छोटकरीमा : असोज महिना- राजनीतिक गतिविधिहरू (विदेश)

असोज महिनाभर देश बाहिर के-कस्ता राजनीतिक, न्यायिक, शैक्षिक गतिविधिहरू भए ? सम्पूर्ण खबरहरू एकसाथ एकैठाउँमा पाउनुहोस् ।



सुडान काउन्सिलका प्रमुख अब्देशल फताह अल-बुर्हान यूएई पुगेका छन्। उनले यूएईमा इमिरेट्स र अमेरिकी अधिकारीसँग छुट्टाछुट्टै वार्ता गर्ने बताइएको छ। सुडानी सञ्‍चारमाध्यम अनुसार अल-बुर्हानले सुडानलाई अमेरिकाको 'आतंकवादको प्रायोजन' गरेको मुलुकको सूचीबाट हटाउने विषयमा अमेरिकी अधिकारीहरुसँग छलफल गर्नेछन्। 



एचएसबीसी बैंकले घोटालाबारे खुलासा भएको थाहा पाए पनि उक्त कार्यमा संलग्‍न रहेकाहरूलाई विश्वभर लाखौं डलर पठाउन दिएको पाइएको छ। बेलायतको सबैभन्दा ठूलो बैंकले सन् २०१३ र २०१४ मा आफ्नो अमेरिकी व्यवसायमार्फत एचएसबीसीको हङकङस्थित खातामा रकम ट्रान्सफर गरेको थियो। 



बेलायतको सबैभन्दा ठूलो बैंक एचएसबीसीको सेयरमा २५ वर्षयताकै सबैभन्दा ठूलो गिरावट आएको छ । बैंक घोटाला गरेको खुलासा भए पनि बैंकले आफ्ना कर्मचारीहरुलाई अन्य बैंकमा पैसा पठाएको दिएको भन्‍ने फिनसेन फाइल्स सार्वजनिक भएपछि बैंकको सेयरमा सन् १९९५ यताकै सबैभन्दा ठूलो गिरावट आएको हो। 



भारतमा कृषिसम्बन्धी विधेयकलाई लिएर विवाद उत्पन्न भएको छ। भारतको दुवै सदन लोकसभा र राज्यसभाबाट पारित भएको कृषि उपज व्यापार तथा वाणिज्य (संवर्द्धन एवं सरलीकरण) विधेयक २०२०, कृषक (सशक्तीकरण एवं संरक्षण) मूल्य आश्वासन तथा कृषि सेवा करार विधेयक २०२० प्रति विपक्षी भारतीय राष्ट्रिय कंग्रेस, तृणमूल कंग्रेसले मात्र नभई सत्तारूढ गठबन्धनकै साझेदार शिरोमणि अकाली दलले समेत चर्को विरोध गरेका छन्।



अमेरिकी सरकारले विच्याट र छोटा भिडियो सेयरिङ मोबाइल एप्स टिकटकलाई अमेरिकी एप्स स्टोरमा प्रतिबन्ध लगाएको छ। यो प्रतिबन्ध भोलि आइतबारबाट लागू हुनेछ । प्रतिबन्धसँगै अब अमेरिकामा नयाँ प्रयोगकर्ताले विच्याट र टिकटक डाउनलोड गर्न सक्दैनन्। 



चिनियाँ राष्ट्रपति सी जिनपिङको आलोचक तथा पूर्व घरजग्गा व्यापारी रेन सिचियाङलाई भ्रष्टाचार आरोपमा १८ वर्षको जेल सजाय तोकिएको छ। बेइजिङ अदालतले सिचियाङलाई 'भ्रष्टाचार, घुसखोरी र सार्वजनिक कोषको अपचलनको लागि दोषी' ठहर गरेको चिनियाँ सरकारी सञ्‍चारमाध्यम ग्लोबल टाइम्सले जनाएको छ।



दक्षिण कोरियाले आफ्ना एक सरकारी अधिकारीलाई उत्तर कोरियाका सैनिकहरूले गोली हानी हत्या गरेको र उनीहरुको शव जलाएको दाबी गरेको छ। दक्षिण कोरियाली रक्षा मन्त्रालयले यस घटनाको निन्दा गर्दै 'क्रुर कार्य' को संज्ञा दिएको छ । ती कर्मचारी दुई देशको जलसीमा नजिकै गस्ती गर्ने एउटा डुंगाबाट बेपत्ता भएका थिए। उनीहरुको शव जलेको अवस्थामा उत्तर कोरियाको भेटिएको थियो। 



चीनको उत्तरपश्‍चिमी क्षेत्र सिन्जियाङमा यसअघि बताइएभन्दा धेरै ठूलो हिरासत केन्द्रहरुको नेटवर्क भएको अनुसन्धानकर्ताहरुले बताएका छन्। अस्ट्रेलियन थिंक ट्यांकका अनुसन्धानर्कताहरुले बिहीबार एक अनुसन्धान रिपोर्ट सार्वजनिक गर्दै हिरासत केन्द्रहरु बढाउने क्रम जारी रहेकोसमेत बताएका छन्। तर, चीनले भने उइगर समुदायका लागि 'पुन:शिक्षा कार्यक्रम' कार्यक्रमहरु सुरु गरिरहेको बताएको छ।



न्यून जन्मदरको समस्या झेलिरहेको जापानले नवविवाहित जोडीका लागि ६ लाख जापनिज रुपैयाँ बराबरको आर्थिक सहयोग गर्ने घोषणा गरेको छ।मापदण्डअनुसार यो सुविधा लिन चाहने बेहुलाबेहुली दुवैजना विवाह गर्ने समय ४० वर्षभन्दा कम उमेरको हुनुपर्नेछ।



उत्तर कोरियाली नेता किम जोङ उनले दक्षिण कोरियाली अधिकारी मारिएको घटनाप्रति माफी मागेका छन्।नेता किमले दक्षिण कोरियाली राष्ट्रपति मुन जाइ-इनलाई पत्र पठाउँदै 'नहुनुपर्ने घटना घटेको भन्दै माफी मागेको' दक्षिण कोरियाली राष्ट्रपति कार्यालयलाई उद्धृत गर्दै बीबीसीले जनाएको छ।



संयुक्त राज्य अमेरिकामा राष्ट्रपति डोनाल्ड ट्रम्पले सर्वोच्च अदालतको नयाँ न्यायाधीशका लागि एमी कोनी ब्यारेटलाई नियुक्त गर्ने प्रस्ताव गरेका छन्। सोसल कन्जरभेटिककी प्रिय एमीलाई ट्रम्पले उदारवादी न्यायाधीश रुथ बेडर गिन्सबर्गको स्थानमा नियुक्तिका लागि मनोनित गरेका हुन्। ह्वाइट हाउसको रोज गार्डेनमा मनोनयन घोषणा गर्दै ट्रम्पले एमीलाई 'अतुलनीय उपलब्धी हासिल गर्ने' महिलाका रुपमा परिभाषित गरेका छन्। 



भारतका पूर्व केन्द्रीय मन्त्री जसवन्त सिंहको निधन भएको छ । भारतीय जनता पार्टी (बीजेपी) का संस्थापक सदस्य सिंहको ८२ वर्षको उमेरमा निधन भएको हो। सिंहले अटल बिहारी वाजपेयी सरकारमा विदेश, रक्षा तथा वित्त मन्त्रालयको जिम्मेवारी सम्हालेका थिए। उनी भारतीय सेनामा मेजरसमेत भएका थिए ।  



अमेरिकी संघीय एक न्यायाधीशले अमेरिकी राष्ट्रपति डोनाल्ड ट्रम्पले भिडियो सेयरिङ एप्स टिकटक अमेरिकामा रोक लगाउने विवादास्पद आदेशको कार्यान्वयनलाई रोकिदिएका छन्। राष्ट्रपति ट्रम्पको आदेशअनुसार अमेरिकामा आइतबार रातिदेखि टिकटक डाउनलोड गर्न पाइने थिएन।\



अफगानिस्तानमा युद्धरत प्रमुख विद्रोही समूह तालिबानले संयुक्त राज्य अमेरिका र तालिबानबीच भएको सम्झौताका सर्तलाई स्वीकार्न अफगान सरकारले नचाहेको आरोप लगाएको छ। अन्तर-अफगान शान्तिवार्तामा तालिबानका तर्फबाट सहभागी वार्ताटोलीका सदस्य खैरुल्लाह खैरख्वाले आफूहरू संयुक्त राज्य अमेरिकासँग भएको सम्झौताबमोजिम अफगान सरकारसँग वार्तामा बसेको स्पष्ट गर्दै तर अफगान सरकार वार्ताप्रति गम्भीर नदेखिएको बताए।  



दक्षिण एसियाली देश श्रीलंकाले २१ कन्टेनर फोहनेर युरोपेली देश बेलायतमा पठाएको छ। भएको के रहेछ भने, बेलायतबाट आयात गरिएका सामानमा खतरनाक फोहाेर र अस्पतालका फोहाेरसमेत राखिएका सामान आफ्नो देशमा आएपछि श्रीलंकाले पुनः ती फोहाेरलाई बेलायत फिर्ता पठाएको हो।



आर्मेनियाका पृथकतावादीहरूले नागोर्नी काराबाख क्षेत्रमा सोमबार भएको संघर्षमा आफ्ना थप १५ जना लडाकु मारिएको जनाएका थिए। आर्मेनियाबाट अलग्गिएको घोषणा गरेका काराबाख क्षेत्रका पृथकतावादीतर्फ छिमेकी अजरबैजानी सेनाले गरेको कारबाहीमा हालसम्म ३९ जनाको ज्यान गइसकेको थियो। 



भारतको केन्द्रीय अनुसन्धान ब्युरो (सीबीआई) अन्तर्गत गठित विशेष अदालतले बुधबार २८ वर्षअघि अयोध्याको बाबरी मस्जिद भत्काइएको घटनासम्बन्धी मुद्दाका सबै ३२ अभियुक्तलाई सफाइ दिएको छ। लखनउमा अन्तिम फैसला सुनाउँदै अदालतले सत्तारूढ भारतीय जनता पार्टी (भाजपा) का वरिष्ठ नेताहरू लालकृष्ण आडवाणी, मुरलीमनोहर जोशीलगायतलाई ठोस प्रमाण नभएको भन्दै सफाइ दिएको हो।



अमेरिकाको आगामी नेतृत्वका लागि प्रतिस्पर्धामा उत्रिएका राष्ट्रपति डोनाल्ड ट्रम्प र जो बाइडेनले सार्वजनिक ‘डिबेट’मा पहिलोपटक एक–अर्काको सामना गरेका छन्। उनीहरूको यो डिबेटलाई इतिहासमै अराजक र तिक्ततापूर्ण भनिएको छ।



दुई दिनअघि उपचारका क्रममा मृत्यु भएकी भारतको उत्तरप्रदेश हाथरसकी दलित युवतीको परिवारलाई भेट्न हिँडेका विपक्षी भारतीय राष्ट्रिय कांग्रेसका नेता राहुल गान्धी र उनकी बहिनी प्रियंकालाई प्रहरीले नियन्त्रणमा लिएको छ । आफ्ना कार्यकर्तासहित यमुना एक्सप्रेसबाट दिल्लीबाट करिब दुई सय किलोमिटर दूरीमा रहेको हाथरसतर्फ जाँदै गर्दा बाटोमै प्रहरीले रोकेर नियन्त्रणमा लिएको हो । 



राष्ट्रिय जनता दलका नेता तथा बिहारका पूर्व उप-मुख्यमन्‍त्री तेजस्वी यादव र उनका दाइ एवं पूर्वमन्‍त्री तेजप्रताप यादवसहित ६ जना विरुद्ध हत्या आरोपमा मुद्दा दर्ता गराइएको छ ।

तेजस्वीसहित ६ जनामाथि पार्टीका एक पूर्वनेता शक्ति मलिकको हत्या आरोपसहित बिहारको पूर्णिया जिल्लामा प्राथमिकी (एफआईआर) दर्ता गराइएको जनाइएको छ । 



माल्दिभ्सका पूर्वउपराष्ट्रपति अहमद अदिबलाई भ्रष्टाचार, अवैध सम्पत्ति आर्जन र शक्तिको दुरुपयोग गरेको अभियोगमा २० वर्ष जेल सजाय सुनाइएको छ । माल्दिभ्सको उच्च अदालतले मंगलबार यस्तो सजाय सुनाएको अदालतका अधिकारीहरूले जानकारी गराएका हुन् ।



सयुक्तराज्य अमेरिका र उत्तर अफ्रिकी मुलुक मोरक्कोबीच १० वर्षे सैन्य सहयोग सम्झौता भएको छ । अमेरिकी रक्षामन्त्री मार्क एस्परले मोरक्कोको दुई दिने भ्रमणका क्रममा सैन्य सहयोगसम्बन्धी सम्झौता पत्रमा हस्ताक्षर गरेका हुन् ।

उत्तर अफ्रिकी मुलुकहरू भ्रमणकै क्रममा मन्त्री एस्परले ट्युनिसियासँग पनि यस्तै सैन्य सम्झौता गरेका थिए ।



भारतको प्रमुख प्रतिपक्षी दल भारतीय राष्ट्रिय कंग्रेसका निवर्तमान अध्यक्ष राहुल गान्धी र महासचिव प्रियंका गान्धीसहित झन्डै दुई सयजनाविरुद्ध मुद्दा लगाइएको छ ।

भारतीय दण्डसंहिता उल्लंघन गरेको आरोप लगाउँदै उनीहरूविरुद्ध मुद्दा दायर गरिएको सरकारी अधिकारीहरूले जानकारी दिएका छन् । गौतमबुद्ध नगर प्रहरीले गान्धीद्वय र अरू दुई सयजनाले दण्डसंहिताको धारा १८८, २६९ र २७० को उल्लंघन गरेको दाबी गरेको छ ।



अमेरिकी विदेशमन्त्री माइक पोम्मपेओ चीनविरुद्धको रणनीति बनाउनका लागि जापान पुगेका छन् । उनले जापानमा अस्ट्रेलिया, भारत र जापानका विदेशमन्त्रीहरुसँग छलफल गर्ने भएका छन् । 

चीनको आक्रामक व्यवहारविरुद्ध चार मुलुकहरुको 'क्‍वाड बैठक' लक्षित हुने बीबीसीले जनाएको छ ।



अफगास्तिानको सार ए साफा जिल्लाको एक प्रहरी चौकीमा यहाँका तालिबानी लडाकूहरूले गरेका कारबाहीमा परी कम्तीमा पनि छ जना प्रहरी र चार अफगान सेनाको ज्यान गएको छ ।

अफगानिस्तानका विभिन्न स्थानमा गरेका आक्रमणमा परी ती सुरक्षाकर्मीहरु मारिएका टोलो न्युजले जानकारी दिएको छ ।



फिनिस प्रधानमन्त्री सन्ना मरिनले एक दिनका लागि १६ वर्षिया किशोरीलाई आफ्नो पद हस्तान्तरण गरेकी छन्। 

सन्ना मरिनले बुधबारका लागि १६ वर्षिया आभा मुर्तोलाई प्रधानमन्त्री बनाएकी हन्। तर उनलाई कार्यकारी अधिकार भने छैन। संयुक्त राष्ट्रसंघको बालिका दिवसको अवसरमा ‘च्यारिटी’ का लागि यो गरिएको हो। 



भिडियो सेयर गर्ने युट्युब प्लेटफर्मले नयाँ सुविधा परीक्षण गर्ने घोषणा गरेको छ । एक्सडिए–डेभलपर्सका अनुसार परीक्षणका रूपमा यो सुविधा विशिष्ट (प्रिमियम) ग्राहकलाई मात्र उपलब्ध हुनेछ । 

केही छानिएका गुगल प्रयोगकर्ताले यी सुविधा परीक्षण गरिसकेको दि भर्जले जनाएको छ । प्रिमियम ग्राहकले युट्युब प्रयोग गर्दा भिडियो, आवाज, आवाजमार्फत खोजी र अन्य भाषासम्बन्धी फिल्टरहरू प्रयोग गर्न पाउनेछन् । 



नेपालीहरूका लागि रोजगारीका लागि आकर्षक गन्तव्य मानिने मुलुक दक्षिण कोरियामा १५ लाख बढी मजदुरले आफूले काम गरेवापत पाउनुपर्ने तलब रोजगारदाताबाट पाउन नसकेको तथ्यांक सार्वजनिक भएको छ ।

यहाँको श्रम मन्त्रालयको तथ्यांकअनुसार सन् २०१६ देखि २०१९ सम्म १५ लाखभन्दा धेरै कामदारले नपाएको कुल तलब रकम ७‍.१७ ट्रिलियन बाेन पुगेको छ ।



बिहारका पूर्वमुख्यमन्त्री एवं भारतीय राजनीतिका चर्चित नेता लालुप्रसाद यादवलाई झारखण्ड उच्च अदालतले शुक्रबार एउटा मुद्दामा जमानत दिएको छ । 

चारा घोटालासँग सम्बन्धित एउटा मुद्दामा उनलाई जमानत दिएको अदालतले जनाएको छ ।



अमेरिकी राष्ट्रपति डोनाल्ड ट्रम्पले अफगानिस्तानमा तैनाथ अमेरिकी सेना क्रिसमसअघि नै स्वदेश फर्काइने बताएका छन् । ‘अफगानिस्तानमा कार्यरत अमेरिकी बहादुर सेनाहरू अब सानो संख्यामा त्यहाँ रहेका र तिनीहरूलाई पनि आगामी क्रिसमस पहिले फिर्ता गरिनुपर्छ,’ सामाजिक सञ्जाल ट्वीटरमा ट्रम्पले लेखेका छन् ।



भारतको राजधानी नयाँदिल्ली छेउको नोयडामा बाह्र वर्षअघि भएको आरुषी–हेमराज हत्या प्रकरणमा नेपालीहरुलाई निर्दोष ठहर गर्दै छानबिनलाई नयाँ मोड दिने भारतको केन्द्रीय अनुसन्धान ब्यूरो (सीबीआई) का तत्कालीन प्रमुख अश्विनी कुमार बुधबार साँझ हिमाचलको राजधानी, सिमलास्थित आफ्नै निवासमा मृत अवस्थामा भेटिएका छन् । भारतीय सञ्चारमाध्यमहरुका अनुसार उनले ‘आत्महत्या’ गरेको आंशका गरिएको छ । 



पार्टनर भिसामा अस्ट्रेलिया जान र स्थायी बसोवास गर्न चाहनेले अनिवार्य अंग्रेजी भाषा परीक्षा उत्तीर्ण गर्नुपर्ने भएको छ । 

विदेशबाट अस्ट्रेलिया पार्टनर याने कि अस्ट्रेलियामा रहेका आफ्ना पति वा पत्नीका आधारमा श्रीमान् वा श्रीमतीले अनिवार्य रूपमा अंग्रेजी परीक्षा दिएर उत्तीर्ण भएपछि मात्र स्थायी बसोवासको भिसा पाइने व्यवस्था गरिएको बिबिसीले जनाएको छ । 



एक बेल्जियमी घुमन्तेलाई गैरकाननी काममा लगाएर मृत्यु भएको मुद्दामा एक अस्ट्रेलियाली रोजगारदाता दोषी ठहरिएका छन् ।

ती मृत्यु भएका बेल्जियमी घुमन्तेलाई अस्ट्रेलियाको एक कृषि उद्योगले फलफूल टिप्ने काममा लगाएको थियो । त्यस क्रममा उनको मृत्यु भएको थियो ।



गत सातादेखि द्वन्द्वग्रस्त बनेको नागोर्नो-काराबख विवादित क्षेत्रको विषयमा वार्ता गर्न अर्मेनिया-अजरबैजना सहमत भएको रुसले जनाएको छ । रुसले शुक्रबार दुबै मुलुकहरुले वार्ताका लागि इच्छा जनाएका छन् । 

रुसले यसलाई 'पछिल्लो तनाव अन्त्यका लागि एक ठूलो कदम भएको' बताएको छ । अजरबैजनाले मस्कोमा हुने वार्ताका लागि परराष्ट्रमन्त्री जेहुन बेरामोभ सहभागी हुने बताएको छ ।



भारतपछि पाकिस्तानले पनि टिकटकमा प्रतिबन्ध लगाएको छ । पाकिस्तानको दूरसञ्चार प्राधिकरणले शुक्रबार चिनियाँ भिडियो सेयरिङ एप टिकटकमाथि प्रतिबन्ध लगाएको हो । 

टिकटकले अनैतिक र अश्लील सामग्रीलाई फिल्टर गर्न नसकेको भन्दै प्रतिबन्ध लगाएको प्राधिकरणले जनाएको छ ।



अफगानिस्तानमा तालिबानी लडाकुहरूले अफगान सेनालाई लक्ष्य गरेर राखेको बम विस्फोट हुँदा कम्तीमा पनि १० जना अफगान सेना मारिएका छन् । आक्रमणमा परी अरू केही सेना घाइते भएका छन् भने तीनजना सर्वसाधारण मारिएका छन् ।



अमेरिकाको राष्ट्रिय सुरक्षा सल्लाहकार रोबर्ट ओब्रायनले वार्ताका माध्यमबाट चिनियाँ कम्युनिस्ट सरकारले अंगीकार गरेको बाटो परिवर्तनका लागि मनाउन र बाध्य पार्न नसकिने समय आइसकेको बताएका छन् ।

भारत-चीन सीमा विवादबारे प्रतिक्रिया दिँदै अमेरिकी राष्ट्रिय सुरक्षा सल्लाहकार ओब्रायनले वार्ता वा आपसी सहमतिका माध्यमबाट चीनले अंगीकार गरेको बाटो परिवर्तनका लागि मनाउन र बाध्य पार्न नसकिने समय आइसकेको बताएका हुन् ।



पाँच वर्षभित्रमा ५ करोडभन्दा बढी ग्रामीण क्षेत्रका जनता गरिबीबाट पूर्णतः मुक्त भएको चीनले दाबी गरेको छ । चीनको तेह्रौं पञ्चवर्षीय योजना (सन् २०१६-२०२०) भित्रमा यति ठूलो उपलब्धी हात लागेको आइतबार चिनियाँ सञ्चारमाध्यमहरूले जनाएका छन् ।



अल्फाबेट इंक गुगलले संयुक्त राज्य अमेरिकामा मतदाताहरुलाई आफ्नो नजिकको मतदान केन्द्र पत्ता लगाउन सजिलोका लागि नयाँ फिचर ल्याएको छ । आगामी नोभेम्बरमा हुने राष्ट्रपति निर्वाचनका लागि मतदाताहरुलाई आफ्नो नजिकको मतदान स्थल पत्ता लगाउन सजिलोका लागि गुगलले आफ्नो सर्च इञ्‍जिन, नक्सा र भ्वाइसमा नयाँ फिचर ल्याएको जनाएको हो।



पाकिस्तानका प्रधानमन्त्री इमरान खानको सरकार विरूद्ध पाकिस्तानका विपक्षी दलहरू यतिबेला एकजुट भएका छन्।आफू विरूद्ध एकजुट भएका विपक्षी दलहरूको एकतालाई इमरान खानले 'डाँकुहरूको एकता' बताएका छन्।

असोज ५ गते पाकिस्तानका पत्रकार सम्मेलन गर्दै विपक्षी दलहरूले गठबन्धनको घोषणा गर्दै इमरानको राजीनामा माग गर्दै उनीविरूद्ध आन्दोलन गर्ने घोषणा गरेका थिए। 



अमेरिकाका उच्च सरकारी वैज्ञानिक तथा सरुवा रोग विशेषज्ञ डा. एन्थोनी फाउचीले आफूले फरक सन्दर्भमा बोलेको कुरालाई गलत सन्देश जाने गरी सम्पादन गरी राष्ट्रपति डोनाल्ड ट्रम्पको चुनावी अभियानमा प्रयोग भएको बताएका छन् ।

ट्रम्पको चुनावी अभियानले बनाएको ३९ सेकेण्डको विज्ञापनमा डा. फाउचीले ‘अरु कसैले यति राम्रो गरेको कल्पना गर्न सक्दिन’ भन्दै गरेको सुनिन्छ र सो कुरा कोरोना भाइरसविरुद्धको अभियानमा ट्रम्पका लागि लागु हुने गरी प्रयोग भएको छ ।



लिबियामा अपहरणमा परेका सातजना भारतीय नागरिक २७ दिनपछि अपहरणमुक्त भएका छन् । ट्युनिसियाका लागि भारतीय राजदूतका अनुसार अपहरणमा परेका उनीहरूलाई अपहरणकारीले आइतबार मुक्त गरिदिएका हुन् । 

उनीहरू लिबियाको आसेरिफ भन्ने ठाउँबाट गत १४ सेप्टेम्बरमा अपहरणमा परेका थिए । उनीहरू भारतको आन्ध्र प्रदेश, बिहार, गुजरात र उत्तर प्रदेशका नागरिक भएको उनले जानकारी दिए ।



अमेरीकी निर्वाचनमा बेलायतले अग्रपंक्तिमा रहेका ठानिएका बाइडेनलाई समर्थन गर्ने समाचार प्रकाशमा आएको छ । प्रधानमन्त्री बोरिस जोन्सन समूहले ट्रम्प पुनः निर्वाचित हुने सम्भावना न्यून भएपछि बाइडेनलाई पछ्याउन सुरु गरेको बेलायती अखबार डेली मेलले दाबी गरेको छ ।



बंगलादेशमा बलात्कारीलाई मृत्युदण्डको सजाय हुने गरी कानुन संशोधन गरिएको छ । लामो समयको विरोध प्रदर्शनपछि सरकार कानुन संशोधन गर्न बाध्य भएको हो । गत साता एउटी महिलाको सामूहिक बलात्कार गरिएको भिडियो सामाजिक सञ्जालमा भाइरल भएपछि देशव्यापी विरोध प्रदर्शन शुरु भएको थियो ।



बलिउड अभिनेता सुशान्त सिंह राजपुतको मृत्यु प्रकरणमा ‘गैर जिम्मेवार रिपोर्टिङ’ गरेको दाबी गर्दै केही मिडिया प्रतिष्ठानविरुद्ध दिल्ली हाइ-कोर्टमा मुद्दा दायर भएको छ ।

फिल्म उद्योगको प्रतिनिधित्व गर्ने चार संगठन र ३४ निर्माताहरुले केही मिडिया प्रतिष्ठानविरुद्ध मुद्दा दायर गरेका हुन् ।



अमेरिकी राष्ट्रपति डोनाल्ड ट्रम्प करिब दुई सातापछि चुनावी सार्वजनिक कार्यक्रममा फेरि सहभागी हुन थालेका छन् । कोराेना संक्रमण पुष्टि भएपछि उनी केही दिन अस्पताल र केही दिन राष्ट्रपतिनिवासमा रहेका थिए । सार्वजनिक कार्यक्रममा सहभागी भएका थिएनन् ।



जम्मू–कश्मीरकी पूर्व मुख्यमन्त्री तथा पिपल्स डेमोक्रेटिक पार्टी(पीडीपी) की अध्यक्ष महबूबा मुफ्ती रिहा भएकी छिन्। करिब १४ महिनाको हिरासतपछि जम्मू–कश्मीर प्रशासनले उनलाई मंगलबार रिहा गरेको हो।



थाइल्यान्डमा प्रधानमन्त्रीको राजीनामा तथा नयाँ संविधानको माग गर्दै बुधबार दसौं हजारले प्रदर्शन गरेका छन् । राजधानी बैंककमा भेला भएका प्रदर्शनकारीले राजाको अधिकार कटौतीको मागसमेत जोडदार रूपमा उठाएका छन् ।

 राजधानी बैंककमा नै राजाविरोधी नारा लागेपछि सरकारले देशभर संकटकाल घोषणा गरेको छ। 



अफगानिस्तानको हेलमन्द प्रान्तमा सरकारी सैन्यबल र तालिवान विद्रोहीबीच तीन दिनयता जारी भीषण लडाइँका कारण कम्तीमा ३५ हजार स्थानीय विस्थापित भएका छन् । गत महिना अफगान सरकार र तालिवानबीच सुरु भएको शान्ति वार्तापछि दुवै पक्षबीच पहिलो पटक भीषण लडाइँ भएको हो । दुवै पक्षबीच कतारको राजधानी दोहामा वार्ता जारी छ ।



 चीनको तिब्बत स्वशासित क्षेत्र अब अति गरिबीबाट मुक्त भएको छ । तिब्बतमा कूल ७४ वटा अति गरिबीग्रस्त जिल्लाहरू रहेकोमा अब ती स्तरोन्नति भएका बिहीबार त्यहाँ आयोजित पत्रकार सम्मेलनमा जानकारी गराइएको छ ।



दक्षिण भारतमा परेको मुसलधारे वर्षा र बाढीका कारण कम्तीमा ३० जनाको मृत्यु भएको भारतीय अधिकारीले जानकारी गराएका छन् । भारतका ठूला प्रविधि कम्पनीहरूको केन्द्र सहर हैदराबादमा वर्षाका कारण बाढी तथा डुबान भई एउटा पर्खाल भत्किँदा कम्तीमा नौजना र १० जना अन्य व्यक्तिको करेन्ट लागेर मृत्यु भएको स्थानीय अधिकारीले बताए ।  



पूर्वराष्ट्रपति बाराक ओबामाले बुधबार अमेरिकी विदेश नीतिमा उल्लेखनीय सुधार एवम् परिवर्तन ल्याउन राष्ट्रपति ट्रम्पसँग आवश्यक फोकस अनि धैर्यता नै नभएको बताएका हुन् । डेमोक्रेटका उमेदवार जो बाइडेनसँग चुनाव प्रचारको अन्तिम कार्यक्रममा सहभागी हुने तयारी गरिरहेका ओबामाले आफ्नै राष्ट्रपति कालको समीक्षा गर्नुका साथै पार्टीलाई अझ प्रगतिशील बनाउन केही सुझावहरु पनि दिएका हुन् । 



नरेन्द्र मोदीको शासनकालमा राष्ट्रका मुद्दाहरुमा बहस गर्ने थलोका रुपमा संसद रहेन ? अंग्रेजी अखबार इन्डियन एक्सप्रेसमा प्रकाशित समाचारअनुसार पछिल्ला ६ वर्षमा मोदीले संसदमा मात्र २२ पटक बोलेका छन् ।

क्रिस्टफ जाफरलु र विहांग जुमलेको संयुक्त बाइलाइनमा प्रकाशित लेखमा मोदी सरकार संसदलाई नजरअन्दाज गरिरहेको उल्लेख छ । लेखका अनुसार एचडी देवगौडा मात्र दुई वर्षका लागि प्रधानमन्त्री भएका थिए, उनले पनि संसदमा मोदीभन्दा बढी पटक बोलेका थिए ।



 नेपालको सीमावर्ती भारतको राज्य बिहारमा यतिबेला चुनावी सरगर्मी निकै बढेको छ । भारतको केन्द्रीय चुनाव आयोगले सेप्टेम्बर २५ मा राज्यमा विधानसभा चुनावको घोषणा गरेसँगै चुनावी माहोल तातेको हो । आयोगले बिहारको २४३ विधान सिटका लागि अक्टोबर २८, नोभेम्बर ३ र ७ का लागि मतदानको मिति तय गरिसकेको छ ।


सम्बन्धित सामग्री

संसदलाई कोरोना खोप : योगेश र ईश्वर पोख्रेलको भेट, तर एक अर्कासँग बोल्दै बोलेनन्!

प्रतिनिधिसभाको बैठक नजिकिँदै गर्दा संसद् सचिवालयले सांसदहरूलाई कोरोनाविरुद्धको ‘कोभिसिल्ड भ्याक्सिन’ लगाइदिन सुरु गरेको छ । जहाँ एउटा रमाइलो दृश्य देखियो, नेकपा प्रचण्ड नेपाल खेमाका नेता योगेश भट्टराई र बहालवाला उपप्रधानमन्त्री ईश्वर पोख्रेलबीचको भेट। तर २० मिनेटको अवधि दुवै एक-अर्कासँग बोलेनन्।

छोटकरी सम्पादक

प्रतिनिधि सभा बैठकको सम्पूर्ण तयारी पूरा, ओली र प्रचण्ड समूह आमुनेसामुने हुँदै

पुस ५ गते विघटन भएको प्रतिनिधि सभाको बैठक फागुन २३ गते आइतबार बस्दैछ । पुस ५ गतेदेखि नै आमने सामने हुन नसकेका नेकपाका दुई अध्यक्षद्वय केपी शर्मा ओली र पुष्पकमल दाहाल आइतबार नै संसद् सचिवालयमा आमने सामने हुने देखिएको छ । त्यो दृश्य कस्तो हुनेछ, आउनुहोस् जानौं ।

छोटकरी सम्पादक

यी हुन् नेकपा प्रचण्ड–माधव समूहको केन्द्रीय कमिटी बैठकका निर्णय

नेपाल कम्युनिष्ट पार्टी(नेकपा) प्रचण्ड–माधव समूहको केन्द्रीय कमिटी बैठकले स्थायी कमिटी सदस्य सुवासचन्द्र नेम्वाङसहित ७ जनालाई कारबाही गरेको छ। बैठकले ओलीलले राजीनामा नदिएकोमा निन्दा समेत गरेको छ। थप केके निर्णय भए, आउनुहोस् जानौं।

छोटकरी सम्पादक

पेट्रोलियममा मूल्यवृद्धिविरुद्ध विद्यार्थीहरूको प्रदर्शन

पेट्रोलियममा गरिएको मूल्यवृद्धिविरुद्ध विद्यार्थीहरूले नेपाल आयल निगमअगाडि प्रदर्शन गरेका छन् । विद्यार्थीहरूले बढाइएको मूल्य तत्काल फिर्ता लिन सरकारसँग माग गरेका छन् । पेट्रोल, डिजेल र मट्टीतेलमा प्रतिलिटर दुई रुपैयाँका दरले बढाइएको छ ।

छोटकरी सम्पादक

‘जनकपुर साहित्य महोत्सव’ सुरु हुँदै

जनकपुरधामको ऐतिहासिकता पौराणिकतालाई प्रचारप्रसार गर्ने उद्देश्यले ४ दिवसीय (फागुन १९ देखि फागुन २२ सम्म) जनकपुर साहित्य महोत्सवको आयोजना हुन भएको छ। के-कस्ता सेसनहरू रहनेछन् ? को-को रहनेछन् वक्ताहरू ? आउनुहोस्, जानौं ।

छोटकरी सम्पादक

सल्यानटारमा डोजरको ठक्करबाट महिलाको मृत्यु, स्थानीयले गरे डोजरमा आगजनी

धादिङको त्रिपुरासुन्दरी गाउँपालिका- १ सल्यानटार खोल्सी नजिक डोजरले ठक्करबाट एक महिलाको मृत्यु भएको छ। घटनास्थलमा रहेका स्थानीय बासीन्दाका अनुसार डोजरको ठक्करपछि घाइते भएकी महिलालाइ जिउदै अवस्थामा डोजरले माटो खनेर पुरिदिएको भन्दै डोजरमाथि आगजानी गरेका छन्।

छोटकरी सम्पादक