काठमाडौं । शुभम पावर लिमिटेडले माघ १८ गतेदेखि सर्वसाधारणका लागि आईपीओ निष्कासन गर्ने भएको छ ।
सर्वसाधारणभन्दा अघि कम्पनीले आयोजना प्रभावित क्षेत्रका बासिन्दा र वैदेशिक रोजगारीमा रहेका नेपालीमा आईपीओ बाँडफाँट गरिसकेको छ ।
आयोजना प्रभावित स्थानीयमा वितरण हुन नसकेको १ लाख ८० हजार ५८० कित्ता शेयरसमेत सर्वसाधारणमा थप गरी विक्री गर्न लागिएको छ । स्थानीयमा वितरण हुन नसकेको शेयरसमेत थप हुँदा सर्वसाधारणको भागमा कुल ५ लाख ८० हजार ५८० कित्ता शेयर परेको छ । कुल कित्ता शेयरमध्ये १० प्रतिशत वैदेशिक रोजगारीमा गएका नेपाली कामदारमा र ५ प्रतिशत सामूहिक लगानी कोषहरूमा बाँडफाँट गरिएको छ ।
वैदेशिक रोजगारीमा गएका नेपालीमा ५८ हजार ५८ कित्ता र सामूहिक लगानी कोषमा २९ हजार ३० कित्ता शेयर वितरण गरिएको हो । अब ११ हजार ६१० कित्ता कर्मचारीहरूका लागि सुरक्षित गरी बाँकी ४ लाख ८१ हजार ८२२ कित्ता शेयर सार्वजनिक निष्कासनमार्फत विक्री हुनेछ ।
कम्पनीको आईपीओमा आवेदन गर्ने अवधि माघ २२ गतेसम्म तोकिएको छ । उक्त अवधिमा मागबमोजिम आवेदन नपरेमा फागुन ३ गतेसम्मका लागि विक्री अवधि लम्बिने बताइएको छ ।
सर्वसाधरणका लागि आईपीओ विक्री खुला गर्दा पहिलो दिनमै मागभन्दा बढी आवेदन पर्ने गरेकाले यो आईपीओ छिटो अवधि माघ २२ गतेसम्म मात्र विक्रीमा रहने सम्भावना धेरै छ । लगानीकर्ताले न्यूनतम १० देखि अधिकतम ५ हजार कित्तासम्म खरीद माग गर्दै आवेदन दिन सक्नेछन् ।
आईपीओ विक्री प्रबन्धकको जिम्मेवारी मुक्तिनाथ क्यापिटल लिमिटेडले पाएको छ । विक्री प्रबन्धकसँगै सम्पूर्ण सी–आस्बा सदस्य बैंक तथा वित्तीय संस्था र तिनका शाखा कार्यालयहरूबाट आवेदन दिन सकिनेछ । साथै मेरो शेयर सफ्टवेयर र एपमार्फत पनि आवेदन दिन सकिनेछ ।
आईपीओ निष्कासनका लागि गराएको रेटिङमा केयर रेटिङ नेपालले वित्तीय दायित्व वहन गर्ने क्षमतामा औसत जोखिम रहेको संकेत गर्ने केयर एनपी डबल बी प्लस इस्युअर रेटिङ प्रदान गरेको छ ।
केयर रेटिङ नेपालले केयर एनपी ट्रिपल ए इस्युअरदेखि केयर एनपी डी इस्युअरसम्मको रेटिङ प्रदान गर्ने गर्दछ ।
जसमा ग्रेड केयर एनपी ट्रिपल ए इस्युअर रेटिङले बलियो आधारको संकेत गर्दछ भने ग्रेड केयर एनपी डी इस्युअर रेटिङले कमजोर आधारको संकेत गर्दछ ।
कम्पनीको परिचय
यो कम्पनी २०६१ साल असार २६ गते प्राइभेट लिमिटेड कम्पनीको रूपमा कम्पनी रजिष्ट्रारको कार्यालयमा दर्ता भएको थियो । आयोजना प्रभावित स्थानीय र सर्वसाधारणलाई समेत समट्ने उद्देश्यले २०७२ साल पुस १४ गतेदेखि पब्लिक लिमिटेड कम्पनीमा परिणत भई सञ्चालनमा रहेको छ । कम्पनीको रजिष्टर्ड कार्यालय कमलादी, काठमाडौंमा रहेको छ भने जलविद्युत् उत्पादन केन्द्र संखुवासभा जिल्लाको चैनपुरमा रहेको छ ।
कम्पनीमा ४० जना संस्थापकहरूको लगानी रहेको छ । कम्पनीका संस्थापकहरू विद्युत्, बैंक तथा वित्तीय क्षेत्र, स्वास्थ्य, शैक्षिक क्षेत्र एवं व्यापार व्यवसायको साथै व्यवस्थापन क्षेत्रमा लामो समयदेखि दख्खल भएका प्रतिष्ठित व्यक्तिहरू रहेका छन् ।
यस कम्पनीले संखुवासभा जिल्लाको चैनपुर नगरपालिका–९ स्थित पिलुवा खोला साना जलविद्युत् आयोजनाबाट ९९० किलोवाट क्षमताको जलविद्युत् आयोजना निर्माण गरेको छ । यो आयोजना निर्माण सम्पन्न भई २०६८ साल साउन १ गतेबाट व्यापारिक उत्पादन हुँदै आएको छ । यस आयोजनाको कुल लागत १४ करोड ३९ लाख ९० हजार रूपैयाँ रहेको छ भने प्रतिमेगावाट लागत १४ करोड ५४ लाख ४५ हजार रूपैयाँ रहेको छ ।
पूँजी संरचना
२० करोड रूपैयाँ अधिकृत पूँजी रहेको कम्पनीको जारी पूँजी पनि २० करोड रूपैयाँ नै रहेको छ । हाल कम्पनीमा संस्थापकतर्फबाट चुक्ता भएको पूँजी १४ करोड कायम रहेको छ । संस्थापकतर्फ कुल जारी पूँजीको ७० प्रतिशत शेयर स्वामित्व कायम रहेको छ ।
सर्वसाधारण शेयरधनीतर्फ आयोजना प्रभावित स्थानीयमा शून्य दशमलव ९७ प्रतिशत र कर्मचारीसमेत सर्वसाधारणमा २९ दशमलव शून्य ३ प्रतिशत शेयर वितरण हुनेछ । कम्पनीले सर्वसाधारणमा बाँकी शेयर जारीपछि चुक्तापूँजी २० करोड रूपैयाँ कायम हुनेछ ।
आईपीओ निष्कासनमार्फत प्राप्त हुने रकम कम्पनीले आयोजना निर्माणका लागि लिएको दीर्घकालीन कर्जा भुक्तानीको लागि प्रयोग गर्ने बताएको छ ।
वित्तीय अवस्था
२०६८ साल साउन १ गतेदेखि व्यापारिक उत्पादन शुरू गरेको कम्पनी अझै सञ्चित नोक्सानीमा रहेको छ । आर्थिक वर्ष ०७८/७९ सम्मको वास्तविक वित्तीय विवरणअनुसार कम्पनी १ करोड ८० लाखभन्दा बढी सञ्चित नोक्सानीमा रहेको छ । वास्तविक वित्तीय विवरणअनुसार कम्पनीको प्रतिशेयर नेटवर्थ ८८ रूपैयाँ ४८ पैसा छ । चालू आर्थिक वर्ष ०७९/८० मा भने कम्पनीले सञ्चित नोक्सानी घटाएर ९१ लाख रूपैयाँमा झार्ने प्रक्षेपण गरेको छ । आर्थिक वर्ष ०८०/८१ मा भने कम्पनीले २९ लाख ९३ हजार रूपैयाँ सञ्चित नाफा गर्ने प्रक्षेपण गरेको छ ।
सञ्चालक समिति
सात सदस्यीय सञ्चालक समिति रहने व्यवस्था कम्पनीको नियमावलीमा रहे पनि हाल कम्पनीमा चार सदस्यीय सञ्चालक समिति रहेको छ ।
अध्यक्षमा मित्रलाल श्रेष्ठ रहेका छन् । सिभिल बैंकमा चार वर्ष सञ्चालक भई काम गरेका श्रेष्ठसँग वैदेशिक संस्था सीबीएममा तीन वर्ष, डीएफआईडीमा १३ वर्ष र जाइकामा चार वर्ष काम गरेको अनुभव छ । कम्पनीको सञ्चालकमा सुभाष अमात्य, दिनेश गुरुङ्ग र मन्जु सिंह रहेका छन् ।
पहिलो कारोबारका लागि कति पाउला मूल्य रेञ्ज ?
प्राथमिक बजारमा विक्री भएको शेयर कारोबारका लागि धितोपत्र दोस्रो बजारमा सूचीकृत हुनुपर्दछ । धितोपत्र दोस्रो बजार सञ्चालन नेपाल स्टक एक्सचेन्ज (नेप्से) ले कम्पनीको शेयर सूचीकृत भएपछि पहिलो कारोबारका लागि मूल्य तोक्ने गर्दछ ।
नेप्सेले कुनै पनि कम्पनीको वास्तविक प्रतिशेयर नेटवर्थदेखि त्यसको तीन गुणासम्मको मूल्य रेञ्ज पहिलो कारोबारका लागि तोक्ने व्यवस्था छ । यसर्थ यस कम्पनीको वास्तविक प्रतिशेयर नेटवर्थको आधारमा प्रतिकित्ता न्यूनतम ८८ रूपैयाँ ४८ पैसादेखि अधिकतम २६५ रूपैयाँ ४४ पैसासम्मको मूल्य रेञ्ज नेप्सेले पहिलो कारोबारका लागि तोक्न सक्ने देखिन्छ ।
