काठमाडौं । नेपाल कृषि सहकारी केन्द्रीय संघ तथा सानिमा रिलायन्स लाईफ इन्स्योरेन्सबीच बीमासम्बन्धी सम्झौता भएको छ ।
सम्झौताअनुसार संघका सदस्यता प्राप्त कृषि तथा साना किसान कृषि सहकारी संस्थामा आबद्ध विपन्न तथा साना किसानलाई म्यादी जीवन बीमा सेवा प्रदान गरिनेछ ।
म्यादी बीमा एक प्रकारको लागत प्रभावी जीवन बीमा योजना हो । यस योजनाअन्तर्गत बीमितको मृत्यु भएमा बीमांक बराबर रकम प्रदान गरिने बताइएको छ ।
विविध कार्यक्रममार्फत आफ्ना सदस्य संस्थालाई कृषि उत्पादन तथा उत्पादकत्वमा वृद्धि गर्न, व्यावसायिक योजना तथा रणनीतिक योजना बनाउन सहयोग पुर्याइ गैरवित्तीय सेवा उपलब्ध गराउँदै आएको संघको भनाइ छ ।
हाल यस संघबाट ७७ ओटै जिल्लाका १ हजार २०० सयभन्दा बढी संस्थामा आबद्ध १२ लाखभन्दा बढी साना किसान परिवारले सेवा पाइरहेको बताइएको छ ।