वैशाख २२, महेन्द्रनगर । भारतसँग जोडिएको कञ्चनपुरको पश्चिमी सीमा नाका गड्डाचौकीमा अस्थायी होल्डिङ सेन्टर निर्माण गरिने भएको छ ।
भारतबाट फर्किने नेपालीलाई कोरोना संक्रमण परीक्षण अवधिसम्म राख्नका लागि नाकामा होल्डीङ सेन्टर निर्माण गर्न लागिएको हो ।भीमदत्त नगरपालिकाले नेपाली सेना लगायत अन्य साझेदार संस्थाहरुसँगको सहकार्यमा नाकामा होल्डीङ सेन्टर निर्माण गरिएको हो ।
सीमामा स्थायी होल्डिङ सेन्टर बनाउने सरकारको निणर्य भएपछि त्यसका लागि आवश्यक बजेट नपठाउँदा नगरपालिकाले आफ्नै स्रोत साधनबाट अस्थायी होल्डीङ सेन्टर निर्माण गर्न लागेको हो । सेन्टर बनाउन प्रदेश सरकारले प्रतिवद्धता जनाएका पनि निर्माण कार्यमा चाँसो नदिएका कारण भीमदत्त नगरपालिकाले निर्माण कार्य थालेको हो ।
होल्डिङ सेन्टर निर्माणमा निड्स नेपाल र नेपाली सेनाले मद्दत गरिरहेका छन् । होल्डीङ सेन्टर निर्माणको जिम्मेवारी पाएका निड्स नेपालका कार्यकारी निर्देशक भवराज रेग्मीले सेन्टर निर्माण कार्य अगाडी बढी सकेको बताए । उनका अनुसार सेन्टर निर्माणका लागि बाँस र त्रिपालको व्यवस्था भइरहेको छ ।
‘नगरपालिकाबाटै तत्काल होल्डिङ सेन्टर निर्माणका लागि निर्देशन भएको छ ।’ कार्यकारी निर्देश रेग्मीले भने ‘आजसम्ममा बाँस आईपुग्छ बिहीवारबाट नेपाली सेनाले होल्टीङ सेन्टर निर्माण कार्य शुरु गर्छन् ।’ उनका अनुसार नाकामा एक हजार जना अटाउन सक्ने क्षमताको महिला र पुरुषका लागि छुट्टाछुट्टै होल्डिङ सेन्टर तयार गरिने छ ।
होल्डिङ सेन्टरमा भीमदत्त नगरपालिकाले सेन्टरको लागि चाहिने आवश्यक बाँस लगायतका सामाग्री जुटाउन आर्थिक सहयोग गर्नेछ भने नेपाली सेनाले सेन्टर निर्माणसँगै त्यसलाई सञ्चालनको जिम्मा लिनेछ । साथै निड्स नेपालले त्रिपालको व्यवस्थापन गरिरहेको छ ।
नगर प्रमुख सुरेन्द्र विष्टले नाका तत्काल होल्डिङ सेन्टर निर्माणका लागि निर्देशन गरिएको बताए । उनका अनुसार संक्रमणको दर बढ्दै जाँदा नाकामा आउने नेपालीको संख्या बढी रहेकोले जतिसक्दो चाँडो होल्डीङ सेन्टर निर्माण गर्ने पक्षमा नगरपालिका रहेको बताए ।
‘सरकारले स्थायी रुपमा भारत सँग जोडिएका सिमा क्षेत्रहरुमा होल्डिङ सेन्टर बनाउने भनेर निर्णय गरेको थियो, निर्णय गरेको भएपनि बजेट व्यवस्थापनको कुरामा ढिलाइ भयो’, भीमदत्त नगरपालिकाका नगर प्रमुख सुरेन्द्र विष्टले भने, ‘स्थायी रुपमा सरकारले होल्डिङ सेन्टर बनाउने निर्णय गरेको भएपनि नगरपालिकाले नेपाली सेना, निड्स नेपालसँग साझेदारी गरेर अस्थायी रुपमा भएपनि होल्डिङ सेन्टर निमार्ण गर्न लागेको हो, केही दिनमा नेपाली सेनाले अस्थायी रुपमा निमार्ण गर्नेछ ।’
सरकारीले स्थायी रुपमा बनाउने भनेपनि नगरपालिकाले स्वदेश फर्कने नेपाली नागरिकको सहजताका लागि केही दिनको लागि भएपनि अस्थायी रुपमा होल्डिङ सेन्टर निमार्ण गर्न लागेको नगर प्रमुख विष्टको भनाइ छ ।
