छोटकरीमा : आज - २०७७ कार्तिक १९, बुधबार

आज कुनै पनि परिस्थितिमा राजनीमा नदिने प्रधानमन्त्रीको भनाई, भारतीय सेना प्रमुख नेपालमा, कक्षा १२ को परिक्षा अनलाइनबाट मिलाउन सरकारको निर्देशन, टर्कीमा भूकम्पबाट मृत्यु हुनेको संख्या ११६ पुग्यो, अमेरकी चुनावको मतगणना जारि लगायतका विषयवस्तुहरूलाई समावेश गरिएका छन्।



बुधबार ३,३०९ जना थपिएसँगै नेपालमा कोरोना संक्रमितको कुल संख्या १,८२,९२३ पुगेको छ भने मृत्यु हुनेको संख्या १,०३४ पुगेको छ। हालसम्म नेपालमा १,४४,९७८ जना कोरोना संक्रमित निको भएका छन्।

=> PCR Tests Today: १३,१४४ => Recovered Today: ३,८४४

देशभरी सक्रिय संक्रमितको संख्या हालसम्म ३६ हजार ९११ छ ।



प्रधानमन्त्री केपी शर्मा ओलीले राजीनामा नदिने स्पष्ट पारेका छन् । बुधबार बिहान चिकित्साशास्त्र अध्ययन संस्थान अन्तर्गतको मनमोहन सेन्टर एनेक्स भवनको समुद्घाटन समारोहलाई सम्बोधन गर्दै कुनै पनि परिस्थितिमा आफूले राजीनामा नदिने बताएका हुन् । 



पार्टीभित्रको विवाद उत्कर्षतिर अभिमुख हुँदै जाँदा प्रधानमन्त्री केपी शर्मा ओली पक्षले गोप्य भेलाको आयोजना गर्न थालेको छ । कोरोना सङ्क्रमणको जोखिमका कारण ओली पक्षले जुम मिटिङमार्फत् आफ्ना कुरा राख्न थालेको हो ।

स्रोतका अनुसार ओली समूहले आज प्रदेश नम्बर एकको कमिटी स्तरीय भेला आयोजना गरेको थियो ।



भारतीय स्थलसेना प्रमुख मनोजमुकुन्द नरवणेले बुधबार अपरान्ह पशुपतिनाथको दर्शन गरेका छन्। नरवणे भारतीय वायु सेनाको विशेष विमान 'इन्डियन एयर फोर्स-३३' मार्फत आज दिउँसो काठमाडौं ओर्लिएका थिए। भ्रमण दलमा नरवणेकी श्रीमतीसहित चार सदस्य रहेका छन्।



अर्थमन्त्री विष्णुप्रसाद पौडेलले मेलम्ची खानेपानी आयोजना छिटो सम्पन्न गर्न अर्थ मन्त्रालयले आवश्यक सबै सहयोग गर्ने बताएका छन् । अर्थ मन्त्रालयमा आयोजित कार्यक्रममा उनले मेलम्ची आयोजना सम्पन्न गर्न आवश्यक सहयोग र सहजीकरण गर्न मन्त्रालय तयार रहेको बताए । 



सरकारले कोरोना जोखिमको विषम स्थितिमा कक्षा १२ को परीक्षा विद्यार्थी जहाँ छन्, त्यहीँबाट पनि दिन सकिने गरी तयारी गर्न राष्ट्रिय परीक्षा बोर्डलाई निर्देशन दिएको छ। आगामी मंसिर ९ देखि १६ गतेसम्म सञ्चालन हुने भएको बताइएको छ।



चितवन राष्ट्रिय निकुञ्जमा दुईवटा गैंडा मृत फेला परेको छ । निकुञ्जका अनुसार निकुञ्जको पश्चिम सेक्टर अन्तर्गत लौखानीमा पोथी माउ गैंडा र बच्चा फेला परेको हो । माउ गैंडाको खाग नभएको बताएइको छ।



 होम आइसोलेसनमा बसेका कोरोना संक्रमितलाई आफूखुसी औषधि सेवन नगर्न स्वास्थ्य तथा जनसंख्या मन्त्रालयले आग्रह गरेको छ । साथमा होम आइसोलेसनमा बस्दा आफूलाई व्यस्त राख्‍न फिल्म हेर्ने, पत्रपत्रिका पढ्ने, किताब पढ्ने जस्ता मन भुलाउन र सिर्जनात्मक काम गर्न सुझाइएको छ ।



नेपाल राष्ट्र बैंकका गभर्नर महाप्रसाद अधिकारीले सार्कफाइनान्स अन्तर्गतका केन्द्रीय बैंकहरुले साझा डिजिटल मुद्रा अवलम्बन गर्नुपर्ने बताएका छन् । आज सार्क राष्ट्रका केन्द्रीय बैंकका गभर्नरहरुको सहभागीतामा भएको सार्क फाइनान्स ग्रुप मिटिङमा गभर्नर अधिकारीले सार्क फाइनान्स अन्तर्गतका केन्द्रीय बैंकहरुले साझा डिजिटल मुद्रा अवलम्बन गर्न सार्कफाइनान्स स्तरमा एक अध्ययन गर्नुपर्ने बताएका हुन् । 



पूर्वप्रधानमन्त्री एवं जनता समाजवादी पार्टीका संघीय परिषद् अध्यक्ष डा. बाबुराम भट्टराईले नेकपाको विवादलाई अग्रगमन र पश्चगमनबीचको लडाइँको संज्ञा दिएका छन् । सामाजिक सञ्जाल ट्विटरमार्फत उनले प्रधानमन्त्री एवं नेकपा अध्यक्ष केपी ओलीलाई नेपाली राजनीतिका पश्चगामी सोच राख्ने चतुर खेलाडी भनेका छन् । 



राष्ट्रिय ध्वजाबाहक नेपाल वायुसेवा निगम (एनएसी)ले स्वास्थ्य परीक्षण गरी आफ्नो जहाजमार्फत उडान भरेका यात्रुलाई विदेशी विमानस्थलमा प्रतिबन्ध लगाइँदा आफ्नो मात्र नभई देशकै बेइज्जत भएकाे जनाएको छ । 

निगमले विज्ञप्ति निकालेर स्वास्थ्य मन्त्रालयबाट मान्यता प्राप्त ल्याबबाट परीक्षण गरिएको कोरोना परीक्षण गरेका यात्रु आफ्नो जहाजबाट यात्रा गरी सम्बन्धित देशमा पुनः परीक्षण गर्दा कोरोना पजिटिभ देखिनुले निगमको प्रतिष्ठामा नोक्सानी पुग्नुका साथै देशकै प्रतिष्ठा गुमेको ठहर गरेको हो । 



 बुधबार हन्ड्रेट्स ग्रुपका स्वयंसेवकहरुले राजधानीको खुलामञ्चमा गरिब तथा असायहरुलाई खाना खुवाएका छन् । कोरोना संक्रमणको जोखिम बढेको, फोहोर भएको भन्दै महानगरपालिकाले खुलामञ्चमा खाना नखुवाउन भन्दै आएको छ । खाना खुवाउने अभियानमा रोक लगाउन खोजेपछि महानगरको चौतर्फी विरोध भएको छ ।



धनगढीमा दुईजना प्रहरीको हत्या घटनासँग जोडिएको तस्करीको मटर (केराउ) को कारोबारमा संलग्न एकजना व्यापारीलाई प्रहरीले पक्राउ गरेको छ । धनगढी उपमहानगरपालिका– ५, शिवनगरस्थित आदित्य ट्रेडिङका सञ्चालक ३५ वर्षीय राजीव गुप्ता पक्राउ परेका हुन् ।



सरकारी ढुवानी अनुदानको चामल दुई वर्षदेखि नजाँदा माथिल्लो डोल्पामा महँगी अचाक्ली बढेको छ । माथिल्लो डोल्पाको छार्काताङसोङ, डोल्पोबुद्ध र शे–फोक्सुन्डो गाउँपालिकाका बासिन्दा बजारबाट प्रतिक्विन्टल २० हजार रुपैयाँसम्ममा चामल किनेर गुजारा चलाउन बाध्य छन् ।



यथार्थवादी उपन्यास लेखनबाट नाम बनाएका कैलाली, टीकापुरका साहित्यकार गगनसिंह थापाको ७३ वर्षको उमेरमा मंगलबार राति निधन भएको छ ।

केही वर्षयता कलेजोको क्यान्सरबाट ग्रस्त थापाको पछिल्लो समय मेडिसिटी अस्पतालमा उपचार भइरहेको थियो । लेखक थापाका ‘सोह्र सौगात’ (संयुक्त कथासंग्रह), ‘कर्णालीको छेउछाउ’, ‘पुर्खाको चिट्ठी’, ‘मेरो मधुशाला’, ‘उज्ज्वली’ जस्ता उपन्यास कृति प्रकाशित छन् ।



 साउदी अरेबियाले हालै मुख्य श्रम सुधारको योजना सुरु गरेको छ । उक्त योजनाअन्तर्गत रोजगारीको गतिशीलतालाई अनुमति दिँदै रोजगारदाताहरुको स्वीकृति बिना प्रवासी कामदारहरु बाहिर जान र पुनः प्रवेश भिसा जारी गर्ने नियमनको सुरुवात गरेको हो ।



टर्कीमा गत शुक्रबार गएको शक्तिशाली भूकम्पका कारण ज्यान गुमाउनेको संख्या १ सय १६ पुगेको छ । टर्किस अधिकारीहरुले भूकम्पबाट मृत्यु हुनेको संख्या १ सय १६ पुगेको पुष्टि गर्दै अन्तिम चरणको उद्धार तथा खोजी कार्य जारी रहेको बताएका छन् । मृत्यु हुनेमा २ जना ग्रिसका नागरिक छन् । 



अमेरिकी राष्ट्रपति डोनाल्ड ट्रम्पको 'स्पष्ट छ, हामीले यो चुनाव जित्यौं' भन्‍ने आधारहीन घोषणाले डेमोक्रेटिक राजनीतिज्ञहरुमा ठूलो तरंग पैदा गरेको छ । 

न्युयोर्कमा पुन: निर्वाचित हुने प्रक्षेपण गरिएकी अलेक्जान्ड्रिया ओकासियो-कर्तेजले ट्रम्पको दाबीलाई “अवैध, खतरनाक, र अधिनायकवादी” भनेर निन्दा गरेकी छन् । 



अमेरिकामा सम्पन्न राष्ट्रपतीय चुनावको मतपत्र गन्ती चलिरहेको छ । दुई प्रमुख उम्मेदवार डोनाल्ड ट्रम्प र जो वाइडेनबीच निक्कै कडा प्रतिस्पर्धा हुने देखिएको छ । ४१ राज्यको मतपरिणाम आइसक्दासमेत कसैको जित सुनिश्चित भएको छैन ।



 भारतीय पत्रकार अर्नब गोस्वामी पक्राउ परेका छन् । रिपब्लिक टेलिभिजनका प्रधान सम्पादकसमेत रहेका अर्नबलाई मुम्बई प्रहरीले आत्महत्या दुरुत्साहनको मुद्दामा पक्राउ गरेको भारतीय सञ्‍चारमाध्यमले जनाएका छन् ।



भारतको अहमदाबादस्थित एउटा कपडा गोदाममा आगलागी हुँदा आठजनाको मृत्यु भएको छ ।

अहमदाबादको नानुकाकामा रहेको एउटा कपडा गोदाममा आगो लागेपछि भवनको पर्खालमुनि किचिएर ६ जनाको मृत्यु भएको आजतकले जनाएको छ । घटनामा अन्य दुईजनाको समेत मृत्यु भएको हो ।



मंगलबार टर्कीमा अचम्मको घटना भयो । चार वर्षीया बालिकाकाे भूकम्प गएको ९१ घन्टापछि सकुशल उद्धार भएको छ । उद्धार टोलीले एक भवनको भग्नावशेषबाट बालिकालाई उद्धार गरेको स्थानीय एजेन्सीहरूले जनाएका छन् । 


सम्बन्धित सामग्री

संसदलाई कोरोना खोप : योगेश र ईश्वर पोख्रेलको भेट, तर एक अर्कासँग बोल्दै बोलेनन्!

प्रतिनिधिसभाको बैठक नजिकिँदै गर्दा संसद् सचिवालयले सांसदहरूलाई कोरोनाविरुद्धको ‘कोभिसिल्ड भ्याक्सिन’ लगाइदिन सुरु गरेको छ । जहाँ एउटा रमाइलो दृश्य देखियो, नेकपा प्रचण्ड नेपाल खेमाका नेता योगेश भट्टराई र बहालवाला उपप्रधानमन्त्री ईश्वर पोख्रेलबीचको भेट। तर २० मिनेटको अवधि दुवै एक-अर्कासँग बोलेनन्।

छोटकरी सम्पादक

प्रतिनिधि सभा बैठकको सम्पूर्ण तयारी पूरा, ओली र प्रचण्ड समूह आमुनेसामुने हुँदै

पुस ५ गते विघटन भएको प्रतिनिधि सभाको बैठक फागुन २३ गते आइतबार बस्दैछ । पुस ५ गतेदेखि नै आमने सामने हुन नसकेका नेकपाका दुई अध्यक्षद्वय केपी शर्मा ओली र पुष्पकमल दाहाल आइतबार नै संसद् सचिवालयमा आमने सामने हुने देखिएको छ । त्यो दृश्य कस्तो हुनेछ, आउनुहोस् जानौं ।

छोटकरी सम्पादक

यी हुन् नेकपा प्रचण्ड–माधव समूहको केन्द्रीय कमिटी बैठकका निर्णय

नेपाल कम्युनिष्ट पार्टी(नेकपा) प्रचण्ड–माधव समूहको केन्द्रीय कमिटी बैठकले स्थायी कमिटी सदस्य सुवासचन्द्र नेम्वाङसहित ७ जनालाई कारबाही गरेको छ। बैठकले ओलीलले राजीनामा नदिएकोमा निन्दा समेत गरेको छ। थप केके निर्णय भए, आउनुहोस् जानौं।

छोटकरी सम्पादक

पेट्रोलियममा मूल्यवृद्धिविरुद्ध विद्यार्थीहरूको प्रदर्शन

पेट्रोलियममा गरिएको मूल्यवृद्धिविरुद्ध विद्यार्थीहरूले नेपाल आयल निगमअगाडि प्रदर्शन गरेका छन् । विद्यार्थीहरूले बढाइएको मूल्य तत्काल फिर्ता लिन सरकारसँग माग गरेका छन् । पेट्रोल, डिजेल र मट्टीतेलमा प्रतिलिटर दुई रुपैयाँका दरले बढाइएको छ ।

छोटकरी सम्पादक

‘जनकपुर साहित्य महोत्सव’ सुरु हुँदै

जनकपुरधामको ऐतिहासिकता पौराणिकतालाई प्रचारप्रसार गर्ने उद्देश्यले ४ दिवसीय (फागुन १९ देखि फागुन २२ सम्म) जनकपुर साहित्य महोत्सवको आयोजना हुन भएको छ। के-कस्ता सेसनहरू रहनेछन् ? को-को रहनेछन् वक्ताहरू ? आउनुहोस्, जानौं ।

छोटकरी सम्पादक

सल्यानटारमा डोजरको ठक्करबाट महिलाको मृत्यु, स्थानीयले गरे डोजरमा आगजनी

धादिङको त्रिपुरासुन्दरी गाउँपालिका- १ सल्यानटार खोल्सी नजिक डोजरले ठक्करबाट एक महिलाको मृत्यु भएको छ। घटनास्थलमा रहेका स्थानीय बासीन्दाका अनुसार डोजरको ठक्करपछि घाइते भएकी महिलालाइ जिउदै अवस्थामा डोजरले माटो खनेर पुरिदिएको भन्दै डोजरमाथि आगजानी गरेका छन्।

छोटकरी सम्पादक