असोज महिनाभित्र विश्वभर कोरोना महामारीका कारण के-कस्ता प्रभावहरू देखिए ? कुन-कुन उच्च पदस्थ राजनीतिक व्यक्तिहरू तथा सिने जगतका हस्तीहरू कोरोनाको चपेटमा आए ?समग्रमा महिनाभर कोरोनाले वैश्विक जगतमा के-कति क्षति पुर्यायो ? सम्पूर्ण खबरहरू एकसाथ यहाँ पढ्नुहोस् ।
कोरोना वस्तुस्थिति :
पहिलो हप्ता :
असोज ०३ गतेसम्म ३,१०,०८,४२४ जनामा देखिएको कोरोना भाइरस बढेर असोज ११ गते ३,३१,८४,७८४ पुगेको थियो।
असोज ०३ गतेसम्म कोरोना भाइरसका कारण ९,६१,७३३ जनाको मृत्यु भएकोमा असोज ११ गते १०,००,३६७ पुगेको थियो ।
असोज ११ गतेसम्म विश्वमा २४,५०८,१५८ जना कोरोना संक्रमित निको भइ घर फर्किएका थिए ।
दोस्रो हप्ता :
असोज ११ गतेसम्म ३,३१,८४,७८४ जनामा देखिएको कोरोना भाइरस बढेर असोज १८ गते ३,५२,३०,७४६ पुगेको छ।
असोज ११ गतेसम्म कोरोना भाइरसका कारण १०,००,३६७ जनाको मृत्यु भएकोमा असोज १८ गते १०,३९,३२७ पुगेको छ।
असोज १८ गतेसम्म विश्वमा २,६२,१०,८९६ जना कोरोना संक्रमित निको भइ घर फर्किएका थिए।
तेसो हप्ता :
असोज १८ गतेसम्म ३,५२,३०,७४६ जनामा देखिएको कोरोना भाइरस बढेर असोज २५ गते ३,७५,७६,१६३ पुगेको थियो।
असोज १८ गतेसम्म कोरोना भाइरसका कारण १०,३९,३२७ जनाको मृत्यु भएकोमा असोज २५ गते १०,७८,८३२ पुगेको थियो।
असोज १८ गतेसम्म २,६२,१०,८९६ जना कोरोना संक्रमित निको भइ घर फर्किएका थिए भने त्यो संख्या बढेर असोज २५ गते २,८१,८१,२९५ पुगेको थियो।
चौथो हप्ता :
असोज २५ गतेसम्म ३,७५,७६,१६३ जनामा देखिएको कोरोना भाइरस बढेर कार्तिक ०१ गतेसम्म ३,९७,०७,०४९ पुगेको थियो।
असोज २५ गतेसम्म कोरोना भाइरसका कारण १०,७८,८३२ जनाको मृत्यु भएकोमा कार्तिक ०१ गतेसम्म ११,१०,८१० पुगेको थियो।
असोज २५ गतेसम्म २,८१,८१,२९५ जना कोरोना संक्रमित निको भइ घर फर्किएका थिए भने त्यो संख्या बढेर कार्तिक ०१ गते २,९७,१९,३०६ पुगेको थियो।
कोरोना भाइरस (कोभिड–१९) को संक्रमण रोकथामका लागि बेलायत सरकार थप कठोर देखिएको छ। भाइरस संक्रमितले सेल्फ आइसोलेसन बस्नैपर्ने बाध्यकारी नियम उल्लंघन गरे सरकारले १० हजार पाउन्ड (करिब १५ लाख रुपैयाँ) सम्म जरिवाना तिराउने भएको हो।
बेलायत फेरि कोरोना भाइरस (कोभिड–१९) को ‘हटस्पट’ बन्ने देखिएको छ। भाइरसको संक्रमणबाट युरोपकै सबैभन्दा बढी प्रभावित बेलायतले पहिलो संकट सामना गर्न नभ्याउँदै दोस्रो लहरको अनुभवसमेत गरेको छ। सरकारका प्रमुख वैज्ञानिक सल्लाहकार सर प्याट्रिक भ्यालेन्सले अहिले नै कोरोना भाइरस संक्रमण रोक्ने प्रयास नगरिए अक्टोबर मध्यसम्म दैनिक ५० हजार संक्रमित हुने चेतावनी दिएका छन्।
भारतमा कोरोना भाइरस संक्रमित बढिरहे पनि उत्तर प्रदेशको आग्रास्थित ताजमहल र केही विद्यालय स्थानीय प्रशासनले खुला गरेको छ। गत मार्च महिनामा सरकारले गरेको कडा लकडाउनसँगै पर्यटकीय स्थल ताजमहल पनि बन्द भएको थियो।
अमेरिकी राष्ट्रपति डोनाल्ड ट्रम्पले ‘कोरोना भाइरस (कोभिड–१९) फैलिनुमा चीन जिम्मेवार रहेको’ बताएपछि राष्ट्रसंघीय महासभामा दुई देशबीचको तनाव थप चर्केको छ। ट्रम्पले भाइरसको महामारी फैलिएको विषयमा चीनलाई जवाफदेही बनाउनुपर्ने बताएका छन्। त्यसको प्रतिक्रियामा चिनियाँ राष्ट्रपति सी चिनफिङले ‘कुनै पनि देशसँग शीतयुद्ध गर्ने चीनको नियत नरहेको’ बताएका छन्।
भारतका केन्द्रीय रेल राज्यमन्त्री सुरेश चनाबसप्पा अंगडीको कोरोना भाइरसको संक्रमणबाट निधन भएको छ। ६५ वर्षीय अंगडीको भारतको राजधानी नयाँदिल्लीस्थित अल इण्डिया इन्स्टिच्युट अफ साइन्स् (एम्स्) मा उपचारका क्रममा बुधबार साँझ निधन भएको हो।
सन् २०१९ को अन्त्यतिर देखा परेको कोरोना महामारीका कारण आ-आफ्नो देशमा फर्किएका विदेशीहरू झण्डै ४ महिनापछि चीन फर्कन पाउने भएका छन्। चीनको परराष्ट्र मन्त्रालय तथा राष्ट्रिय अध्यागमन प्रशासनले बुधबार एउटा सूचना निकालेर प्रक्रिया पुगेका विदेशीहरूलाई पुनः चीन फर्किन सक्ने जनाएको हो।
कोरोना भाइरसविरुद्धको खोप उत्पादन गरिरहको चिनियाँ कम्पनी सिनोभ्याक बायोटेकले यस वर्षको अन्तिम चरणको मानव परीक्षणको विश्लेषण यही वर्षभित्र सम्पन्न गर्ने अपेक्षा गरिएको छ। यो खोप प्रभावकारी छ भए-नभएको विश्लेषण गरी नियमनकारी निकायबाट यही वर्षभित्र स्वीकृत लिइसक्ने सिनोभ्याकले जनाएको छ।
भारतीय गायक एसपी बालासुब्रमण्यमको ७४ वर्षको उमेरमा निधन भएको छ। कोरोना भाइरस संक्रमणका कारण उनको आज दिउँसो चेन्नईमा निधन भएको हो। उनी अगस्टको पहिलो साता अस्पताल भर्ना भएका थिए।
राष्ट्रिय दिवस तथा मध्य शरद पर्वको अवधिमा लगातार ८ दिन लामो बिदा नजिकिँदै गर्दा चीनले आफ्नो सुरक्षा आफै गर्न सर्वसाधारणसमक्ष अपिल गरेको छ।बिदाका बेला पर्यटन क्षेत्र चलायमान हुने पूर्वसन्ध्यामा चीनले यस्तो सूचना जारी गरेको हो । चीनमा कोरोना भाइरसको महामारी लगभग शून्यमा झरे पनि उच्च सतर्कताका लागि ध्यानाकर्षण गराइएको छ।
खोप आइसकेपछि पनि कोरोना भाइरसका कारण विश्वव्यापी मृत्यु हुनेको सङ्ख्या २० लाख पुग्ने प्रबल सम्भावना रहेको विश्व स्वास्थ्य संगठन (डब्लूएचओ)ले चेतावनी दिएको छ । खोप निर्माण भएपनि त्यसलाई सर्वत्र रुपमा उपलब्ध गराउन र यसको व्यापक प्रयोग हुन समय लाग्न सक्ने हुँदा मृतकको तथ्याङ्क सोचेभन्दा अझ बढी हुन सक्ने डब्लूएचओका आपत्कालीन प्रमुख डाक्टर माइक रायनले बताएका हुन् ।
कोरोना महामारीका कारण पेरूको स्वास्थ्य प्रणाली नै जोखिममा रहेको स्वास्थ्यमन्त्री पिलार मज्जेतीले चेतावनी दिएका छन्। पहिलो लहरको कोरोना संक्रमण केही साम्य हुने क्रममा रहेको छ। तर, १ अक्टोबरदेखि पेरूमा सामाजिक तथा आर्थिक गतिविधि सुरु भएसँगै प्रकोपको दोस्रो लहरको जोखिम बढेको उनले स्थानीय सञ्चारमाध्यमहरूमा बताएका छन्।
कोरोना महामारीका कारण बन्द भएका पाकिस्तानका सबै शैक्षिक संस्था सुचारु हुन थालेका छन्। सरकारी अधिकारीहरूले झन्डै ६ महिनापछि बुधबारदेखि सबै शैक्षिक संस्था सञ्चालन गर्न थालिएको जानकारी दिएका छन्।
भारतका उपराष्ट्रपति वेंकैया नायडूलाई कोरोना भाइरसको संक्रमण देखिएको छ। उपराष्ट्रपति नायडूको आधिकारिक ट्विटर ह्याण्डलबाट मंगलबार साँझ नायडूलाई संक्रमण भएको जानकारी दिइएको थियो।
इजरायली प्रधानमन्त्री बेन्जामिन नेतान्याहुले कोभिड– १९ का कारण जारी लकडाउन हट्न अझै ६ महिनादेखि एक वर्षसम्म लाग्न सक्ने बताएका छन् । ‘यो लकडाउनबाट बिस्तारै र क्रमिक रूपमा इजरायल मुक्त हुनेछ र यो आधा वर्षदेखि एक वर्षसम्म रहन सक्छ,’ उनले बुधबार मन्त्रिपरिषद्को बैठकमा भने ।
अमेरिकी कम्पनी मोडेर्नाको खोप सम्बन्धी गरिएको प्रारम्भिक सुरक्षा परीक्षणमा यसले बढी उमेरका सहभागीमा पनि युवामा जत्तिकै भाइरसलाई निर्मुल बनाउने एन्टिबडिज उत्पादन गर्न सक्ने देखिएको छ । यसको साइड इफेक्ट उच्च डोजमा फ्लुको सुइ जस्तै हुने अनुसन्धानकर्ताहरुले जानकारी गराएका छन् ।
कोरोनाका कारण मार्चबाट बन्द रहेका स्कुल तथा कलेज खोल्न भारतको केन्द्र सरकारले अनुमति दिएको छ । अनलक—५ अन्तरगत केन्द्र सरकारले लकडाउन थप खुकुलो गर्दै स्कुलक तथा कलेज यही अक्टुबर १५ बाट खोल्ने अनुमति दिएको हो ।\
अमेरिकी राष्ट्रपति डोनाल्ड ट्रम्प र प्रथम महिला मेलानिया ट्रम्पलाई कोरोना संक्रमण देखिएको छ । शुक्रबार बिहान ट्वीट गर्दै राष्ट्रपति ट्रम्पले आफू र पत्नी मेलानियालाई कोरोना भएको जानकारी दिएका हुन् ।
महामारीपछिको पहिलो प्रमुख चाडका लागि चीनमा आठ दिनको देशव्यापी बिदा सुरु भएसँगै यतिबेला लाखौँको सङ्ख्यामा मानिसहरु एकैपटक घुम्न निस्किएका छन् । कोभिड–१९ पूर्ण नियन्त्रणमा आइसकेको दाबी गर्ने चीनका लागि आर्थिक गतिविधि बढाउन यो अति अपेक्षित समय भएको बताइएको छ ।
कोरोना संक्रमणको उपचारका क्रममा रहेका अमेरिकी राष्ट्रपति डोनाल्ड ट्रम्प आइतबार समर्थकलाई अभिभावदन गर्न एकाएक अस्पतालबाट निस्किएपछि उनको आलोचना भइरहेको छ ।
शुक्रबार कोरोना संक्रमण देखिएपछि उपचारका लागि अस्पताल पुगेका राष्ट्रपति ट्रम्पले आइतबार अस्पतालबाट निस्किएर आफ्ना समर्थकहरुलाई हात हल्लाउँदै अभिवादन गरेका थिए ।
कोभिड–१९ को महामारीका कारण लामो समयदेखि बन्द रहेका भारतको राजधानी नयाँ दिल्लीका विद्यालयहरू यस महिनाको अन्त्यसम्म बन्द रहने दिल्लीका उपमुख्यमन्त्री मनीष सिसोडियाले आइतबार बताएका छन् । यो घोषणा भारतमा शैक्षिक संस्थाहरूलाई सोमबारदेखि आंशिक भएपनि खोल्ने भनी गरिएका हल्ला र अनुमानबीच आएको हो । यस पहिलेको निर्देशनमा महामारीका कारण नयाँ दिल्लीमा विद्यालयहरूलाई अक्टोबर ५सम्म बन्द गर्ने उल्लेख गरिएको थियो ।
कोरोना भाइरस महामारी फैलिएको भए पनि मानिसहरूलाई बच्चा जन्माउन प्रोत्साहित गर्न सिंगापुर सरकारले एक पटकका लागि भत्ता दिने प्रस्ताव गरेको छ ।
आर्थिक संघर्ष गर्नुपर्ने र जागिर गुमाउने नागरिकहरूले सन्तान पाउने योजना स्थगित गरिरहेकोमा सरकारलाई चिन्तित बनाएको छ ।
अमेरिकी राष्ट्रपति डोनाल्ड ट्रम्प कोरोना भाइरसबाट संक्रमित भएपछि उपचाररत् अवस्थामा रहेकै बेला नाटकीय रुपमा ह्वाइटहाउस फर्किएका छन् । यति मात्र नभएर उनले ह्वाइटहाउस पुग्नासाथै बाल्कोनीमा फोटो खिचाउनका लागि मास्क खोलेर सबैलाई हात हल्लाएर अभिवादन गरेका छन् । जहाँबाट उनले सबैलाई अभिवादन गरे यतिखेर त्यहाँका थुप्रै कर्मचारी कोरोना पोजेटिभ भेटिएका छन् ।
न्युजिल्यान्डकी प्रधानमन्त्री जेसिन्डा आर्डर्नले न्युजिल्यान्डले कोरोना भाइरसलाई फेरि पनि परास्त गरेको बताएकी छन् । नियमित पत्रकार सम्मेलनमा प्रधानमन्त्री आर्डर्नले अकल्यान्ड सहरमा निषेधाज्ञाहरू खुकुलो बनाइएको घोषणासमेत गरिन् ।
विश्व स्वास्थ्य संगठन(डब्लूएचओ) ले विश्वमा हरेक १० व्यक्तिमध्ये एक जना कोरोना भाइरसबाट संक्रमित हुन सक्ने बताएको छ । सोमबार डब्लूएचओको मुख्यालय जेनेभामा आयोजित डब्लूएचओको कार्यकारी बोर्डको मिटिङमा डब्लूएचओका आपत्कालीन कार्यक्रमका प्रमुख डाक्टर माइक ऱ्यानले ‘विश्वको ठूलो हिस्सा’ कोरोना संक्रमणको जोखिममा रहेको बताएका हुन् ।
अमेरिकी राष्ट्रपतिका लागि डेमोक्रेटिक उमेदवार जो बाइडेनले राष्ट्रपति ट्र्म्प कोरोना संक्रमित भइरहे आगामी डिबेट हुननसक्ने बताएका छन् ।
बाइडेनले मंगलबार भने, "मलाई लाग्छ, यदि उहाँलाई कोरोना संक्रमण भइरहे आगामी डिबेट हुनसक्दैन ।"
अमेरिकी राष्ट्रपति डोनाल्ड ट्रम्पको सम्पर्कमा रहेका व्यक्तिहरुलाई कोरोना भाइरसको संक्रमण देखिन थालेको छ । व्हाइट हाउसका सल्लाहकार स्टफेन मिलर र उच्च सैन्य अधिकारीलाई कोरोना भाइरसको संक्रमण भएको बीबीसीले जनाएको छ ।
भारतमा वैज्ञानिकहरुको एउटा टोलीले एकदमै सस्तो पर्ने कागजमा आधारित कोभिड परीक्षण उपकरण निर्माण गरेका छन्, जसले प्रग्नेन्सी टेस्ट जत्तिकै छिटो र सजिलै नतिजा देखाउन सक्ने बताइएको छ । सो परीक्षण किटलाई अहिले भारतका एक काल्पनिक जासुस पात्र, फेलुदाको नाम दिइएको छ । यो वास्तवमा, ‘क्रिस्पर’ नामक जिन संसोधन प्रणालीमा आधारित छ ।
श्रीलंकाको राजधानी कोलम्बोमा कोरोना नियन्त्रणका लागि लगाइँदै आएको कर्फ्युलाई बुधबार थप विस्तार गरिएको छ । कोरोना भाइरसको संक्रमण फैलिँदै गएकाले त्यसलाई थप बढ्न नदिन कर्फ्यु बढाउँदै लैजाने निर्णय भएको अधिकारीहरूले जानकारी दिएका छन् ।
अमेरिकी राष्ट्रपतीय बहसका लागि अनिच्छुक अमेरिकी राष्ट्रपति डोनाल्ड ट्रम्प चुनावी र्यालीका लागि भने तयार रहेको बताएका छन् ।
गत शुक्रबार कोरोना भाइरसबाट संक्रमित भएका ट्रम्पले एक हप्ता नहुँदै बिहीबार आफूलाई पूर्ण स्वास्थ्यलाभ भइसकेकाले र्यालीमा सहभागी हुन सक्षम रहेको दाबी गरेका हुन् ।
जापानले आगामी नोभेम्बरदेखि १२ देशबाट आउन चाहनेहरूलाई यात्रा अनुमति दिने तयारी गरेको छ ।कोरोनाको महामारी फैलिँदै गएकाले बन्द गरिएको यात्रा अनुमतिलाई खुला गरेर सरकारले ती देशहरूबाट आउन दिने योजना बनाएको हो ।
जापानले अनुमति खुला गर्न लागेका देशहरुमा इन्डोनेसिया, चीन, अष्ट्रेलिया, न्युजिल्यान्ड, दक्षिण कोरिया, भियतनाम, मलेसिया, ताइवानलगायत रहेका छन् ।
अमेरिकी राष्ट्रपति डोनल्ड ट्रम्प अब अरूलाई कोभिड-१९को संक्रमण सार्ने खतरा नरहेको उनको उपचारमा रहेका चिकित्सकले बताएका छन् । ट्रम्पको उपचारमा संलग्न चिकित्कक डा. सीन कोन्लेले दिएको यो विवरण नै ट्रम्पको स्वास्थ्यबारे बिहीवार यताको पहिलो औपचारिक विवरण हो ।
अमेरिकाका वरिष्ठ संक्रामक रोगविज्ञ एन्थोनी फाउचीले कोरोना भाइरस (कोभिड–१९) को संक्रमण फैलिने गरी दुई साताअघि एक भेला आयोजना गरेको भन्दै राष्ट्रपति कार्यालय ह्वाइटहाउसको कडा आलोचना गरेका छन् ।
चीनको चिङ्दाओ सहरमा बस्ने सबैजनाको कोरोना परीक्षण गरिने भएको छ । आइतबार १२ जनामा कोरोना भाइरसको संक्रमण पुष्टि भएपछि उक्त सहरमा रहेका करिब ९० लाख नागरिकको कोरोना परीक्षण हुने भएको हो ।
अस्ट्रेलियाका अनुसन्धादाताले कोरोना भाइरस नोट, सिसा र स्टिलमा २८ दिनसम्म बाँच्ने तथ्य पत्ता लगाएको दाबी गरेका छन् । सोमबार उनीहरुले कोभिड–१९ को बिरामी बनाउने कोरोना भाइरस बैंक नोट, स्टिल र सिसामा २८ दिनसम्म बाँच्न सक्ने बताउँदै सरसफाइ र हात धुने कुरामा विशेष ध्यान दिनुपर्ने बताएका हुन् ।
बेलायतका वैज्ञानिकहरुले अहिले १९२१ मा बनेको बीसीजी खोपको परीक्षण गर्न सुरु गरेका छन् । यसले कोभिडबाट ज्यान बचाउन सक्छ सक्दैन भन्ने थाहा पाउनका लागि उनीहरुले अध्ययन थालेका हुन् । यो खोप त्यससमय टीबी रोगका लागि निर्माण गरिएको थियो तर यसले अन्य संक्रमणहरुबाट पनि जोगाउन सक्ने केही प्रमाणहरु भेटिएका छन् । र, यसको ट्रायलमा अहिले १ हजार भन्दा बढी मानिसहरु सहभागी हुने बताइएको छ ।
भारतमा दैनिक कोरोना संक्रमितको संख्यामा कमी आएको छ । सरकारी अधिकारीहरूले पछिल्लो समय दैनिक ६० हजारभन्दा कम मात्रै संक्रमित हुने गरेको बताएका छन् ।
केही समय अगाडिसम्म दैनिक ९० हजारभन्दा बढी संक्रमित हुने गरेकोमा अहिले घटेर ६० हजारभन्दा तल पुगेको हो ।
कोभिड-१९ संक्रमितहरुको संख्या बढ्दै गएपछि बेलायत सरकारले लकडाउनसम्बन्धी नयाँ प्रतिबन्ध घोषणा गरेको छ । सोमबार ब्रिटिस संसद् हाउस अफ कमन्समा बोल्दै प्रधानमन्त्री बोरिस जोन्सनले कोरोना संक्रमणको जोखिम र संक्रमण दरका आधारमा मध्यम, उच्च र अति उच्च (टियर वान, टु एण्ड थ्री) गरी तीन तहको लकडाउन लागू गरिने घोषणा गरेका हुन् ।
औषधि निर्माता कम्पनी जोन्सन एन्ड जोन्सनले कोरोना भाइरसविरुद्धको खोपको परीक्षण तत्कालका लागि स्थगित गरेको छ । एक जना सहभागी बिरामी भएपछि तत्कालका लागि परीक्षण रोकिएको कम्पनीले सोमबार एक विज्ञप्ति जारी गरी जानकारी दिएको छ ।
'दोस्रो पटक' कोरोना भाइरसको संक्रमण भएकी नेदरल्यान्ड्सकी एक महिलाको मृत्यु भएको छ । नेदरल्यान्ड्सकी ८९ वर्षीया महिलाको दोस्रो पटकको कोरोना संक्रमणबाट मृत्यु भएको डच विज्ञहरुको एउटा टोलीद्वारा प्रकाशित लेखमा उल्लेख गरिएको छ ।
चीन सरकारले किङदाओ सहरमा कोरोना भाइरसको संक्रमण बढ्दै गएपछि दुई उच्च अधिकारीहरुलाई पदमुक्त गरेको छ ।
किङ्दाओ सहरमा एक अस्पतालबाट कोरोना भाइरसको संक्रमण सुरु भएपछि सहरको स्वास्थ्य आयोगमा प्रमुखलाई पदमुक्त गरिएका हुन् ।
कोरोना भाइरसको संक्रमण बढेपछि बेलायतमा फेरि प्रतिबन्धहरु कडा पारिने भएका छन् । बीबीसीका अनुसार लन्डनमा दोस्रो चरणको कोरोना भाइरस प्रतिबन्धहरु जारी गरिने भएको हो ।
लन्डनका लाखौं नागरिकहरुले शुक्रबार मध्यराति देखि कडा प्रतिबन्धहरुको सामना गर्नुपर्ने एकजना सांसदले बताएका छन् ।
फ्रान्स प्रहरीले स्वास्थ्यमन्त्री ओलिभियर भेरानको घरको खोजी गरिरहेको छ । कोरोना महामारी नियन्त्रणका लागि सरकारले गरेको कामबारे अनुसन्धान गर्न प्रहरीले स्वास्थ्यमन्त्रीको घर खोजिरहेको बीबीसीले जनाएको छ ।
महामारी नियन्त्रणका सम्बन्धमा अनुसन्धान भइरहेका धेरै वर्तमान र पूर्वस्वास्थ्यमन्त्रीहरुमध्ये एक हुन् । उक्त अनुसन्धानमा फ्रान्सका पूर्वप्रधानमन्त्री एडवार्ड फिलिप पनि रहेका छन् ।
अमेरिकी राष्ट्रपति डोनाल्ड ट्रम्पका छोरा ब्यारोन ट्रम्पलाई पनि कोरोना भाइरस संक्रमण पुष्टि भएको छ । प्रथम महिला मेलानिया ट्रम्पले ह्वाइटहाउसको वेबसाइटमार्फत छोरा ब्यारोनलाई कोभिड– १९ संक्रमण देखिएको बताएकी हुन् ।
डब्लूएचओले कोभिड-१९ का संक्रमितको उपचारमा प्रयोग भइरहेको रेम्डेसिभिर औषधि प्रभावकारी नभएको अथवा निकै न्युन प्रभावकारी भएको जनाएको छ। रेम्डेसिभिरको विकास इबोलाको उपचारको लागि गरिएको हो। यो एन्टिभाइरल औषधि हो र यसले शरीरमा भाइरसलाई बढ्न चाहिने एन्जाइमलाई निष्क्रिय बनाउँछ।
