फागुन १२, पर्वत । प्रतिनिधि सभामा बिहीवार अमेरिकी सहयोग परियोजना एमसीसीमाथि छलफल गर्ने कार्यसूचि रहेको छ ।
संसद सचिवालयले संसदमा अर्थमन्त्री जनार्दन शर्माले एमसीसी सम्झौता पेश गर्ने सम्भावित कार्यसूचि सार्वजनिक गरेको छ । तर, महत्वपूर्ण कार्यसूचि छलेर अर्थमन्त्री शर्मा भने पर्वत आईपुगेका छन् ।
पारिवारिक घुमघामसहित उद्योग वाणिज्य संघको साधारण सभाको उद्घाटन कार्यक्रममा समेत सहभागी हुने भन्दै अर्थमन्त्री शर्मा मंगलवार कुश्मामा आएका हुन् । कुश्मामा बन्जिजम्पमा पुगेका शर्मा बुधवार राती त्यहिँ बास बसेका थिए । संसदमा एमसीसीमाथि छलफल गर्ने कार्यसूचि रहेपनि शर्मा दिनभर पर्वतमै रहने बुझिएको छ ।
गत आइतवार एमसीसी संसदमा टेबुल गर्दा पनि अर्थमन्त्री शर्मा विरामी भएको जानकारी गराएपछि सूचना तथा सञ्चारमन्त्री ज्ञानेन्द्रवहादुर कार्कीले पेश गरेका थिए । संसद बैठकमा आफ्ना साँसदलाई अनिवार्य उपस्थित हुन नेपाली काँग्रेसले ह्विप जारी गरेको छ ।
सत्तारुढ नेकपा माओवादी केन्द्र विपक्षमा उभिने निर्णय गरेको छ । माओवादी केन्द्र विपक्षमा उभिँदा अर्थमन्त्रीले प्रस्ताव पेश गर्न नैतिकताका आधारमा नमिल्ने भएकाले उनले संसद बैठक छलेको बुझिएको छ ।
