आज कोरोना संक्रमणको पछिल्लो वस्तुस्थिति, व्यापार/व्यवसाय र यातायातमा निषेधाज्ञा खुल्ने, यातायातमा जोरबिजोर लागू गरिने, संविधान दिवसका दिन ३ दिनसम्म दीप प्रज्वलन गरिने, अफगानिस्तानमा उपराष्ट्रपतिलाई लक्षित गरेर विस्फोटन, ट्रायलमा सहभागी बिरामी परेपछि अक्सफोर्डको खोप परीक्षण रोकियो, अवैध निर्माण भन्दै बीएमसीले अभिनेत्री कंगनाको अफिस भत्कायो लगायतका विषयवस्तुहरूलाई समावेश गरिएका छन्।
बुधबार १,०८१ जना थपिएसँगै नेपालमा कोरोना संक्रमितको कुल संख्या ४९,२१९ पुगेको छ भने मृत्यु हुनेको संख्या ३१२ पुगेको छ। हालसम्म नेपालमा ३३,८८२ जना कोरोना संक्रमित निको भएका छन्।
=> New PCR Test : ११,१६७ => New Recovered : ९१८
सम्बन्धित :
- २४ घन्टामा ११ हजार १६७ पीसीआर परीक्षण गरिएका छन्। देशभर आइसोलेसनम १५ हजार २५ र क्वारेन्टाइनमा ५ हजार ४ सय ८० जना रहेका छन्।
- काठमाडौं उपत्यकामा एकैदिन ४ सय ६४ जनामा कोरोना संक्रमित देखिएका छन्। स्वास्थ्य तथा जनसंख्या मन्त्रालयले बुधबार आयोजना गरेको पत्रकार सम्मेलनमा काठमाडौं ३ सय ९४, भक्तपुरमा ३६ र ललितपुरमा ३४ जनामा संक्रमण पुष्टि भएको जानकारी दिएको हो।
- कांग्रेस सभापति शेरबहादुर देउवाले देश कोरोनाको महामारीमा फँसेको बेला सरकारले भने पैसा उठाउनेमात्रै काम गरेको बताएका छन्। 'यो सरकारले भ्रष्टाचार गर्ने र पैसा उठाउनेबाहेक कुनै काम गरेन,' पार्टी केन्द्रीय कार्यालयले आयोजना गरेको बीपी जयन्तीको भर्चुअल गोष्ठीमा सभापति देउवाले भने।
- सरकारले स्वाब परीक्षणको दर घटाउँदा कोरोना संक्रमणको अवस्था केही स्थिर देखिएको छ। अघिल्लो साता संक्रमितको संख्या बढेको थियो भने यो साता स्थिर रहेको हो। स्वास्थ्य तथा जनसंख्या मन्त्रालयको तथ्यांकअनुसार १९ भदौमा अहिलेसम्मकै सर्वाधिक एक हजार तीन सय ५९ नयाँ संक्रमित पुष्टि भएका थिए। त्यो दिन १३ हजार ६ सय ३८ नमुना परीक्षण भएका थिए । मृत्यु हुनेको संख्या पनि अहिलेसम्मकै उच्च रहेको थियो। त्यो दिन १४ जनाले ज्यान गुमाएका थिए।
- नेपालमा कोरोना संक्रमण निको हुनेको संख्या ३३ हजार ८८२ पुगेको छ। स्वास्थ्य तथा जनसंख्या मन्त्रालयले अनुसार निको हुनेको दर ६८.८ प्रतिशत हो। पछिल्लो आठ दिनको तथ्याकं हेर्दा देशैभर ११ हजार ७०४ जना कोरोना संक्रमण निको भएका छन्।
- कोरोनाका कारण सरकारले जारी गरेको लकडाउन तथा निषेधाज्ञाका कारण मुलुकका पौने दुई लाख साना उद्यमहरू सधैँका लागि पलायन भएका छन्। लघु तथा साना उद्यममध्ये २० प्रतिशत अब खुल्नै नसक्ने गरी विस्थापित भएको नेपाल घरेलु तथा साना उद्योग महासंघले जनाएको छ।
कोरोना सम्बन्धित निर्णयहरू एवं मागहरू :
- कोरोना संक्रमण भएका व्यक्तिको उपचार र सामान्य बिरामीको उपचार एउटै अस्पतालमा गर्दा कोरोना भाइरस (कोभिड- १९)को संक्रमण फैलिने सम्भावना बढेको स्वास्थ्यकर्मीले बताएका छन्। कोभिड- १९ डेडिकेटेड अस्पतालको संख्या बढाएर अरु बिरामीलाई उपचार गर्ने अस्पतालमै कोरोना संक्रमितलाई राख्न नहुने उनीहरूले बताएका छन्।
- बिहीबारदेखि उपत्यकामा निषेधाज्ञा खुकुलो बनाउँदै सरकारले २० सिटभन्दा ठूला सार्वजनिक यातायातलाई जोर–बिजोरका आधारमा सञ्चालन गर्न दिने निर्णय गरेको छ। यस्तै, सबै किसिमका पसल खोल्न दिने निर्णय भएको छ । तर, सबै दिन खुल्न पाउने छैनन्। रेस्टुरेन्टहरूको हकमा टेक–अवे सुविधा मात्र सञ्चालन गर्न दिने निर्णय भएको छ।
- भदौ ३ गते देखि काठमाडौं उपत्यकामा लागू गरिएको निषेधाज्ञा यातायात र व्यापार/व्यवसाय क्षेत्रका लागि बिहीबारदेखि खुल्ने भएको छ। काठमाडौंका प्रमुख जिल्ला अधिकार जनकराज दाहालका अनुसार सार्वजनिक र निजी यातायातमा जोरबिजोर लागू गर्ने र व्यापार/व्यवसायलाई शर्तसहित खोल्न दिने टुंगोमा प्रशासन पुगेको छ।
- पूर्वस्वास्थ्यमन्त्री गगन थापाले महामारीमा सरकारको उपस्थिति विषेधाज्ञा घोषणा गर्ने सीडीओ र कोरोनासम्बन्धी आँकडा पढ्ने स्वास्थ्य मन्त्रालयका प्रवक्ता रुपमा मात्र देखिएको छ। कर्मचारीको अनुहार पछाडि लुकेको देशको राजनीतिक नेतृत्व बालुवाटारमा आइसोलेसनमा बसेको तथा रोग र भोगबाट आहत नागरिकलाई सीडीओ र प्रवक्ताको भरमा छाडेको उनले बताएका हुन्।
- काठमाडौं उपत्यकामा लागु गरिएको निषेधाज्ञा बुधबार राति १२ बजेदेखि खुकुलो भएर जोर—बिजोर प्रणालीमा सवारी साधन सञ्चालन हुने भए पनि यसको फाइदा मनोरञ्जन क्षेत्रले भने उपयोग गर्न पाउने छैन। काठमाडौं उपत्यकाका तीनै जिल्ला काठमाडौं, ललितपुर र भक्तपुरका प्रमुख जिल्ला अधिकारीहरुको बुधबार बसेको संयुक्त बैठकले उपत्यकामा निषेधाज्ञा खुकुलो बनाउने निर्णय गरे पनि शैक्षिक संस्था, सिनेमा हल, नाटक घर, जिमखानालगायत यसअघि बन्द गरिएका क्षेत्र अर्को निर्णय नहुँदासम्म बन्द नै रहने छन्।
- उपत्यकाका २० सांसदले लकडाउन र निषेधाज्ञालाई निरन्तर कायम नराखी विभिन्न मेला, पर्व, चाडपर्वमा मात्र निषेध गरेर अन्य क्षेत्रमा भने निषेधाज्ञा नगर्न सुझाब दिएका छन्। साथै उनीहरूले उपत्यकाभित्र छिर्ने नाकामा भने कडाइ गर्न सरकारलाई सुझाब दिएका छन्। मंगलबार सांसदहरूले उपप्रधान तथा रक्षामन्त्री ईश्वर पाेखरेललाई भेटेर यस्ताे सुझाब दिएका हुन्।
- स्वास्थ्य मन्त्रालयको तथ्यांक अनुसार दश दिनमा कोरोना संक्रमितको संख्या बढने भन्दा अस्पतालबाट डिस्चार्ज हुनेको संख्या बढेको हो। भदौ १३ देखि २३ गतेसम्मको तथ्यांक हेर्दा मुलुकभर ११ हजार ६ सय ८२ संक्रमित थपिएका छन्। थपिएका संक्रमित भन्दा १ हजार १ सय संक्रमित बढी अस्पतालबाट डिस्चार्ज भएर घर गएका छन्।
नेपाल कम्युनिस्ट पार्टी (नेकपा)का अध्यक्षद्वय केपी ओली र पुष्पकमल दाहाल ‘प्रचण्ड’ले शुक्रबार बोलाइएको स्थायी कमिटी बैठकमा प्रस्तुत गर्ने प्रस्ताव तयार पारेका छन्। पार्टीभित्रको समस्या समाधानका लागि गठित महासचिव विष्णु पौडेल नेतृत्वको ६ सदस्यीय कार्यदलले दिएको सुझाब र गत १८ भदौको सचिवालय बैठकमा नेताहरूबाट प्राप्त सुझाबका आधारमा उनीहरूले प्रस्तावको गृहकार्य गरेका हुन्।
नेपाल वायुसेवा निमगले दुर्गम क्षेत्रमा उडानका लागि तीनवटा जहाज खरिद गर्ने तयारी गरेको छ। निगमले उपमहानिर्देशकको संयोजकत्वमा एक समिति गठन गरेर यसको अध्ययन गरिरहेको छ। ६ वटा चिनियाँ जहाज चलाउन नसकेर थन्काएर राखेको निगमले नयाँ जहाज खरिद गर्न लागेको हो।
उच्च अदालत दिपायल महेन्द्रनगर इजलासले सशस्त्र प्रहरी बिओपीलाई बेलौरी नगरपालिकाले उपभोगका लागि दिएको जमिन प्रकरणमा एक महिनाअघि दिएको अन्तरिम आदेश बदर गरेको छ।
गत असारमा बेलौरी नगरपालिका– २ खैरानी थापा चौराहमा सशस्त्र प्रहरी बलको बिओपी राखिएको थियो। सशस्त्र प्रहरी बसेको जमिन आफ्नो भन्दै स्थानीय जनक भण्डारीले दायर गरेको उत्प्रेषण मुद्दामा अदालतले विपक्षीका नाममा अन्तरिम आदेश दिएको थियो।
भुकम्पबाट धेरै क्षति ब्यहोर्नेमध्येको पूर्वी पहाडी जिल्ला दोलखामा ६० हजार ७ सय घरको पुनर्निर्माण सम्पन्न हुँदा १८ अर्ब ४४ करोड ९३ लाख खर्च भएको छ।
विनाशकारी भुकम्प गएको ५ वर्ष बित्नै लाग्दा दोलखामा ६० हजार ७ सय २६ घरको पुनर्निर्माण सकिएको हो। राष्ट्रिय पुनर्निर्माण प्राधिकरणका अनुसार हालसम्म दोलखामा निजी आवास निर्माणका लागि मात्रै १८ अर्ब ४४ करोड ९३ लाख ५० हजार रकम खर्च भइसकेको छ।
ऊर्जा, जलस्रोत तथा सिँचाइमन्त्री वर्षमान पुनले अबको दुई वर्षभित्रमा देशभर पूर्ण विद्युतीकरण हुने बताएका छन्। बुधबार रोल्पाको लिवाङमा प्रेस संगठनले आयोजना गरेको पत्रकार भेटघाटमा बोल्दै मन्त्री पुनले आगामी आर्थिक वर्षमा मुलुक नै उज्यालो बनाउने लक्ष्य रहेको बताए।
दुर्घटनामा पुरै हात छिनेका एक बिरामीको हात १० घण्टा लामो शल्यक्रिया गरी जोडिएको छ। काठमाडौंको दक्षिणकाली स्थित एक कारखानामा काम गर्ने सर्लाही गाउँपालिकाका १८ वर्षीय रवी सिंहको मेशिनले छिनेको हात राष्ट्रिय ट्रमा सेन्टरमा लामो सल्यक्रियापछि जोडिएको हो।
फ्लेक्स पाइप मेशिनले सिंहको दाहिने हत्केला पुरै छिनेपछि ट्रमा सेन्टरको आकस्मिक कक्षमा भर्ना भएका थिए।
यस वर्षको संविधान दिवसका अवसरमा असोज २, ३ र ४ गते दीप प्रज्जवलन गरिने भएको छ। सबै सरकारी निकायले संविधान दिवसलाई राष्ट्रिय दिवसका रुपमा मनाएर सोसम्बन्धी 'स्लोगन' वेबसाइटमा प्रकाशित गर्नेछन्। सरकारले संविधान दिवसका दिन सबैको घरघरमा राष्ट्रिय झण्डा फहराउनुपर्ने बताएको छ।
सरकारले मुलुकलाई साक्षर नेपाल घोषणा गर्ने अभियान चलाएको १२ वर्ष बित्यो। यसबीचमा सात अर्ब ४० करोड १३ लाख ७५ हजार खर्च भएको छ। तर, संघीय राजधानी रहेका काठमाडौं जिल्ला र महानगर नै पूर्ण साक्षर घोषणा हुन सकेका छैनन्।
गरुडा ८ जिगडियाका बिजय महराको हिरासतमा मृत्यु भएको घटनामा पीडित परिवारले बुधबार रौतहटका तत्कालीन जिल्ला प्रहरी प्रमुख (एसपी) सहित ६ जना विरुद्ध यातना र ज्यान सम्बन्धी कसुरमा जिल्ला सरकारी वकिल कार्यालयमा जाहेरी दर्ता गराएका छन्।
जिल्ला सरकारी वकिल कार्यालयका जिल्ला न्यायधिवक्ता सुवासकुमार भट्टराईले पीडितको जाहेरी दर्ता गरी आवश्यक कारबाहीका लागि जिल्ला प्रहरी कार्यालय पठाइसकेको बताए। जिगडियाका निरन्जन रामको साउन ३१ गते राति घाँटी रेटेर हत्या घटनामा पक्राउ परेका विजयलाई ईलाका प्रहरी गरुडामा जिल्लाबाट खटेको ईन्स्पेक्टर सिंहको टोलीले हत्या कबुल गराउने निहुँमा यातना दिँदा मृत्यु भएको थियो।
अफगानिस्तानका उपराष्ट्रपतिलाई लक्षित गरेर बुधबार राजधानी काबुलमा आत्मघाती बम विस्फोट हुँदा दुई जनाको मृत्यु र अरु १२ जना घाइते भएको बताइएको छ। घटनाका बारेमा अहिलेसम्म कसैले पनि जिम्मेबारी नलिएको र घटनाका बारेमा अनुसन्धान शुरु भइसकेको प्रहरीले जनाएको छ ।
रुसको सार्वभौम सम्पत्ति कोषले तीन करोड २० लाख डोज सम्भावित कोरोनाविरुद्धको खोप मेक्सिकोलाई बिक्री गर्ने भएको छ।
रुसले कोभिड-१९ को सम्भावित 'स्पुतनिक-भी' खोप मेक्सिकोको एक मुख्य फर्मासिटिकल कम्पनीलाई बिक्री गर्ने सम्झौता भएको स्रोतले रोयटर्सलाई जानकारी दिएको छ। यो रुसको खोप निर्यातको दोस्रो सम्झौता(पहिलो काजकस्तान) भएकोसमेत बताइएको छ।
कोरोनाविरुद्धको खोपका लागि अन्तिम चरणको ट्रायलमा रहेको अक्सफोर्ड युनिभर्सिटी र एस्ट्राजेनेका कम्पनीको खोप परीक्षणमा सहभागी एकजनाले नकारात्मक प्रतिक्रिया देखाइ बिरामी परेपछि परीक्षण रोकिएको छ।
अज्ञात कारणले बिरामी परेका एक बेलायती सहभागीका कारण परीक्षण केही समयका लागि रोकिएको कम्पनीले जनाएको हो।
अवैध निर्माण गरेको भन्दै बृहन्मुम्बई महानगरपालिका (बीएमसी)ले बलिउड अभिनेत्री कंगना रनावतको कार्यालय भत्काएको छ।
बीएमसीले मंगलबार कंगनाको कार्यालयमा २४ घण्टाभित्र सामान हटाउन भन्दै नोटिस पठाएको थियो।कंगनाका तर्फबाट उनका वकिलले लिखित जवाफ दिए पनि चित्तबुझ्दो नभएको बताउँदै बीएमसीले उनको कार्यालय भत्काएको हो।
अमेरिकाको क्यालिफोर्निया राज्यमा लागेको डढेलो ९ लाख हेक्टर क्षेत्रमा फैलिएको छ। विभागले मंगलबार सार्वजनिक गरेको विवरणमा डढेलोबाट हालसम्म ८ जनाको मृत्यु भइसकेको छ । डढेलोका कारण ३ हजार ३ सयभन्दा बढी संरचना ध्वस्त भएको उल्लेख छ।
