आज नेपालमा कोरोना संक्रमण, निर्मला हत्या प्रकरण : एसपी विष्टसहित ८ प्रहरीले पाए सफाइ, बिहीबारदेखि खुल्दै पर्यटकीय व्यवसाय, ३० हजार मेट्रिकटन चिनी आयात गर्न साल्ट ट्रेडिङ र खाद्यलाई अनुमति, मोडर्नाले तयार पारेको कोरोनाविरुद्धको खोपले बाँदरमा राम्रो काम गर्याे, मङ्गोलियामा शिशु कक्षा र विद्यालय सञ्चालन गर्ने तयारी लगायतका विषयवस्तुहरूलाई स्थान दिइएको छ।
बिहीबार २७४ जना थपिएसँगै नेपालमा कोरोना संक्रमितको कुल संख्या १९,२७३ पुगेको छ भने मृत्यु हुनेको संख्या ५२ पुगेको छ।
हालसम्म नेपालमा १४,२४८ जना कोरोना संक्रमित निको भएका छन्।
=> PCR परिक्षण : ३,६४,६४८ => क्वारेन्टाइनमा : १३,२०१
कञ्चनपुरकी १३ वर्षीया बालिका निर्मला पन्तको बलात्कारपछि हत्या प्रकरणमा प्रमाण नष्ट र यातनाविरुद्धको कसुरमा मुद्दा खेपिरहेका एसपी दिल्लीराज विष्टसहित आठजना प्रहरीले सफाइ पाएका छन्।
कञ्चनपुर जिल्ला अदालतले उनीहरुलाई सफाइ दिएको हो।
सरकारले मुग्लिन–नारायणगढ सडकमा चल्ने हलुका(२५ रुपैयाँ) तथा भारी सवारी(५५ रुपैयाँ) बाट शुल्क असुल्ने निर्णय गरेको छ।
कोरोनाका कारण बन्द रहेका ट्राभल, ट्रेकिङ, पर्वतारोहणलगायतका पर्यटकीय व्यवसाय आजदेखि खुल्दैछन्।
अहिले यी व्यवसायीले पर्यटकीय सिजनको लागि अग्रिम बुकिङ र अन्य तयारी गर्ने र कोरोनाको सङ्क्रमण कम हुँदै गएपछि पर्यटकका लागि खुला गरिनेछ।
सरकारले सहुलियतको ३० हजार मेट्रिकटन चिनी आयात गर्न साल्ट ट्रेडिङ र खाद्य व्यवस्था तथा व्यापार कम्पनीलाई अनुमति दिएको छ।
आयात हुने चिनीमा ५० प्रतिशत भन्सार छुट गरिनेछ।
काठमाडौंको महानगरीय प्रहरी वृत्त, दरबारमार्गका प्रमुख डीएसपी रञ्जन दाहाललाई जिम्मेवारीबाट हटाइएको छ।
१५ किलो ‘सुन’ भनेर बरामद भएको पहेँलो धातु प्रकरणमा मुछिएपछि डीएसपी दाहाललाई छानविनका लागि महानगरीय प्रहरी वृत्त दरवारमार्गको नेतृत्वबाट हटाइएको प्रहरी स्रोतले जनाएको छ। दाहालको ठाउँमा डीएसपी रामशरण पौडेललाई पठाइएको छ।
कैलालीको भजनी नगरपालिका– ८ को पूरै बस्ती बाढीले विस्थापित भएको छ।
कान्द्रा, काँढा र पथरैया नदीमा आएको बाढी बस्तीमा पस्दा वडाको एक हजार एक सय ५० परिवार विस्थापित भएको वडाध्यक्ष पंकज चौधरीले बताए।
लामो समयदेखि ढिलाइ भइरहेको अफगान सरकार र तालिबानबीचको शान्तिवार्ता आगामी हप्ता शुरु हुने सम्भावना बढेको छ।
अफगान राष्ट्रपति अस्रफ घानीले तालिबानसँगको मध्यस्थता वार्ता हुन लागेको मंगलबार संकेत गर्नुका साथै दुबै पक्षबीच तीन दिने युद्धबिरामका लागि सहमति भएको छ।
मंगोलियाले कोरोनाका कारण लामो समयदेखि बन्द रहेका शिशु कक्षा र विद्यालयहरु आगामी सेप्टेम्बर १ देखि सुचारु गर्ने तयारी थालेको छ।
मंगोलियामा २१९ कोरोना संक्रमण देखिँदा हालसम्म कसैको पनि मृत्यु भएकोपाइएको छैन।
अमेरिकी बायोटेक कम्पनी मोडर्नाले तयार पारेको कोभिड–१९ को खोप बाँदरमा परीक्षण गर्दा निकै सकारात्मक नतिजा प्राप्त भएको अध्ययनले देखाएको छ।
खोप लगाइएका बाँदरका नाक र फोक्सोमा कोरोना भाइरसका विषाणु थप वृद्धि नभएको न्यु इंग्ल्यान्ड मेडिसिन जर्नलमा प्रकाशित अध्ययनमा उल्लेख छ।
