चितवन (अस) । चितवन उद्योग संघ रत्ननगर इकाइ समितिले रत्ननगर नगरपालिकाको आव ०७८÷७९ कोे बजेट, नीति तथा कार्यक्रमका लागि सुझाव पेस गरेको छ ।
नगरपालिकाको सभाहलमा आयोजित सुझावपत्रलाई चितवन उद्योग संघ रत्ननगर इकाइ समितिका अध्यक्ष गजेन्द्र अधिकारी र चितवन उद्योग संघ अध्यक्ष राजु पौडेलले संयुक्त रूपमा रत्ननगरका नगरप्रमुख नारायण वनलाई हस्तान्तरण गरेका हुन् ।
हस्तान्तरण कार्यक्रममा चितवन उद्योग संघका अध्यक्ष पौडेलले संघले अघि सारेका महत्वपूर्ण परियोजना र रत्ननगर नगरपालिकाको बजेट, नीति तथा कार्यक्रमका लागि पेस गरिएका सुझावबारे जानकारी गराए ।
सो क्रममा औद्योगिक नीति निर्माण तथा चितवन प्रदर्शनी केन्द्र सञ्चालन विभागका संयोजक एवं चितवन उद्योग संघका उपाध्यक्ष युगराज वस्तीले उद्योग तथा रोजगारी र सीप विकास, राजस्व परामर्श, कृषि तथा पशुपक्षीसम्बन्धी सुझाव प्रस्तुत गरेका थिए ।
उक्त अवसरमा नगरपालिका प्रमुख वनले संघले ल्याएको सुझावलाई रत्ननगरको बजेट, नीति तथा कार्यक्रममा सम्बोधन गरिने बताए । कार्यक्रममा संघका निवर्तमान अध्यक्ष भेषराज दुवाडी, वरिष्ठ उपाध्यक्ष त्रिलोचन कँडेललगायत सहभागी थिए ।