आज नेपालमा कोरोना संक्रमण, न्यायाधीशविरुद्ध महाभियोगको माग: 'अध्ययन गर्दै' बार,जेलमै बिहे गर्न पाइने गरी कानून बन्दै, गायिका सोफियाले सुरक्षा माग गर्दै दिइन् उजुरी, सुनको मूल्य प्रतितोला ९५ हजार ८०० रुपैयाँ, अमेरिकाद्वारा तीन चिनियाँ नागरिक पक्राउ, रुसले अन्तरिक्षमा हतियार परीक्षण गरेको यूके र अमेरिकाको आरोप
लगायका विषयवस्तुलाई समावेश गरिएका छन् ।
विहीबार ११३ जना थपिएसँगै नेपालमा कोरोना संक्रमितको कुल संख्या १८,३७४ पुगेको छ भने मृत्यु हुनेको संख्या ४४ पुगेको छ।
हालसम्म नेपालमा १२,९४७ जना कोरोना संक्रमित निको भएका छन्।
=> PCR परिक्षण : ३,३५,०८२ => क्वारेन्टाइनमा : १९,४४४
प्रधानन्यायाधीश चोलेन्द्रशमशेर जबरालाई महाअभियोग लगाउन माग गर्दै शुक्रबार माइतीघर मण्डलामा प्रदर्शन गरिएको छ। पत्नी हत्या आरोपमा जेलमा रहेका सशस्त्रका पूर्वडिआईजी रञ्जन कोइरालालाई रिहाको फैसला गरेसँगै प्रधानन्यायाधीश लगायतको विरोध सुरु भएको हो।
सम्बन्धित :
- सर्वोच्च अदालतका दुईवटा इजलासले गरेका दुईवटा निर्णय र आदेश चर्को विवादमा परेसँगै ती सम्बद्ध न्यायाधीशविरुद्ध महाभियोग लगाइनु पर्ने माग र चर्चा हुन थालेको छ।
नेपाली कांग्रेसले कोरोना महामारीको संक्रमण रोकथाम नियन्त्रणका लागि लागु गरेको लकडाउन खोल्दा सरकारले अनुत्तरदायी व्यवहार प्रदर्शन गरेको टिप्पणी गरेको छ।
आमजनजीवनले राहत महसुस गरे पनि बढ्दो संक्रमणकाबीच खोलिएको लकडाउनले संक्रमणको विस्तार हुन सक्ने थप जोखिमतर्फ समितिले चासो र चिन्ता रहेको जनाएको छ।
शुक्रबार सुनको मूल्यले नयाँ रेकर्ड कायम गरेको छ।
नेपाल सुनचाँदी व्यवसायी महासंघले शुक्रबारका लागि छापावाला सुनको मूल्य प्रतितोला ९५ हजार ८०० रुपैयाँ, तेजाबी सुनको मूल्य प्रतितोला ९५ हजार ३६५ रुपैयाँ र चाँदीको मूल्य प्रतितोला एक हजार १५० रुपैयाँ तोकेको छ।
प्रतिनिधिसभाको महिला तथा सामाजिक समितिले एसिड प्रहार गर्नेलाई कठोर सजाय दिन कानुन संशोधन गर्नुपर्ने बताएको छ।
पीडक निश्चित वर्ष जेल र निश्चित रकम जरिवाना तिरेर सामान्य जीवनमा फर्कन मिल्ने अवस्था उपयुक्त नभएको बताइएको छ।
सम्बन्धित :
- राष्ट्रिय मानवअधिकार आयोगले चितवनमा चेपाङ समुदायका परिवार र व्यक्तिमाथि भएका दुई फरक घटनाको निष्पक्ष छानबिन गरी दोषीमाथि कारबाही गर्न सरकारको ध्यानाकर्षण गराएको छ। आयोगले शुक्रबार विज्ञप्ति जारी गर्दै आगजनी गरी घर भत्काई विस्थापित तुल्याइएका व्यक्तिहरूको उचित बासको व्यवस्था गर्न तथा मृतक राजकुमार चेपाङको परिवारलाई उचित राहत उपलब्ध गराउन सरकारसँग आग्रह गरेको हो।
- कारागारको परम्परागत शैलीलाई हटाउन राज्य व्यवस्था तथा सुशासन समितिले ‘कारागार विधेयक’मा खुला कारागारसम्बन्धी व्यवस्था समेट्ने भएको छ। विधेयकले कैदीबन्दीहरूका लागि विवाह र प्रजननको अधिकार एवं अस्पताल तथा स्वास्थ्यचौकी रहने लगायत प्रावधान समावेश गरेको छ।
अभिनेता भुवन केसीले अभिनेत्री साम्राज्ञी राज्यलक्ष्मीविरुद्ध काठमाडौं जिल्ला अदालतमा गाली बेइज्जतीसम्बन्धी मुद्दा दर्ता गरेका छन्।
यसअघि अभिनेता भुवन केसीले साम्राज्ञी राज्यलक्ष्मी शाहले लगाएको दुर्व्यवहारको आरोपले आफ्नो चरित्र हत्या भएको भन्दै कलाकार संघमा उजुरी दिएका थिए।
सम्बन्धित :
- हाइलाइट्स नेपालले युट्युबबाट 'अबको तीज नो व्रत प्लिज'बोलको गीत प्राइभेट गरेपछि पनि गायिका सोफिया थापाले धम्की आइरहेको बताएकी छन्। निरन्तर अपशब्द र फोनबाट धम्की दिन थालेपछि सोफियाले नेपाल प्रहरीको साइबर ब्युरो र इलाका प्रहरी कार्यालय बुटवलमा मंगलबार सुरक्षाको माग गर्दै निवेदन दर्ता गराएकी छन्।
अमेरिकाले चार चिनियाँ नागरिकमाथि भिसा जालसाजी गरेको अभियोग लगाएको छ।
चारमध्ये तीनजनालाई पक्राउ गरिएको छ भने चौथो व्यक्तिलाई सङ्घीय जाँच ब्यूरो (एफबीआइ)ले खोजिरहेको छ।
रुसले भू-उपग्रहमा प्रहार गर्न सकिने क्षेप्यास्त्रजस्तो हतियारको अन्तरिक्षमा परीक्षण गरेको अमेरिका र यूकेले दाबी गरेका छन्।
अमेरिकी सरकारले भू-उपग्रहलाई मार हान्न सकिने क्षमता भएको उक्त अस्त्रको प्रयोगलाई चिन्ताको विषय भनेको छ।
