था र गतिविधिप्रति शङ्का गरेका छन्।
संयुक्त राज्य अमेरिकाको क्यालिफोर्नियाका ५२ वर्षीय नागरिक प्रि जोइल नेपाल भ्रमणको भिसा सकिएको भएपनि आफ्नो देश फर्कन अटेर गरेर लुकिछिपी नेपालमै रहँदै आएका छन्। उनी ५२२४५ नम्बरको राहदानी बाहक हुन्।
भ्रमण भिसामा आएका विदेशी नागरिकले भिसा सकिएपछि पनि विदेशमै बसिरहनुलाई कानुनी रूपमा अपराध ठहर्याइन्छ। बाध्यातावश बस्नैपर्ने भएमा पनि अध्यागमन विभागबाट म्याद थप गर्नुपर्ने कानुन रहेको छ।
