वैशाख २४, काठमाडौं । यो साता तीन दिन मात्र शेयर कारोबार भएको छ ।
पाँच कारोबार दिनमा दुई दिन सार्वजनिक विदा परेकाले यो साता तीन दिन मात्र कारोबार भएको हो । तीन कारोबार दिननै यो साता बजार घटेर बन्द भएको छ । पहिलो दिन ४८ दशमलव ७३ अंक, दोस्रो दिन ३१ दशमलव ७६ अंक र तेस्रो दिन ३७ दशमलव शून्य ६ अंक गरी यो साता ११७ दशमलव ५५ अंकले नेप्से परिसूचक घटेको हो ।
समग्र धितोपत्र कारोबार मापक नेप्से परिसूचकसँगै यो साता ठूला कम्पनीहरुको कारोबार मापक सेन्सेटिभ इन्डेक्स पनि १७ दशमलव ६९ अंकले घटेको छ । गत साताको अन्तिम कारोबार दिन २ हजार ३५६ दशमलव १७ विन्दुमा रहेको नेप्से परिसूचक यो साताको अन्तिम कारोबार दिन २ हजार २३८ दशमलव ६२ विन्दुमा झरेको हो ।
साताको बजारका सूचकहरुको अवस्था :
स्रोत : नेपाल स्टक एक्सचेञ्ज (नेप्से)
त्यस्तै गत साता ४५० दशमलव २४ विन्दुमा रहेको सेन्सेटिभ इन्डेक्स यो साता ४३२ दशमलव ५५ विन्दुमा झरेको छ ।
वित्तीय प्रणालीमा तरलता संकटको समस्या निरन्तर रहिरहँदा र आगामी दिनमा ब्याजदर अझ बढ्ने त्रासका कारण पछिल्लो समय शेयर विक्री चाप बढीरहेको छ । सोही कारण नेप्से परिसूचकमा असर परेको जानकारहरु बताउँछन् । बजारमा प्यानिक सेल भइरहेको अवस्थामा लगानीकर्ताको मनोबल बढाउने खालको सूचना यतिवेला आवश्यक रहेको ब्रोकरहरु बताउँछन् । सूचनाको आधारमा चल्ने धितोपत्र दोस्रो बजारमा पछिल्लो समय सकारात्मक सूचनाहरु नआउँदा लगानीकर्ताको मनोबल बढ्न नसकेको ब्रोकरहरुको बुझाइ छ ।
साथै सामाजिक सञ्जाललगायतका माध्यमबाट बजारको वारेमा गलत हल्ला चलाउँदा उक्त हल्लाको पछि लागेर नयाँ लगानीकर्ताहरु प्यानिक सेल गरिरहेको बुझाइ ब्रोकरहरुको छ ।
यो साता तीन कारोबार दिनमा रू. ४ अर्ब ३४ करोड ७२ लाखभन्दा बढीको १ करोड २२ लाख ५५ हजार ८६७ कित्ता धितोपत्र कारोबार भएको छ ।
गत साता भने पाँच कारोबार दिनमा रू. ८ अर्ब २० करोड ५७ लाखभन्दा बढीको २ करोड २५ लाख ६६ हजार ६० कित्ता धितोपत्र खरीदविक्री भएको थियो । गत साता औषतमा रू. १ अर्ब ६४ करोडभन्दा बढीको धितोपत्र खरीदविक्री भएकोमा यो साता औषतमा रू. १ अर्ब ४४ करोड बराबरको धितोपत्र खरीदविक्री भएको हो ।
बजारका सबै महत्वपूर्ण परिसूचकहरु घट्दा कुल बजार पूँजीकरणमा पनि रू. १ खर्ब ६६ अर्ब ८७ करोड ३८ लाखको कमि आएको छ । गत साता रू. ३३ खर्ब ५१ अर्ब ६४ करोड ३३ लाख रहेको कुल बजारपूँजीकरण यो साता रू. ३१ खर्ब ८४ अर्ब ७६ करोड ९५ लाखमा झरेको हो ।
सर्वाधिक गुमाउनेमा वित्त समूहका लगानीकर्ता
यो साता वित्त समूहका लगानीकर्ताहरुले सर्वाधिक गुमाएका छन् । गत साताको तुलनामा यो साता वित्त समूहको परिसूचक सर्वाधिक ८ दशमलव ९४ अंकले घटेको हो । वित्त समूहसँगै जलविद्युत् समूहको परिसूचक पनि ८ दशमलव ३३ प्रतिशत घटेको छ ।
त्यस्तै विकास बैंकको ७ दशमलव ३३ प्रतिशत, होटल्स तथा पर्यटनको ६ दशमलव ९९ प्रतिशत, जीवन बीमाको ६ दशमलव ७६ प्रतिशत, निर्जीवन बीमाको ६ दशमलव ४९ प्रतिशत, अन्यको ५ दशमलव ८२ प्रतिशतले घटेको छ ।
त्यसैगरी व्यापारिकको ५ दशमलव ७३ प्रतिशत, लगानीको ५ दशमलव ७२ प्रतिशत, लघुवित्तको ४ दशमलव ११ प्रतिशत, उत्पादन तथा प्रशोधनको ३ दशमलव ८९ प्रतिशत, बैंकिङको २ दशमलव ८८ प्रतिशत र म्युचुअल फण्डको उपसूचक १ दशमलव ९३ प्रतिशतले घटेको छ ।
साताव्यापी समूहगत उपसूचकमा आएको परिवर्तन :
स्रोत : नेपाल स्टक एक्सचेञ्ज (नेप्से)
