आज कोरोना भाइरस सम्बन्धी पछिल्लो वस्तुस्थिति, उपत्यकासहित कोरोना संक्रमित बढेको जिल्लाहरूमा निषेधाज्ञा, राष्ट्रिय सम्मानसहित राष्ट्रकविको अन्त्येष्टि, पत्रकार महासंघको कार्यकाल ६ महिना थपियो, निर्वाचन आयोगले दर्ता गर्याे नेकपा एमाले नामकाे दल, आमिर खान फेरि पनि विवादमा, मालीमा सैनिक कू, राष्ट्रपति र प्रधानमन्त्री हिरासतमा लगायतका विषयवस्तुहरूलाई समावेश गरिएका छन्। ,
बुधबार ६८१ जना थपिएसँगै नेपालमा कोरोना संक्रमितको कुल संख्या २८,९३८ पुगेको छ भने मृत्यु हुनेको संख्या १२० पुगेको छ।
हालसम्म नेपालमा १७,७०० जना कोरोना संक्रमित निको भएका छन्।
=> PCR परिक्षण : ५,५४,३८८ => क्वारेन्टाइनमा : १३,५७१
सम्बन्धित :
- कोभिड-१९ का कारण सर्वोच्च अदालतलगायतका सबै अदालतले सेवा कटौती गरेका छन्। अत्यावश्यक प्रकृतिका विषयमात्र अदालतले हेर्ने गरेको छ। अदालतमा भिडभाड हुँदा कोरोनाको संक्रमण बढ्ने भन्दै सर्वोच्च अदालतसहितका अदालतहरुले सेवा कटौती गर्नुपरेको बताएका छन्। मन्त्रिपरिषद्को साउन २६ गते बसेको बैठकले भदौ १६ सम्म सार्वजनिक यातायात नचल्ने निर्णय गरेकाले हदम्याद, म्याद, तारिखमा उपस्थित हुनुपर्ने अवस्थाका सेवाग्राहीलाई भदौं १६ गतेदेखि बाटाको म्यादबाहेक ३० दिनभित्र उपस्थित भए हुने सूचना जारी गरेको छ।
- सरकारले कोरोना संक्रमितका उपचारका लागि निजी अस्पतालहरुले २० प्रतिशत बेड नछुट्याए पीसीआर परीक्षणका लागि दिइएको अनुमति खारेज गरिने बताएको छ। कोभिड उपचारका लागि हरेक अस्पतालले २० प्रतिशत बेड र मेडिकल कलेजले एक तिहाइ आइसोलेसन बेड छुट्याउन निर्देशन दिएको छ।
- काठमाडौं उपत्याकामा बुधबार राती १२ बजेदेखि एक साता लामो निषेधाज्ञा सुरु हुँदैछ, बढ्दो कोभिड-१९ संक्रमण रोकथाम तथा नियनत्रणका लागि भन्दै अत्यावश्यक बाहेकका सबै सेवा सञ्चालन एक साताका लागि निषेध गरिएको उपत्याकाका तीन वटै जिल्ला प्रशासन कार्यालयहरुले जनाएका छन्। तर, बजारमा निषेधाज्ञालाई कडा किसिमको कर्फ्यु भनेर प्रचार गरिएपछि खुद्रा साना व्यवसायी तथा सर्वसाधणहरु खाद्यान्न र तरकारीसमेत किन्न नपाउने हो कि भन्ने अन्यौलमा परेका छन्, तर त्यसो नभएको प्रष्ट पारिएको छ।
- काठमाडौं उपत्यकाका तीन जिल्लामा बुधबार थप एक सय ५९ जनामा कोरोना संक्रमण पुष्टि भएको छ। काठमाडौंमा एक सय ३४, ललितपुरमा १७ र भक्तपुरमा आठजना संक्रमित भएको स्वास्थ्य तथा जनसंख्या मन्त्रालयले जनाएको छ।
- काठमाडौं जिल्लाका प्रमुख जिल्ला अधिकारी जनकराज दाहालले पूर्वसावधानीको रुपमा काठमाडौं उपत्यकामा तत्कालै मानिसको आवागमनलाई ठप्प नपार्ने हो भने विकराल अवस्था आउन सक्ने देखिएपछि तीनवटै जिल्लाको सुरक्षा समितिको बैठक बसेर निषेधाज्ञा जारी गरिएको बताएका छन्।
नक्सा सहितको नयाँ प्रतीक चिन्हको ब्याच पिन (लोगो) मा संरचनागत र साजसज्जा सम्बन्धी समस्या देखिएको बताउँदै सुधार र परिमार्जनका लागि फिर्ता पठाएको सङ्घीय संसद् सचिवालयले जनाएको छ।
सङ्घीय संसद् सचिवालयका प्रवक्ता रोजनाथ पाण्डेले उक्त लोगो बनाउने जिम्मेवारी लिएको घरेलु तथा साना उद्योग कार्यालय, ललितपुरले लोगो निर्माणमा भएका कमी कमजोरी स्वीकार गरेको छ।
राष्ट्रकवि माधव घिमिरेको राष्ट्रिय सम्मानसहित बुधबार पशुपति आर्यघाटमा अन्त्येष्टि गरिएको छ। घिमिरेको एक सय एक वर्षको उमेरमा आफ्नै निवासमा मंगलबार साँझ निधन भएकाे थियाे। बुधबार नेपाली सेनाले अन्तिम सलामी अर्पण गरेर घिमिरेको राष्ट्रिय सम्मान सहित अन्त्येष्टि गरिएको हो।
कोरोनाका कारण महाधिवेशन हुन नसक्ने अवस्था भएको बताउँदै नेपाल पत्रकार महासंघको कार्यकाल ६ महिना थपिएको छ।
नेपाल पत्रकार महासंघको केन्द्रीय समितिको ३ वर्षे कार्यकाल भदौ ५ गते समाप्त हुँदै थियो । ६ महिना थपिएपछि फागुनसम्मका लागि वर्तमान कार्यसमितिले काम गर्नेछ ।
महासंघले आर्थिक अभाव झेलिरहेका सञ्चारमाध्यम र श्रमजीवी पत्रकारका लागि उचित राहतको व्यवस्था गर्न संघीय, प्रदेश र स्थानीय सरकारहरूसँग माग गरेको छ।
सम्बन्धित :
- सरकारले प्रेस काउन्सिलको नियममा थप व्यवस्था गरेर कार्यवाहक अध्यक्षको जिम्मेवारी दिँदा काउन्सिलको स्वायत्ततामा अनुचित असर पर्ने भन्दै सर्वोच्च अदालतले अन्तरिम आदेश जारी गरेको छ। यो आदेशसँगै सरकारले नै तोकेको कार्यवाहक अध्यक्ष दुर्गा भण्डारीले काम गर्न नपाउने भएकी छन्। त्यसो हुँदा यसअघिकै कार्यवाहक अध्यक्ष किशोर श्रेष्ठले निरन्तर काम गर्न पाउनेछन्।
नेपालको राष्ट्रिय झन्डा जलाएको र जातीयता भड्काएको अभियोगमा प्रहरीले नौजनालाई पक्राउ गरेको छ।
मुख्य नाइके ग्याल्जेन दोर्जे तामाङ भन्ने रोजितकुमार तितुङ, लावाङ तामाङ, चलाखमान तामाङ, मंगोल बुद्ध भनिने अनोजकुमार तितुङ, सञ्जय भन्ने हुत्तबहादुर तामाङ, कमलबहादुर लामा तामाङलाई सिआइबीले पक्राउ गरेको हो। उनीहरूमध्ये रोजितकुमार तितुङ गायक भएको प्रहरीले जनाएको छ।
प्रधानमन्त्री केपी शर्मा ओली सहित कोभिड-१९ संकट व्यवस्थापन सञ्चालन केन्द्रको बैठक बसिरहेको छ। प्रधानमन्त्री निवास बालुवाटारमा बसेको बैठकमा कोरोना नियन्त्रण तथा रोकथामका लागि सरकारले गरेको कामकारवाहीको समीक्षा भएको बताइएको छ।
निर्वाचन आयोगले ‘नेकपा एमाले’ नामको नयाँ दल दर्ता गरेको छ। खाली रहेको नेकपा एमाले नामको दल दर्ता गराउन १२ असारमा निवेदन परेको थियो। नेकपा एमाले दर्ताका लागि निवेदन परेपछि नेकपाभित्र तरंग पैदा भएको थियो।
डेमोक्र्याटिक पार्टीको सम्मेलनले जो बाइडनलाई औपचारिक रूपमा राष्ट्रपतीय निर्वाचनका लागि उम्मेदवार बनाएको छ।
डेमोक्र्याटिक पार्टीबाट राष्ट्रपति बनेका बिल क्लिन्टन र जिमी कार्टर तथा रिपब्लिकन पार्टीको सरकार हुँदा विदेशमन्त्री रहेका कोलिन पावलले जो बाइडनलाई समर्थन गरेका छन्।
फिल्म ‘लालसिंह चड्ढा’को सुटिङका क्रममा टर्कीका राष्ट्रपति रेसेप तैथ्यप अर्दोआनकी पत्नी एमिन अर्दोआनसँग भेट गरेपछि अभिनेता आमिर खान विवादमा तानिएका छन्।
टर्की भारतद्वारा जम्मु–कश्मीरको धारा ३७० खारेज गर्ने निर्णयको विरुद्ध बोल्दै आएको छ।
मालीमा सैनिक ‘कू’ भएको छ । सेनाले राष्ट्रपति, प्रधानमन्त्रीलगायतलाई हिरासतमा लिएर सत्ता हातमा लिएको छ।
त्यसअघि राष्ट्रपति इब्राहिम बुबाकारले टेलिभिजन सम्बोधन गर्दै पदबाट राजीनामा दिएको घोषणा गरेका थिए। साथै उनले संसद र सरकार भंग गरेको जानकारी पनि दिए।
