पछिल्लो समय विश्वभर नै मिडिया कम्पनीको आम्दानी घटिरहेको र गुगलको कमाइ बढेको बढ्यै छ । यहिबेला अस्ट्रेलियाले गुगल र फेसबुकले आफ्नो प्लेटफर्मका समाचार प्रकाशित गरेबापत प्रकाशकलाई शुल्क तिनुपर्ने कानुन पारित गरेको छ । यस्तो कानुन विश्वकै पहिलो भएको अन्तर्राष्ट्रिय सञ्चारमाध्यमले जनाएका छन् ।
अस्ट्रेलियाको नयाँ कानुनमा फेसबुक, गुगलजस्ता प्रविधि कम्पनीले समाचार सामग्रीका लागि शुल्क तिर्नुपर्नेछ । अहिलेसम्म उनीहरुले कति पैसा तिर्नुपर्छ भन्नेबारे भने केही खुलाइएको छैन ।
अस्ट्रेलिया सरकारले प्रविधि कम्पनीले पत्रकारिताको उचित शुल्क तिनुपर्ने अस्ट्रेलिया सरकारको तर्क छ । यसका साथै अस्ट्रेलियाको सञ्चार क्षेत्रका लागि आर्थिक सहयोग आवश्यक भएको र बलियो सञ्चारमाध्यम लोकतन्त्रका लागि आवश्यक रहेको पनि सरकारको तर्क छ ।
गत हप्ता मात्रै त्यही कानुनको विरोधमा फेसबुकले अस्ट्रेलियाका सबै समाचार बन्द गरेको थियो । अस्ट्रेलिया सरकारसँगको सम्झौतापछि फेसबुकले समाचार सामग्रीमाथिको रोक हटाएको छ । फेसबुक र गुगलसँगको कुराकानीपछि अस्ट्रेलियाले तल्लो सदनमा प्रस्तावित अवस्थामा रहेको कानुन संशोधन गरेको थियो । नयाँ कानुनले दुवै कम्पनीलाई राहतको व्यवस्था गरेको बताइएको छ ।
अस्ट्रेलिया सरकारले फेसबुक र गुगलमा उपलब्ध हुने समाचारको पैसा तिर्नुपर्ने नियम लगाउने मिडिया कोड संसद्बाट पारित गर्ने बताइरहेको बेला फेसबुकले सबै प्लेटफर्मबाट समाचार सामग्री हटाउने निर्णय गरेको थियो ।
नयाँ कानुनअनुसार फेसबुक र गुगलजस्ता कम्पनीले सोझै समाचार प्रकाशकसँग सम्झौता गर्न सक्नेछन् । अस्ट्रेलियाको नयाँ कानुन विश्वभरका नियामक निकायका लागि डिजिटल प्लेटफर्ममा समाचार सामग्रीको भुक्तानीका लागि एउटा प्रभावकारी मोडेल हुन सक्ने बताइएको छ ।
/cloudfront-ap-southeast-2.images.arcpublishing.com/nzme/3EQHTNPR35A5O4GPC25UXAAFUM.jpg
)
