छोटकरीमा आज - २०७७ भाद्र १६, मंगलबार

आज कोरोना भाइरसको पछिल्लो वस्तुस्थिति, नेपालमा कोरोना भाइरसको खोपको तत्काल परीक्षण नहुने, पाँच महिनापछि खुल्यो नियमित अन्तर्राष्ट्रिय उडान, नेपालले माग्यो बंगलादेशसँग ५० हजार टन यूरिया मल पैँचो, ला लिगाको नयाँ सिजनको खेल तालिका सार्वजनिक,यूएई पुग्यो इजरायलको पहिलो व्यापारिक उडान लगायतका विषयवस्तुहरूलाई समावेश गरिएका छन्।



मंगलबार १,०६९ जना थपिएसँगै नेपालमा कोरोना संक्रमितको कुल संख्या ४०,५२९ पुगेको छ भने मृत्यु हुनेको संख्या २३९ पुगेको छ।

हालसम्म नेपालमा २२,१७८ जना कोरोना संक्रमित निको भएका छन्।

=> PCR परिक्षण : ७,०५,५६० => क्वारेन्टाइनमा : ७,३९०

सम्बन्धित :

  • पछिल्लो २४ घन्टामा १२ हजार ८८ जनाको नमुना पिसिआर विधिबाट परीक्षण गरिएको छ भने सात सय ६८ जना संक्रमणमुक्त भएर डिस्चार्ज भएको स्वास्थ्य तथा जनसंख्या मन्त्रालयले जनाएको छ। संक्रमित निको हुने दर ५५ प्रतिशत रहेको मन्त्रालयले जनाएको छ । सोमबार संक्रमणमुक्त हुने दर ५४ प्रतिशत थियो।
  • नेपालमा कोरोनाकै कारण १० जनाको मात्र मृत्यु भएको सरकारले जनाएको छ। अन्य व्यक्तिहरुमा पहिल्यै निमोनियाँ, मधुमेह, उच्च रक्तचाप, मिर्गौलाको समस्या, मुटु रोग र हाइपोथाइरोडिजम भएकाले कोरोना संक्रमणसमेतका कारण मृत्यु भएको बताएइको हो। जसमा सबैभन्दा बढी प्रदेश-२ मा ७ जना छन्।
  • जबर्जस्ती करणीको अभियोगमा पक्राउ गरी प्रहरीले क्वारेन्टिनमा राखेका एक अभियुक्त सोमबार साँझ फरार भएका छन्। गौर नगरपालिका– ४ का २२ वर्षीय रोहितकुमार यादव क्वारेन्टिनबाट फरार भएको प्रहरीले जनाएको छ। 
  • काम गर्ने वातावरण नभएको भन्दै धरानस्थित बिपी कोइराला स्वास्थ्य विज्ञान प्रतिष्ठान धरानको ‘कोभिड– १९ अस्पताल’ सञ्चालनको नेतृत्व सम्हाल्दै आएकी एनेस्थेसिया विभागकी प्रोफेसर डा. कृष्णा पोखरेलले राजीनामा दिएकी छिन्। अस्पताल प्रमुख डा. कृष्णा पोखरेलले उपकुलपति डा. ज्ञानेन्द्र गिरीसमक्ष मंगलबार राजीनामा दिएकी हुन्। 
  • पूर्व न्यायाधीश माधवप्रसाद चालिसेको निधन भएको छ। ७० वर्षिय चालिसे मुटुसम्बन्धी रोगबाट पीडित थिए। राजधानीको गंगालाल हृदय केन्द्रमा उनको निधन भएको हो। परीक्षणका क्रममा कोरोना संक्रमण पुष्टि भएको थियो। 
  • प्रदेश १ का सामाजिक विकास मन्त्री जीवन घिमिरेलाई कोरोना संक्रमण पुष्टि भएको छ। सोमबार राति कोसी अस्पतालको प्रयोगशालामा गरिएको पीसीआर परीक्षणमा मन्त्री घिमिरेको कोरोना रिपोर्ट पोजिटिभ आएको उनका स्वकीय सचिव राम पोखरेलले बताए।


कोरोना नियन्त्रण सम्बन्धी निर्णयहरू :

  • उपत्यकाका तीन जिल्ला काठमाडौं, भक्तपुर र ललितपुरका प्रमुख जिल्ला अधिकारी (सीडीओ) को भर्चुअल बैठकले गृह मन्त्रालयबाट स्वीकृति लिएरमात्रै निषेधाज्ञा सम्बन्धी विषयमा निर्णय लिने निष्कर्ष निकालेको छदैनिक उपभोग्य बस्तु विक्रि वितरणमा बिहान ९ बजेसम्म कायम गरिएको समयसीमा हेरफेर गर्ने, अतिआवश्यक र राष्ट्रिय गौरवका आयोजनालाई आवश्यक सावधानी अपनाएर सुचारु गर्नेलगायत विषयमा पनि कुरा उठेको बताइएको छ
  • कोरोना संक्रमणका कारण सडकमा ट्राफिक प्रहरी आफैँ बसेर जनचेतना फैलाउन असहज भएपछि काठमाडौं उपत्यकामा ‘डमी ट्राफिक प्रहरी’ राखिएको छ। महानगरीय ट्राफिक प्रहरी महाशाखाले सडक शिक्षा कार्यक्रमलाई प्रभावकारी रूपमा लागू गरी सडक दुर्घटना न्यूनीकरण गर्न काठमाडौंका २२ स्थानमा सचेतनामूलक जानकारीसहितका डमी ट्राफिक प्रहरी राखेको हो।
  • कोरोना भाइरससम्बन्धी खोपको नेपालमा गर्ने भनिएको तेश्रो चरणको परीक्षण तत्कालै नहुने अधिकारीहरूले बताएका छन्। परीक्षणका लागि इच्छुक कम्पनीलाई प्रस्ताव पठाइने र नेपाललाई हुने फाइदाबारे छलफल गरेर मात्रै निर्णय लिइने बताइएको छ।
  • सिराहाको गोलबजार नगरपालिकाले नगर क्षेत्रमा कोरोना संक्रमितको संख्या बढ्न थालेपछि ‘एक घर एक पीसीआर जाँच’ अभियान चलाएको छ। कार्यपालिकाले नगरको १ देखि १३ नं. वडामा पर्ने हरेक गाउँ टोलमा पीसीआर जाँच बढाउने निर्णयसँगै मंगलबारबाट स्वास्थ्यकर्मीहरूको टोलीले समुदायस्तरमा स्वाब संकलन थालेको नगर स्वास्थ्य शाखा प्रमुख सरोज कर्णले बताए। जिल्ला प्रशासन कार्यालय सिराहाले निषेधाज्ञा २७ भदौसम्मका लागि बढाएको छ। 
  • ई–कमर्स पुनः सञ्‍चालनमा आएको छ। अत्यावश्यक सेवाअन्तर्गत तोकिएका औषधि, खाद्यवस्तु, इन्धन, खाना पकाउने ग्यास, तरकारी, फलफूल, दूध तथा दूग्धजन्य पदार्थ साथै प्याकेजिङका सामग्रीहरू मात्र होम डेलिभरी गरिएको मेरो किरानाका सागरदेव भट्टले जानकारी दिए।
  • जिल्ला प्रशासन कार्यालय मोरङले निषेधाज्ञालाई निरन्तरता दिएको छ। एक साताका लागि अर्थात भदौ २२ गते राति १२ बजेसम्मका लागि निषेधाज्ञा बढाइएको हो । तर, अब बजार भने अपरान्ह ४ बजेसम्म खोल्न पाइने भएको छ। 


भदौ १४ गते बसेको मन्त्रिपरिषद्ले चैत १६ गते अगाडि सिपिङ भइसकेको मरिच र केराउ आयात गर्न स्वीकृति दिए पनि निकै ढिलो भएको खुलेको छ। पाँच महिना बन्दरगाहमा रोकिँदा कुहिसकेको मरिच र केराउ सरकारले आयात गर्न अनुमति दिए पनि त्यस्ता सामग्री कामै नलाग्‍ने स्थितिमा पुगेको हो।

विदेशी मुद्रा बाहिरिन रोक्न भन्दै चैत १६ गते बसेको मन्त्रिपरिषद्ले मरिच र केराउनसँगै मदिरा, छकडा र महंगा गाडी आयात रोकेको थियो।

सम्बन्धित :

  • नेपालले बंगलादेशसँग ५० हजार टन यूरिया मल औपचारिकरुपमै पैँचो मागेको छ। मंगलबार प्रधानमन्त्री केपी शर्मा ओलीले बंगलादेशकी समकक्षी शेख हसिनासँग टेलिफोन संवाद गर्दै ५० हजार टन यूनिया मल पठाइदिन आग्रह गरेका हुन् । यो सिजनको लागि करिब १ लाख ५० हजार टन यूरिया मल आवश्यक पर्ने र नपुग ५० हजार टन बंगलादेशसँग पैँचोमा मागिएको कृषी मन्त्री धनश्याम भुसालले बताए। 


परीक्षणकालभित्रै बिनाजानकारी स्वदेश फिर्ने श्रमिक अर्को काम गर्न तुरुन्तै कतार जान नपाइने भएको छ। परीक्षणकाल ६ महिनाको हुनेछ। कतारले भदौ १४ गते जारी गरेको रोजगारदाता परिवर्तन गर्नका लागि रोजगारदाताको अनुमति नचहिनेसम्बन्धी जारी गरेको नयाँ नियमले यस्तो व्यवस्था गरेको हो।



नेपालले स्थलगत मापन गरेर पहिलोपटक आफैँले सगरमाथाको 'वास्तविक उचाइ यकिन गरिसकेको' अधिकारीहरूले बताएका छन्।

तर त्यससम्बन्धी प्रतिवेदनलाई अन्तिम रूप दिन बाँकी रहेको र 'प्रक्रिया पूरा गरेर चाँडै सार्वजनिक गरिने' उनीहरूको भनाइ छ।



विश्वव्यापी महामारीका रूपमा फैलिएको कोभिड– १९ संक्रमण नियन्त्रणका लागि देशभर लागू गरिएको बन्दाबन्दीको पाँच महिनापछि नियमित अन्तर्राष्ट्रिय उडान सुचारु भएको छ।

भदौ ४ गतेको मन्त्रिपरिषद् बैठकले कोभिड– १९ महामारीबाट बचेर सुरक्षित उडानका लागि पिसिआर परीक्षण सहज भएका देशहरूबाट सर्तसहितको नियमित उडान गर्ने निर्णय गरेको हो। 



नेपाल आयल निगमले पेट्रोलको मूल्य बढाएको छ। मंगलबार रातिदेखि लागु हुने गरी पेट्रोल २ रूपैयाँले महँगिएर १ सय ७ रूपैयाँ प्रतिलिटर कायम भएको हो।

निगमका अनुसार डिजल मट्टितेल, हवाइ इन्धन तथा खाना पकाउने ग्यासको मूल्य भने यथावत् राखिएको छ।



नेपाल चिकित्सक संघले कोरोना संक्रमण भइ निको भएका व्यक्तिहरुलाई प्लाज्मा दान गर्न आग्रह गरेको छ। 

संघले मंगलबार प्रेस विज्ञप्ति जारी गर्दै संक्रमण भइ निको भएका व्यक्तिहरुले दान गरेको ‘एक पिन्ट प्लाज्मा’ बाट हजारौं मानिसलाई जोगाउन सकिने भएकाले निको भएका व्यक्तिहरुले प्लाज्मा दान गर्न आग्रह गरेको हो। प्लाज्मा दान गर्दा कुनै पनि शारीरिक र मानसिक असर नगर्ने बताइएको छ।



नेपाल प्रहरीले प्रदेश र स्थानीय तहबाट बजेट पाउन थालेपछि पूर्वाधार विकासमा केही सुधार गरेको छ। स्रोतसाधनको अभाव झेल्दै आएको प्रहरीले यो वर्ष ३९ वटा नयाँ भवन र ९२ वटा ब्यारेक बनाउने भएको छ।  



बेलायत सरकारले कोरोनाको कारण जनाउँदै ब्रिगेड अफ गोर्खाजका निम्ति यस पटक ब्रिटिस आर्मीमा ३ सय ४० र सिंगापुर पुलिस फोर्समा १ सय ४० जना मात्र भर्ती गर्ने भएको छ। गत वर्ष ब्रिटिसमा ४ सय ३२ र सिंगापुरमा २ सय २० भर्ती लिइएको थियो। 



कोरोना भाइरस महामारीका कारण विद्यार्थीहरू केन्द्रमा उपस्थित भएर परीक्षा सञ्चालन गर्न नसक्ने भएपछि पूर्वाञ्चल विश्वविद्यालयले वैकल्पिक (टाइम–बाउन्ड होम एक्जाम) विधिबाट परीक्षा लिने भएको छ।

पूर्वाञ्जल विश्वविद्यालय प्राज्ञिक परिषद्को आइतबार र कार्यकारी परिषद्को सोमबारको बैठकले असोज पहिलो साताबाट परीक्षा सञ्चालन गर्ने निर्णय गरेको हो।



स्पेनिस ला लिगा फुटबलको नयाँ सिजनको खेल तालिका सार्वजनिक भएको छ। सोमबार सार्वजनिक २०२०-२१ खेल तालिकाअनुसार नयाँ सिजन पहिलो एल क्लासिको अक्टोबरमा हुने भएको छ।

तालिका अनुसार बार्सिलोना र रियल मड्रिडबीचको एल क्लासिको भिडन्त अक्टोबर २५ मा क्याम्प नाउमा हुनेछ। यस्तै दोस्रो एल क्लासिको सान्टियागो बर्नाबेउमा भिडन्त अप्रिल ११ हुनेछ।



अमेरिकी राष्ट्रपति डोनल्ड ट्रम्पले हालैका हिंसक झडपमा आफ्ना समर्थकहरूको भूमिकाको बचाउ गरेका छन्।

उनले विन्सकन्सिन राज्यमा दुई जनाको हत्याको आरोप लागेका किशोर र ओरेगनमा भएको झडपमा सङ्लग्न समर्थकहरूले आत्मरक्षामा गरेको बताएका छन्।

सम्बन्धित :

  • आउँदो अमेरिकी राष्ट्रपति चुनावमा डेमोक्र्याटिक उम्मेदवार जो बाइडनले राष्ट्रपति ट्रम्पलाई हिंसा गलत हो भन्न चुनौती दिएका छन्। बाइडनले ट्रम्पलाई 'देशमा हिंसा भड्काउने कमजोर र विशाक्त नेता' भनेका छन्।
  • संयुक्त राष्ट्र अमेरिकाका राष्ट्रपति डोनाल्ड ट्रम्प केनोशा पुगेसँगै प्रहरीको गोली लागेर घाइते भएका अश्वेत ज्याकोब ब्लेकका बाबुले छोराको जीवनमाथि राजनीति नगर्न आग्रह गरेका छन्। ब्लेकलाई प्रहरीले गोली हानी घाइते बनाएपछि पछिल्ला साताहरुमा अमेरिकामा रंगभेदविरुद्धको आन्दोलन थप चर्किएको हो। राष्ट्रपति ट्रम्पले केनोशा भ्रमणका क्रममा प्रहरी अधिकारीहरुसँग भेट गर्नेछन्। तर, ब्लेकको परिवारलाई भने उनले नभेट्‌ने जनाइएको छ। 



 गत मे ६ देखि बेपत्ता नेपालका लागि बेलायती पूर्वराजदूत रिचर्ड मोरिसको खोजीमा जुटेको ह्याम्पशायर प्रहरीले एलिस होल्ट जंगलमा एउटा शव फेला पारेको बताइएको छ। प्रहरीले मोरिसको निधनलाई शंकास्पद नमानेको पनि बेलायती सञ्‍चारमाध्यमले उल्लेख गरेका छन्।



इजरायल र संयुक्त अरब इमिरेट्स (यूएई) बीचको पहिलो व्यापारिक उडान दुबई उत्रिएको छ।

बेन गुरिओन विमानस्थलबाट इजरायल तथा अमेरिकाका उच्च अधिकारीहरुसहित उडेको इजरायली ध्वजाबाहक अल–एल विमान यूएईको अबुधाबीमा अवतरण गरेको हो।


सम्बन्धित सामग्री

कञ्‍चनपुरको बेलौरीमा प्रहरी र तस्करबीच गोली हानाहान, एक भारतीयको मृत्यु

सीमा क्षेत्रमा गस्ती गरिरहेको इलाका प्रहरी कार्यालयको टोलीले चलाएको गोली लागेर एक तस्करको मृत्यु भएको छ। कञ्चनपुरको बेलौरी नगरपालिका ७ पौलाहामा प्रहरी र तस्करबीच गोली हानाहान भएको हो।

छोटकरी सम्पादक

म्यान्मारमा '३८ जनाको मृत्यु, कू यताकै रक्तपातपूर्ण दिन'

म्यानमारमा सेनाको आक्रमणबाट बुधबार एकैदिन ३८ जना प्रदर्शनकारीको ज्यान गएको छ । नेतृ आङ सान सुकीलगायत नेताहरुको रिहाइको माग गर्दै म्यानमारमा १ महिनाभन्दा लामो प्रदर्शन भइरहेको छ ।

छोटकरी सम्पादक

एक विधवा महिला, जसले ६ सय विवाहित पुरुषहरूको खुलेआम कत्लेआम गरिन्!

जूलिया टूफाना मेकअपको भाँडो (काँचको सिसी)मा विष बोकेर हिँड्ने गर्थीन्। वर्षौसम्म सयौँ व्यक्तिहरूलाई मार्दै रहिन्, कसैलाई कानोकान खबर पनि भएन। टूफना कसरी गर्थीन् हत्या? र सुराक किन कसैले भेट्टाएन? छ सयको हाराहारीमा विवाहित पुरुष 'बलीको बख्रो' बन्न उनीसमक्ष कसरी पुगे? प्रश्नहरूको उत्तर खोज्दै जाऔँ!

छोटकरी सम्पादक

पाकिस्तान र टर्कीबीच ऐतिहासिक ‘रेल सेवा’ सुचारु हुने

एक दशकदेखि बन्द रहेको पाकिस्तान र टर्कीबीच मालबाहक रेल सेवा आजदेखि सुरु हुने भएको छ। अहिले विश्व बजारमा चीनको बढ्दो प्रभावलाई फाइदा हुने गरी यो सेवा पुनः सुरु गर्न लागिएको हो।

छोटकरी सम्पादक

संसदलाई कोरोना खोप : योगेश र ईश्वर पोख्रेलको भेट, तर एक अर्कासँग बोल्दै बोलेनन्!

प्रतिनिधिसभाको बैठक नजिकिँदै गर्दा संसद् सचिवालयले सांसदहरूलाई कोरोनाविरुद्धको ‘कोभिसिल्ड भ्याक्सिन’ लगाइदिन सुरु गरेको छ । जहाँ एउटा रमाइलो दृश्य देखियो, नेकपा प्रचण्ड नेपाल खेमाका नेता योगेश भट्टराई र बहालवाला उपप्रधानमन्त्री ईश्वर पोख्रेलबीचको भेट। तर २० मिनेटको अवधि दुवै एक-अर्कासँग बोलेनन्।

छोटकरी सम्पादक

प्रतिनिधि सभा बैठकको सम्पूर्ण तयारी पूरा, ओली र प्रचण्ड समूह आमुनेसामुने हुँदै

पुस ५ गते विघटन भएको प्रतिनिधि सभाको बैठक फागुन २३ गते आइतबार बस्दैछ । पुस ५ गतेदेखि नै आमने सामने हुन नसकेका नेकपाका दुई अध्यक्षद्वय केपी शर्मा ओली र पुष्पकमल दाहाल आइतबार नै संसद् सचिवालयमा आमने सामने हुने देखिएको छ । त्यो दृश्य कस्तो हुनेछ, आउनुहोस् जानौं ।

छोटकरी सम्पादक

यी हुन् नेकपा प्रचण्ड–माधव समूहको केन्द्रीय कमिटी बैठकका निर्णय

नेपाल कम्युनिष्ट पार्टी(नेकपा) प्रचण्ड–माधव समूहको केन्द्रीय कमिटी बैठकले स्थायी कमिटी सदस्य सुवासचन्द्र नेम्वाङसहित ७ जनालाई कारबाही गरेको छ। बैठकले ओलीलले राजीनामा नदिएकोमा निन्दा समेत गरेको छ। थप केके निर्णय भए, आउनुहोस् जानौं।

छोटकरी सम्पादक