आज कोरोनाको पछिल्लो वस्तुस्थिति, मत्स्येन्द्रनाथको क्षमा पूजा, मन्त्री खतिवडाद्वारा राजीनामा, वैकल्पिक विधिबाट भएको पठनपाठनलाई औपचारिक मान्यता, साउदी अरेबियाका 'नारकीय' हिरासतमा हजारौं अफ्रिकी आप्रवासी, भारतमा ‘पब्जी’ बन्द, ‘फौजी’ आउँदै लगायतका विषयवस्तुहरूलाई समावेश गरिएका छन्।
शुक्रबार १,३५९ जना थपिएसँगै नेपालमा कोरोना संक्रमितको कुल संख्या ४४,२३६ पुगेको छ भने मृत्यु हुनेको संख्या २७१ पुगेको छ।
हालसम्म नेपालमा २५,५६१ जना कोरोना संक्रमित निको भएका छन्।
=> New PCR Test : १३,६३८ => New Recovered : १,३५४
सम्बन्धित :
- शुक्रबार अपराह्न सम्मको तथ्यांकअनुसार आइसोलेसनमा उपचारमा रहेकाको संख्या १८ हजार ४ सय ४ र क्वारेन्टाइनमा ६ हजार ५ सय ६१ जना रहेको छ। २४ घन्टाको अवधिमा कोरोना संक्रमणबाट थप १४ जनाको मृत्यु भए हो।
- पछिल्लो २४ घन्टामा काठमाडौँ उपत्यकामा थप ४ सय ५४ कोरोना संक्रमित देखिएका छन्। काठमाडौँमा ३ सय ८६, ललितपुरमा ३२ र भक्तपुरमा ३६ जना संक्रमित देखिएका हुन्।
- विश्वभर कोरोना संक्रमणमुक्त हुनेको संख्या एक करोड ८६ लाख ६५ हजार सात सय ३७ पुगेको छ। विश्व स्वास्थ्य संगठन (डब्ल्युएचओ) ले विश्वभर हालसम्म दुई करोड ६४ लाख ७५ हजार पाँच सय ६८ जना संक्रमित भएको शुक्रबार जनाएको छ। हाल विश्वभर सक्रिय संक्रमित भने ६९ लाख ३६ हजार पाँच सय ४६ मात्र छन्।
कोरोना रोकथाम सम्बन्धित निर्णयहरू :
- जिल्ला प्रशासन कार्यालय चितवनले भदौ ३१ सम्मका लागि निषेधाज्ञा थप गरेको छ। प्रशासनले शुक्रबार एक सूचना जारी गर्दै बिहान ७ बजेदेखि ४ बजेसम्म बजार खोल्न सकिने बताएको छ। यसअघि बिहान ५ देखि ८ बजेसम्म र बेलुका ५ देखि दैनिक उपभोग्य सामानका पसलहरु खोल्दै आएकोमा यसलाई खुकुलो गरी परिमार्जन गरेको हो। शुक्रबार राति १२ बजेदेखि दोस्रो थप गरिएको लकडाउनको समय सकिँदैछ।
- ट्राफिक प्रहरी महाशाखा, रामशाहपथले सचेतना अभिवृद्धिको लागि २२ वटा डमी ट्राफिक प्रहरी तयार गरेर विभिन्न चोकमा राखेको छ। यसले सचेतनासँगै ट्राफिक देख्दा मात्रै नियम पालना गर्ने नागरिकलाई समेत कानुन अनुसार सवारी चलाउन मद्दत गर्ने ट्राफिक प्रहरीका अधिकारीहरुको भनाइ छ।लकडाउनले मात्र समस्याको समाधान नहुने भन्दै व्यवसायीहरुले यसको मोडालिटी परिवर्तन गर्न माग गरेका छन्। लामो समयदेखि लकडाउन भए पनि समस्या समाधान नभएको भन्दै दाङका व्यवसायीहरुले यस्तो माग गरेका हुन्। दाङ जिल्ला उद्योग वाणिज्य संघले आयोजना गरेको जुम मिटिङमा उनीहरुले यस्तो बताएका हुन्।
'रातो मत्स्येन्द्रनाथको जात्रा' अपडेट :
बिहीबार दिउँसो भएको झडपपछि असामान्य बन्दै गएको स्थितिलाई साम्य पार्न विभिन्न जातीय संगठन, गुठी संस्थान, जिल्ला प्रशासन कार्यालयलगायतका प्रतिनिधिको बैठकले गरेको निर्णयअनुसार छोटो विधिबाट रथयात्रा गर्न शुक्रबार क्षमापूजा गरिएको हो।
सम्बन्धित :
- बिहीबारको असामान्य परिपस्थितिलाई मध्यनजर गर्दै शुक्रबार ललितपुुरको चक्रपथ क्षेत्रभित्र कर्फ्यु आदेश जारी गरे सीमित व्यक्ति उपस्थित भएर शुक्रबार क्षमापूजा गर्ने र संक्षिप्त विधिबाट मत्स्येन्द्रनाथलाई बुङ्मती लैजाने सहमति भएको बैठकमा सहभागी गुठी संस्थानका प्रवक्ता सरोज थपलियाले जानकारी दिए।
- ललितपुरका सहरी क्षेत्रमा लगाइएको कर्फ्यु हटाउने वा निरन्तरता दिने भन्ने विषयमा ललितपुरको सुरक्षा समितिको बैठक बसिरहेको छ। जिल्ला प्रशासन कार्यालयमा बसेको बैठकमा हिजो भएको झडप र कर्फ्युपछिको अवस्थाबारे समीक्षा भइरहेको ललितपुरका प्रमुख जिल्ला अधिकारी नारायाणप्रसाद भट्टले बताए।
- काठमाडौं उपत्यकामा कार्यरत ५६ प्रहरीमा कोरोना भाइरस (कोभिड–१९) को संक्रमण पुष्टि भएको छ, संक्रमित हुनेमा बिहीबार ललितपुरको पुल्चोकमा भएको झडप नियन्त्रणमा खटिएका १८ प्रहरी समेत छन्। रातो मत्स्येन्द्रनाथको रथ स्वस्फूर्त तान्न खोज्ने युवालाई प्रहरीले रोक्न खोज्दा झडप भएको थियो।
शिक्षा मन्त्रालयले रेडियो, टेलिभिजन, अनलाइन तथा होम स्कुलिङकोबाट भएको पठनपाठनलाई शैक्षिक सत्रमा गणना हुने गरी औपचारिक मान्यता दिएको छ। अहिलेको पाठ्यक्रमलाई यथावत् रूपमा अघि बढाउन कठिन हुने ठहर गर्दै विद्यालय शिक्षाको पाठ्यक्रमको संश्लेषण (कस्टमाइजेसन) गर्ने निर्णय भइसकेको छ। यससँगै सरकारले स्थानीय तहको अनुमति लिएर निजी विद्यालयलाई शुल्क उठाउन बाटो खुला गरिदिएको छ।
कृष्णबहादुर बोहरा हत्या अभियोगमा पक्राउ परेकी चितवन शक्तिखोरकी ३७ वर्षीया कल्पना मुडभरी (पौडेल)लाई जिल्ला अदालत काठमाडौंले पुर्पक्षका लागि थुनामा पठाउने आदेश दिएको छ।
बोहरा हत्या मुद्दामा भएको थुनछेक बहसपछि अदालतले कल्पनालाई थुनामा राख्ने आदेश दिएको सरकारी वकिल कार्यालयका सूचना अधिकारी मोहिनप्रसाद जोशीले बताए।
अभियोगमा जोडिएकी उनकी १५ वर्षीया छोरीलाई भने अदालतले सुधारगृहमा पठाउने आदेश दिएकाे छ।
अर्थ एवं सूचना तथा संचार प्रविधिमन्त्री युवराज खतिवडाले पदबाट राजीनामा दिएका छन्।राष्ट्रियसभामा सरकारको सिफारिसमा राष्ट्रपतिले मनोनित गर्ने एक सदस्यको सिट रिक्त छ। उक्त सिटमा नेकपाले उपाध्यक्ष वामदेव गौतमलाई पठाउने निर्णय गरेसँगै खतिवडा सरकारबाट बाहिरिएका हुन्।
सम्बन्धित :
- आधा वर्ष लामो पौंठेजोरीपछि नेकपा पुरानै ठाउँमा फर्किएको टिप्पणी हुन थालेको छ । पार्टी सचिवालयको बैठकले राष्ट्रियसभाको रिक्त स्थानमा उपाध्यक्ष वामदेव गौतमलाई सिफारिस गरेपछि नेकपा फागुन १४ मै फर्किएको नेकपाका नेताहरूको दाबी छ ।
- सत्तारूढ नेकपाको सचिवालयको बिहीवार राष्ट्रिय सभामा नेता वामदेव गौतमलाई पठाउने निर्णय गरेपछि मन्त्रिमण्डल पुनर्गठन र नयाँ अर्थमन्त्रीको चर्चा चुलिएको छ। सरकारले शुक्रवार नै नेकपा सचिवालयको निर्णयानुरूप गौतमको नाम राष्ट्रिय सभामा मनोनीत गर्न राष्ट्रपतिसमक्ष सिफारिस गर्न सक्ने चर्चा चलेको थियो। तर अपराह्ण बसेको मन्त्रिपरिषद्को बैठकले त्यससम्बन्धी कुनै निर्णय नगरेको विवरणहरू आएका छन्।
४ जनाको मृत्यु तथा २४ जना बेपत्ता हुने गरी बागलुङको ढोरपाटन नगरपालिकास्थित बोबाङमा आएको बाढी-पहिरोप्रति नेपाली कांग्रेस संसदीय दल गण्डकीले शोक व्यक्त गर्दै राहत वितरण र खोजीकार्यमा जुट्न आग्रह गरेको छ।
ढोरपाटन नगरपालिकास्थित भुजीखोलामा आएको बाढीका कारण १५ दिने शिशुसहित २४ जना बेपत्ता छन।
सम्बन्धित :
- बुधबार राति गएको बाढीले क्षति पुऱ्याएको स्थलगत निरीक्षणमा गृहमन्त्री रामबहादुर थापा पुगेका छन्।नेपाली सेनाको हेलिकाेप्टरमार्फत आएका गृहमन्त्री थापासहितको टोलीले भुजीखोलामा आएको भीषण बाढीले पुऱ्याएको क्षतिबारे स्थलगत जानकारी लिएको थियो। यस टोलीले त्रिपाल, टेन्ट, म्याटलगायतका राहतका सामग्रीसमेत वितरण गरेको छ।
प्रधानमन्त्री केपी शर्मा ओलीले मन्त्रीहरुलाई मन्त्रिपरिषद् पुनगर्ठन हुने हल्ला मात्रै भएको बताएका छन्। शुक्रबार बसेको मन्त्रिपरिषद् बैठकमा प्रधानमन्त्री ओलीले मन्त्रिपरिषद् पुनर्गठन हुने भन्ने हल्ला मात्र भएको भन्दै मन्त्रीहरुलाई ढुक्कसँग काम गर्न निर्देशन दिएका हुन्।
सम्बन्धित :
- झन्डै दुई महिनादेखि जारी नेकपा विवाद सुल्झाउन गठित महासचिव नेतृत्वको कार्यदल प्रतिवेदनमाथि वरिष्ठ नेता माधवकुमार नेपालले दर्जनभन्दा बढी मुद्दामा असन्तुष्टि राखेका छन्। सचिवालयमा भएको प्रारम्भिक छलफलमा नेता नेपालले कार्यकारी अध्यक्षको भूमिका, सरकार संचालनमा पार्टीको भूमिका, एक व्यक्ति एक पद, अन्तर्विरोधको मूल्याङ्कन, एकीकरणमा भएका ढिलाईलगायतका विषयमा प्रश्न उठाएका छन्।
गएको अढाइ महिनामा तीन पटक गरेर नेपाल प्रवेश गरेका सलहको प्रकोप "यस वर्षका लागि अब भने टरेको" अधिकारीहरूले बताएका छन्। साउन अन्तिमदेखि नेपालका कुनै पनि भागमा सलहको बगाल देखिएको विवरण आएको छैन।
प्लान्ट क्वारन्टीन तथा विषादी व्यवस्थापन केन्द्रका प्रमुख सहदेवप्रसाद हुमागाईँका अनुसार गत साउन पहिलो सातातिर चिनियाँ अधिकारीहरूले नेपालको बाटो हुँदै सलह तिब्बतमा पुगेको जानकारी गराएका थिए।
अनुमतिविना एक महिलाले अस्ट्रेलिया आयात गरेको २६,००० अस्ट्रेलियाली डलर मूल्य पर्ने एउटा हातेझोला जलाइने भएको छ।
फ्रान्सस्थित सेन्ट लरेन्ट बुटिकबाट ल्याइएको विलासी झोला पर्थबाट अस्ट्रेलियाली सीमासुरक्षा बलका सदस्यले जफत गरेका हुन्।
गोहीको छालाबाट निर्मित सामानहरू अस्ट्रेलियामा आयात गर्न पाइने भए पनि पसलेहरूले ७० अस्ट्रेलियाली डलर तिरी अनुमति लिनुपर्ने हुन्छ।
ताप्लेजुङकी २६ वर्षीया वर्षीया चन्द्रकला लाम्गादे ज्याभलिन थ्रोकी राष्ट्रिय कीर्तिमानधारी खेलाडी हुन्।
उनी अहिले भौतिक आक्रमणमा परेर दमकस्थित अस्पतालमा उपचार गराउँदै छिन्। जातीय भेदभावका कारण आफूमाथि आक्रमण भएको उनको दाबी छ।
बेइरुतमा रहेका खोजकर्ताहरूले एक महिनाअघि त्यहाँ भएको शक्तिशाली विस्फोटनमा ध्वस्त भएको एउटा भवनको भग्नावशेषमा एकजना व्यक्ति अझै जीवितै हुनसक्ने सङ्केत पाएको बताएका छन्।
बुधवारदेखि लेबननको राजधानीस्थित एउटा व्यावसायिक तथा आवासीय क्षेत्र मर मिखाइलमा एकजनाको मुटुको धड्कन थाहा भएको भन्ने अपुष्ट खबरहरू आएका थिए।
कोरोना भाइरसको संक्रमणको प्रभावकारी नियन्त्रण भएको भनिएको न्यजिल्यान्डमा मेको अन्तिमपछि पहिलो पटक एकजना कोरोना संक्रमितको मृत्यु भएको छ।
एक ५० वर्षीय कोरोना संक्रमित पुरुषको शुक्रबार अकल्यान्ड अस्पतालमा मृत्यु भएको छ । उनको केही दिनदेखि सघन उपचार कक्षमा उपचार भइरहेको स्वास्थ्य मन्त्रालयले जनाएको छ।
विश्वकै सम्पन्न राष्ट्रहरुमध्येको एक साउदी अरेबियाले हजारौं अफ्रिकी आप्रवासीहरुलाई कोभिड-१९ नियन्त्रणको प्रयास भन्दै जघन्य अवस्थामा थुनिएका छन्।
ले गरेको अनुसन्धानका क्रममा उक्त हिरासतमा रहेका आप्रवासीले मोबाइलबाट पठाएका तस्बिरहरुमा दर्जनौं पुरुषहरुलाई दयनीय अवस्थामा एउटा सानो बन्द कोठामा राखिएको देखिन्छ। अरबको गर्मीमा कमिजविहीन देखिएका ती पुरुषहरुलाई खाँदेर लाइनबद्ध राखेको देखिन्छ।
संयुक्त राज्य अमेरिकाको प्रहरीले पोर्टल्यान्ड आन्दोलनका क्रममा भएको झडपमा चलाइएको गोली व्यक्ति पक्राउ गर्ने क्रममा दाबी गरेको छ।
यसअघि पोर्टल्यान्डमा 'ब्ल्याक लाइफ म्याटर्स' का प्रदर्शनकारी र राष्ट्रपति डोनाल्ड ट्रम्पका समर्थकबीच भएको झडपमा गोली चलाउने ४० वर्षीय माइक रेनोहीमाथि अनुसन्धान भइरहेको थियो।
केही दिनअघि पब्जी लगायतका ११८ वटा चिनियाँ एपहरुमा प्रतिबन्ध लगाएको भारतले अब 'फौजी' नामको मल्टीप्लेयर एक्सन गेम लन्च गर्ने भएकाे छ। मल्टिप्लेयर एक्सन गेम फौजीलाई अभिनेता अक्षय कुमारले प्रवद्र्धन गर्ने बताइएको छ।
पूर्वी लद्दाखमा जारी सैन्य तनावका बीच चीनका रक्षामन्त्री वेई फेंघेले भारतका रक्षामन्त्री राजनाथ सिंहसँग छलफलका लागि समय मागेका छन्।
‘द इन्डियन एक्सप्रेस’ अखबारमा प्रकाशित समाचारअनुसार दुवै नेताहरु अहिले सांघाई सहयोग संगठन (एससीओ) को बैठकका लागि रुसको मस्कोमा छन्। अखबारले चिनियाँ रक्षामन्त्रीले शुक्रबारका लागि छलफल गर्ने पहल गरेको उल्लेख छ।
हलिउड अभिनेता रोबर्ट प्याटिन्सनलाई कोरोना संक्रमण देखिएपछि 'ब्याटम्यान' सुटिङ रोकिएको छ। फिल्म निर्माण कम्पनी वार्नर ब्रदरले प्रोडक्सन टिमकै एकजना आइसोलेसनमा बस्न गएको बताएका छन्।
