आज देशभर कोरोना नियन्त्रणको लागि के-कस्ता माग एवं निर्णयहरू भए ? कोरोना भाइरसको पछिल्लो वस्तुस्थिति थाहा पाउनुहोस्। मुलुक एवं मुलुकबाहिर के-कस्ता राजनीतिक, आर्थिक,न्यायीक एवं शैक्षिक गतिविधिहरू भए ? एकसाथ एकैठाउँमा सम्पूर्ण खबरहरू पढ्नुहोस्।
बिहीबार १,२४६ जना थपिएसँगै नेपालमा कोरोना संक्रमितको कुल संख्या ५९,६७३ पुगेको छ भने मृत्यु हुनेको संख्या ३८३ पुगेको छ।
हालसम्म नेपालमा ४२,९९४ जना कोरोना संक्रमित निको भएका छन्।
=> New PCR Test : १०,६४१ => New Recovered : १,२४३
सम्बन्धित :
- हाल सक्रिय संक्रमित १६ हजार दुई सय ४१ जना छन्। त्यसमध्ये सात हजार नौ सय तीनजना संस्थागत र आठ हजार तीन सय ३८जना होम आइसोलेसनमा बसेका छन्। संक्रमितमध्ये एक सय ८२ जना आइसियू र ३९ जनाको भेन्टिलेटरमा उपचार भइरहेको मन्त्रालयले जनाएको छ। हालसम्म क्वारेन्टाइनमा रहनेको संख्या ७ हजार ८८३ जना रहेका छन्।
- ११ चैतदेखि बन्द रहेका रेस्टुरेन्ट र होटेलसहित अन्य पर्यटन क्षेत्रसमेत बिहीबारबाट पूर्ण रूपमा खुलाउने निर्णय गरेसँगै देशभरका अधिकांश होटेल र रेस्टुरेन्ट खुलेका छन्। तर, तारे होटेलहरू भने खुल्न केही साता लाग्ने भएको छ।
- सरकारले यो वर्ष संविधान दिवसको अवसरमा करिब ६ जनालाई विभिन्न प्रकारका विभूषण दिने भएको छ। विभूषणमा कोभिड–१९ रोकथाम तथा उपचारमा खटिएका स्वास्थ्यकर्मी तथा सुरक्षाकर्मीलाई प्राथमिकतामा राखिएको छ ।
- नेपाली कांग्रेसका सभापति शेरबहादुर देउवा कोरोना भाइरसको कन्ट्रयाक्ट ट्रेसिङमा परेका छन्। आफ्नो निजी सचिवालयमा कार्यरत एकजनामा कोरोना पाेजेटिभ देखिएपछि देउवा होम आइसोलेसनमा बस्न थालेका हुन्।
- स्वास्थ्य तथा जनसंख्या मन्त्रालयले स्थानीय तहमा अस्थायी कोभिड अस्पताल सञ्चालनका लागि १० लाख रुपैयाँ बजेट उप्लब्ध गराउने भएको छ। स्थानीय तहमा कोभिड १९ अस्थायी अस्पताल सञ्चालनसम्बन्धी मार्गदर्शन २०७७ जारी गर्दै स्वास्थ्य तथा जनसंख्या मन्त्रालयले ६ सय ४९ वटा स्थानीय तहलाई बजेट उपलब्ध गराउने जनाएको छ।
- पहाडी जिल्ला गुल्मीमा कोभिड–१९ परीक्षणका लागि प्रयोगशाला स्थापना गरिएको छ। प्रयोगशालाको बिहीबार सरकारका प्रवक्ता एवं परराष्ट्र मन्त्री प्रदीप ज्ञवालीले उद्घाटन गरेका छन्।
नेकपाका उपाध्यक्ष वामदेव गौतमले आफैँले पार्टी सदस्यता दिएका राष्ट्रिय सभा अध्यक्ष गणेश तिमल्सिनाबाट राष्ट्रिय सभा सांसदको शपथ लिएका छन्। उनले राष्ट्रिय सभाको गरिमा बढाउनका निम्ति, नेपालको संविधान र नियमावलीबमोजिम राष्ट्रिय सभामा जिम्मेवारी निर्वाह गर्ने प्रतिबद्धता पनि जनाएका छन्।
रेलवे विभागले करिब ८४ करोड ६५ लाख रुपैयाँमा भारतसँग खरिद गरेको रेलको दुई सेट शुक्रबार नेपाल आइपुग्ने भएको छ। एउटा इन्जिन र चारवटा बोगीसहितको दुई सेट रेल शुक्रबार अपराह्नसम्म जनकपुर आइपुग्ने रेलवे विभागले जनाएको छ।
लकडाउन र निषेधाज्ञा सकिएसँगै स्कुल–कलेजहरू अब कसरी पुनः सञ्चालनमा ल्याउने भन्ने बहस हुन थालेको छ। कोरोना (कोभिड–१९) संक्रमण र जोखिम नघटे पनि अब कोभिडसँगै दैनिकी चलायमान बनाउन सर्वसाधारण तयार हुँदै गएका छन् । यही मान्यतालाई विद्यालय–कलेजले पनि जोड दिइरहेका छन्।
पछिल्लो समय मुलुकका विभिन्न जिल्लामा प्रहरी हिरासत भएकामा व्यक्तिहरूको मृत्युबारे अध्ययन तथा छानबिन गर्न प्रतिनिधिसभाको कानुन न्याय तथा मानवअधिकार समितिले उपसमिति गठन गरेको छ। समितिको बिहीबार सिंहदरबारमा बसेको बैठकले देशका विभिन्न प्रहरी कस्टडीमा भएको मृत्युको विषयमा हत्या वा कसरी गैरन्यायिक हत्या भयो भन्ने सम्बन्धमा अध्ययनका लागि समिति बनाउने निर्णय गरेको हो।
अमेरिकी राष्ट्रपति डोनाल्ड ट्रम्पले आगामी अक्टोबरसम्ममा कोरोना भाइरसविरुद्धको खोप अमेरिकामा वितरण गर्न सकिने बताएका छन्। उनले अक्टोबरमा देशभरि नै खोप वितरण गर्न सकिने सम्भावना रहेको जानकारी दिएका हुन्।
‘लिओनार्दो दा भिन्सी अन्तर्राष्ट्रिय विमानस्थल’ का नामले पनि चिनिने इटलीको राजधानी रोममा अवस्थित फिउमिसिनो विमानस्थल ‘कोभिड–१९ फाइभ–स्टार एयरपोर्ट रेटिङ’ प्राप्त गर्ने विश्वकै पहिलो विमानस्थल बन्न सफल भएको छ। अन्तर्राष्ट्रिय एयरपोर्ट उद्योग मूल्यांकन संस्था, स्काइट्रयाक्सले जारी गरेको सूचीमा फिउमिसिनो पहिलो स्थानमा आएको हो।
फेसबुक र गुगलले अखबारका समाचारका लागि भुक्तानी गर्नुपर्नेसम्बन्धी प्रस्ताव समेटिएको मस्यौदा कानुनमा ती दुवै निकायलाई आफ्नो संशोधन पेस गर्न समय दिइएको छ। तर, मस्यौदा कानुनका लेखकहरूले सैद्धान्तिक रूपमा कानुनको मुख्य विषयमा परिमार्जन नहुने जनाएका छन्।
भारतका केन्द्रीय यातायातमन्त्री नितिन गड्करीलाई कोरोना भाइरस संक्रमण भएको छ। उनले आफू कोरोना भाइरसबाट संक्रमित भएको सामाजिक सञ्जालबाट जानकारी दिएका छन्।
