टेलिकमकी प्रवन्ध निर्देशक कामिनी राजभण्डारीले आफ्नो कार्यसम्पादन सम्वन्धमा सरकारलाई स्पष्टिकरण बुझाएकी छन्।
सूचना तथा संचार मन्त्रालयमार्फत भण्डारीले स्पष्टिकरण दिएको राज्यमन्त्री गोकुल बास्कोटाले जानकारी दिए।
यसअघि कार्यसम्पादन सन्तोषजनक नभएको भन्दै सरकारले उनीसित बैशाख २४ गते स्पष्टिकरण मागेको थियो।
त्यसअघि सञ्चार राज्यमन्त्री बास्कोटाले जिम्मेवारी सम्हालेलगत्तै दूरसञ्चार कम्पनीको कार्यालय पुगेर सुधारका लागि आवश्यक निर्देशन दिएका थिए। निर्देशन पालना नभएको भन्दै प्रधानमन्त्री केपी शर्मा ओलीले कामिनीलाई कार्यकक्षमै बोलाएर सचेत समेत गराएका थिए।
काठमाडौं र पोखराबाहेक अन्य स्थानमा फोरजी सेवा विस्तार गर्न नसकेको, ग्रामीण दूरसंचार कोषको रकमबाट मध्यपहाडी लोकमार्डमा बिच्छ्याइने अप्टिकल फाइबरमा ढिलाई भएको, टेलिकमको गुणस्तर बढ्न नसकेको जस्ता विषयलाई लिएर सरकारले उनीसँग स्पष्टिकरण माग गरेको हो।
टेलिकमले भने देशव्यापी फोरजी/एलटिई पूर्वाधार विस्तारका लागि टेन्डर छनौटको प्रक्रिया भइरहेको जनाएको छ। चिनियाँ दुई कम्पनीले यसका लागि टेन्डर दर्ता गराएका थिए।
२०७३ असोज महिनामा भण्डारी खुल्ला प्रतिस्पर्धाबाट टेलिकमको प्रवन्ध निर्देशकमा नियुक्त भएकी हुन्। उनको कार्यकाल ३ वर्षको रहेको छ।