राष्ट्रपतिले नागरिकता विधेयक फिर्ता गरेकी छिन् । संघीय संसदको दुवै सदनबाट पारित भएपछि प्रतिनिधिसभाका सभामुख अग्नि सापकोटाले उक्त विधेयक राष्ट्रपति विद्यादेवी भण्डारीसमक्ष प्रमाणीकरणका लागि पठाएका थिए । तर राष्ट्रपति भण्डारीले यस विषयमा संघीय संसदबाट पुनर्विचार हुन आवश्यक देखिएकोले विधेयक फिर्ता गरिएको राष्ट्रपति कार्यालयले जारि गरेको विज्ञप्तिमा उल्लेख छ । विज्ञप्तिमा भनिएको छ 'सम्माननीय राष्ट्रपति श्रीमती विद्यादेवी भण्डारीज्यूसमक्ष प्रतिनिधि सभाका सम्माननीय सभामुखज्यूबाट प्रमाणित भई नेपालको संविधानको धारा ११३ को उपधारा (२) बमोजिम प्रमाणीकरणका लागि पेश हुन आएको नेपाल नागरिकता ऐन, २०६३ लाई संशोधन गर्न बनेको विधेयकमा नेपालको संविधान बमोजिम नागरिकता प्राप्ति सम्बन्धी विषयमा संघीय संसदबाट पुनर्विचार हुन आवश्यक देखिएकोले नेपालको संविधानको धारा ११३ को उपधारा (३) बमोजिम सन्देश सहित यो विधेयक सम्माननीय राष्ट्रपतिज्यूले प्रतिनिधि सभामा फिर्ता पठाउनु भएको छ ।'राष्ट्रपतिले विधेयक फिर्ता गरेसंगे अब सो विधेयक पुन: प्रतिनिधिसभामा आउने छ। प्रतिनिधिसभा नियमावली २०७५ को दफा १३६ मा यस समबन्धि ब्यबस्था छ । उक्त दफामा भनिएको छ ' संविधानको धारा ११३ को उपधारा (३) बमोजिम राष्ट्रपतिबाट पुनर्विचारको लागि सन्देश सहित विधेयक फिर्ता भएमा अधिवशेन चालु रहेको भए महासचिव वा निजको अनुपस्थितिमा सचिवले सभालाई जानकारी दिनेछ र अधिवेशन चालु नरहेको भए सभाको सूचनापत्रमा प्रकाशित गर्नेछ । ' अहिले संसदको अधिवेशन चालु रहेकोले महासचिव वा निजको अनुपस्थितिमा सचिवले प्रतिनिधि सभालाई जानकारी दिने छ । प्राप्त हनु आएको विधेयक सम्बन्धी जानकारी सभालाई दिएपछि त्यस्तो विधेयक प्रस्तुतकर्ता सदस्यले विधेयकमाथि सदनमा पुनर्विचार गरियोस्, वा पुनर्विचारको लागि विधेयकलाई सम्बन्धित समितिमा पठाइयोस् भन्ने प्रस्ताव पेश गर्नेछ । त्यसपछि अन्य विधेयक सरह नै यो विधेयक अगाडी बढ्ने छ । यद्यपि प्रतिनिधिसभा र राष्ट्रिय सभाले विधेयकमा केहि पनि परिमार्जन नगरी हुबहु नै उक्त विधेयक पारित गर्न पनि सक्नेछ । हुबहु पारित गरेपनि वा संशोधन सहित पारित गरेपनि राष्ट्रपति समक्ष प्रमाणीकरणको लागि पठाउनु पर्ने छ । दोस्रो पटक राष्ट्रपति समक्ष विधेयक प्रमाणिकरणको लागि पठाउँदा राष्टपतिले विधेयक १५ दिन भित्र प्रमाणीकरण गर्नै पर्छ । दोस्रो पटक विधेयक प्रमाणिकरणको लागि आउँदा विधेयक फिर्ता गर्ने अधिकार राष्ट्रपतिलाई छैन । संविधानको धारा ११३ को उपधारा ४ मा यस बारे उल्लेख छ । उपधारा ४ मा भनिएको छ 'राष्ट्रपतिले कुनै विधेयक सन्देश सहित फिर्ता गरेमा त्यस्तो विधेयकमाथि दुवै सदनले पुनर्विचार गरी त्यस्तो विधेयक प्रस्तुत रूपमा वा संशोधन सहित पारित गरी पुनः पेश गरेमा त्यसरी पेश भएको पन्ध्र दिनभित्र राष्ट्रपतिले प्रमाणीकरण गर्नेछ ।'