विद्यालय व्यवस्थापन समितिको चुनावमा विवाद हुँदा नेपाल तरूण दलका बझाङस्थित कार्यकर्ता अमृत सिंहको खुँडा प्रहार गरी हत्या गरिएको छ। सिंहको हत्यामा संलग्नलाई कारबाहीको माग गर्दै जिल्ला सदरमुकाम चैनपुरमा प्रदर्शन गरिएको छ।
छबिस पाथिभेरा गाउँपालिका–३ का अमृत सिंहको हत्यामा संलग्न भएको आरोपमा वडाध्यक्षसहित चार जना पक्राउ परेका छन् । सिंहको मंगलबार राती खुँडा प्रहार गरी हत्या भएको थियो । २३ वर्षीय सिंह नेपाल तरुण दल, छबिस पाथीभेरा गाउँपालिकाका सदस्य हुन् ।
पक्राउ पर्नेमा छविसपाथिभेरा गाउँपालिका-२ का वडाध्यक्ष विकास ऐडी, उनका भाइ नाता पर्ने प्रकाश ऐडी, सोही ठाउँका केदार ऐडी र ज्ञानबहादुर कडायत रहेको बझाङका प्रहरी नायब उपरीक्षक खड्काले बताएका छन्।
नेपाल तरूण दलका बझाङस्थित कार्यकर्ता अमृत सिंहलाई खुँडा प्रहार गरी हत्या गर्ने नेपाल कम्युनिष्ट पार्टी नेकपाका कार्यकर्तालाई कारवाही गर्न नेपाली कांग्रेसले माग गरेको छ।
सिंहको हत्यामा संलग्नलाई कारबाहीको माग गर्दै जिल्ला सदरमुकाम चैनपुरमा प्रदर्शन गरिएको छ। घटनाको विरोध गर्दै नेपाल विद्यार्थी संघ र स्थानीयले सदरमुकाम बन्द गर्दै प्रदर्शन गरेका हुन्। उनीहरूले नेकपाका नेता तथा कार्यकर्ताले सिंहको हत्या गरेको आरोप लगाएका छन्।
