जनकपुरधामको ऐतिहासिकता पौराणिकतालाई प्रचारप्रसार गर्ने उद्देश्यले ४ दिवसीय (फागुन १९ देखि फागुन २२ सम्म) जनकपुर साहित्य महोत्सवको आयोजना हुन भएको छ। के-कस्ता सेसनहरू रहनेछन् ? को-को रहनेछन् वक्ताहरू ? आउनुहोस्, जानौं ।
फागुन १९ गते बुधवारदेखि फागुन २२ गतेसम्म चल्ने महोत्सवमा सामाजिक, साँस्कृतिक, साहित्यिक, राजनीतिक लगायतका विषयवस्तुमाथि छलफल गरिने बताइएको छ।
महोत्सवमा साहित्य, संगीत, सिनेमा, संस्कृति, सभ्यता, राजनीतिलगायतका विषयका १५ सत्रमा ४५ जना वक्ताहरू सहभागी हुनेछन्। यी सत्रहरुमा १५ जनाले सहजकर्ताको भूमिका निर्वाह गर्नेछन्।
बुधवार महोत्सवको उद्घाटन नेपालका प्रथम राष्ट्रपति डा. रामवरण यादवले गर्नेछन् भने उद्घाटन समारोहको प्रमुख वक्ताको रुपमा सांसद विनोद चौधरीलाई बोलाइएको छ। यस अतिरिक्त उद्घाटन समारोहमा प्रदेश २ का मुख्यमन्त्री लालबाबु राउतको समेत सहभागिता रहनेछ।
महोत्सवको औपचारिक सत्र जानकी मन्थन शिर्षकबाट हुनेछ। जानकी मन्थन शिर्षकमा नेपाली कांग्रेसका नेता प्रदीप गिरी, राजनीतिक विश्लेषक सीके लाल, मैथिलीका वरिष्ठ साहित्यकार डा राजेन्द्र विमल, भारतका साहित्यकार डा आशा प्रभाले आ-आफ्नो विचार राख्नेछन्।
