सरकारले कोरोना भाइरस विरुद्धको ५० लाख डोज खोप खरिदको प्रक्रिया अगाडि बढाएको छ । दोस्रो चरणको खोप कार्यक्रम सरकारले फागुन २३ गतेदेखि सुरु गर्न लागेको छ । जसमा ५५ वर्ष र माथिका नागरिकलाई लगाउने तयारी सरकारको छ ।
स्वास्थ्य तथा जनसंख्या मन्त्रालयका सचिव लक्ष्मण अर्यालले सरकारले थप ५० लाख डोज कोरोनाविरुद्धको खोप खरिदको तयारी सुरु गरेको जानकारी दिएका हुन्। प्रतिडोज साढे पाँच डलरका दरले खोप खरिद गर्न सरकारले उत्पादक कम्पनी भारतको सेरम इन्स्टिच्युट अफ इन्डियालाई प्रस्ताव पठाइसकेको छ ।
हाल सरकारसँग कोरोना भाइरसविरुद्धका खोप ३० लाख डोज रहेको छ। त्यस्तै कोभ्याक्सले २२ लाख डोज दिने र चीनले पनि कोरोना भाइरसविरुद्धको ८ लाख डोज खोप दिने भएको उनको भनाइ थियो ।
तेस्रो चरणको खोप अभियानमा २०७८ वैशाख ७ गतेदेखि ४० वर्षदेखि ५४ वर्ष उमेर समूहका नागरिकलाई खोप लगाइने बताइएको छ।
