पुस २०, काठमाडौं । साताको तेस्रो कारोबार दिन मंगलवार नेप्से परिसूचक अघिल्लो कारोबार दिनको तुलनामा ६३ दशमलव शून्य १ अंक अर्थात् २ दशमलव ४१ प्रतिशतले वृद्धि भएको छ ।
यो दिन नेप्से परिसूचक २ हजार ६७९ दशमलव ९५ विन्दुमा पुगेको हो । यो दिन कारोबारमा आएका २३४ ओटा धितोपत्रको ९१ लाख १० हजार ७५८ कित्ता शेयर ५५ हजार ३७८ पटकमा रू. ४ अर्ब ३२ करोड २ लाख ६९ हजार ८२७ मा खरीदविक्री भएको छ ।
कारोबारमा आएका २३४ ओटा धितोपत्रमध्ये तीन ओटा कम्पनीको शेयरमूल्यमा सकारात्मक सर्किट लागेको छ । यो दिन श्री इन्भेष्टमेण्ट एण्ड फाइनान्स र सप्तकोशी डेभलपमेण्ट बैंकको शेयरमूल्य अघिल्लो कारोबार दिनको तुलनामा १० प्रतिशतका दरले वृद्धि भएसँगै सकारात्मक सर्किट लागेको छ ।
त्यसैगरी मध्य भोटेकोशी जलविद्युत् कम्पनीको शेयर मूल्य अघिल्लो कारोबार दिनको तुलनामा यो दिन ९ दशमलव ९९ प्रतिशतका दरले वृद्धि भएसँगै सकारात्मक सर्किट लागेको छ । श्री इन्भेष्टमेण्ट एण्ड फाइनान्सको शेयरमूल्य प्रतिकित्ता रू. ४८२ दशमलव ९०, सप्तकोशीको रू. ३५८ दशमलव ६० र मध्य भोटेकोशी जलविद्युत् कम्पनीको रू.१९४ दशमलव ८० पुगेको हो ।
त्यसैगरी मंगलवार कृषि विकास बैंकको डिबेञ्चरको मूल्य अघिल्लो कारोबार दिनको तुलनामा १ दशमलव ९६ प्रतिशत घटेर रू. १ हजार ५० कायम भएको छ । यस्तै यो दिन सर्वाधिक शेयर खरीदविक्री भने नेपाल बङ्गलादेश बैंकको भएको हो । उक्त कम्पनीको रू. १४ करोड ७७ लाख ५४ हजार बरावरको शेयर खरीदविक्री भएको छ । कम्पनीको शेयरमूल्य प्रतिकित्ता रू.४०५ दशमलव ४० कायम भएको हो ।
उक्त कम्पनीलाई नबिल बैंकले प्राप्ति गर्ने भएसँगै सर्वाधिक शेयर खरीदविक्री भएको हो । कारोबारमा आएका १३ ओटा समूहमध्ये उत्पादन तथा प्रशोधन समूहको शून्य दशमलव ५९ प्रतिशत र अन्य समूहको परिसूचक शून्य दशमलव ३४ प्रतिशतले घटेको छ भने बाँकी सबै समूहको परिसूचक बढेको छ ।
मंगलवार सबैभन्दा बढी विकास बैंक समूहको परिसूचक ५ दशमलव २३ प्रतिशतले बढेको छ । सोही कारण उक्त समूहका लगानीकर्ताले सर्वाधिक कमाएका छन् । योदिन अघिकांश विकास बैंक समूहका कम्पनीहरुको शेयरमूल्य वृद्धि भएको छ ।
त्यसैगरी बैंकिङ समूहको परिसूचक ३ दशमलव ६१ प्रतिशत,व्यापार समूहको १ दशमलव ९८ प्रतिशत,होटल एण्ड टुरिजम समूहको २ दशमलव शून्य ७ प्रतिशत,हाइड्रोपावर समूहको ३ दशमलव ११ प्रतिशतले वृद्धि भएको छ ।
त्यस्तै वित्त समूहको ३ दशमलव ७१ प्रतिशत,निर्जीवन बीमा समूहको शून्य दशमलव ३४ प्रतिशत,लघुवित्त समूहको १ दशमलव ७७ प्रतिशत,जीवन बीमा समूहको १ दशमलव १ प्रतिशत,म्युचुअल फण्ड समूहको १ दशमलव ७१ प्रतिशत र लगानी समूहको परिसूचक ३ दशमलव १४ प्रतिशतका दरले वृद्धि भएको छ ।
पछिल्लो दिनहरुमा बजार सकरात्मक बन्दै गएको देखिन्छ । नेपाल राष्ट्र बैंकले आयातमा कडाई र तरलता सहज हुने कार्यहरु गरिहेको छ । सोही कारण पनि शेयर बजार सकारात्मक लयमा अगाडि बढेको हो ।
नेप्से परिसूचक निरन्तर चौथो कारोबार दिन पनि उकालो लागेको छ। योदिनको कारोबारसहित चार कारोबार दिनमा नेप्से परिसूचक १६० दशमलव ९६ अंक ले बढ्नुलाई कतिपय बजार विश्लेषकहरुले अब बजारले लय समातेको बताएका छन् ।
