उदयपुर । उदयपुरमा व्यावसायिक केराखेती बढ्दै गएको छ । जिल्ला कृषि ज्ञान केन्द्रका अनुसार अहिले जिल्लाका त्रियुगा, बेलका, कटारी र चौदण्डीगढी नगरपालिकासहित उदयपुरगढी गाउँपालिकामा केराखेती विस्तार भएको छ ।
त्रियुगा नगरपालिकाका प्रमुख बलदेव चौधरीका अनुसार अहिले यस नगरपालिकाको राजाबास, बगाहा, जोगिदह, खैजनपुर, साउने, खाँबु चुहाडे तथा श्रीपुर क्षेत्रलाई केरा जोन क्षेत्र नै घोषणा गरेर केराखेती विस्तार गरिएको हो । चौदण्डीगढी नगरपालिकाको हँडिया, सिवाइ, सुन्दरपुर, देवधार तथा बसाहा क्षेत्रलाई अहिले केरा जोनको रूपमा विकास गर्दै लगिएको नगरप्रमुख खगेन्द्रकुमार राईले पनि बताए ।
सबैभन्दा बढी केरा उत्पादन बेलका नगरपालिकाका भागलपुर, तपेस्वरी, पुरनदह, बानडाँडा क्षेत्रका साथै कटारी नगरपालिकाको त्रिवेणी, रिस्कु, सोमवारे, मरुवा, हरैया, बेलस्रोतसहित क्षेत्रहरूलाई तीन वर्षदेखि केरा जोनको रूपमा विकास गरिएको सम्बन्धित नगरपालिकाले बताएको छ । पहाडी क्षेत्रको उदयपुरगढी गाउँपालिकाको नेपालटार, दनुवारबँेसी, क्षेत्रलाई पनि चार वर्षदेखि केरा जोनको रूपमा विकास गरिएको गाउँपालिकाकी उपाध्यक्ष सानुकुमारी राउतले बताइन् ।
कृषि ज्ञान केन्द्रका प्रमुख महेश चौधरीका अनुसार २०७० सालसम्ममा त्रियुगा चौदण्डी, बेलका र कटारी नगरपालिकाका केही स्थानमा मात्र गरेर पचास हेक्टर जमिनमा मात्र केराखेती हुँदै आएकोमा २०७४ सालसम्म आइपुग्दा ९१ हेक्टर जमिनमा उत्पादन हुन थालेको थियो । २०७४ पछि भने जिल्लाका मुख्य चार नगरपालिकाहरू कटारी, त्रियुगा, बेलका, चौदण्डीगढीमा केराखेती विस्तार गर्दै केरा जोन तथा पकेट क्षेत्र समेत घोषणा गरिएको थियो । रासस