काठमाडौं । साताको तेस्रो कारोबार दिन मंगलवार नेप्से परिसूचकसँगै कारोबार रकम पनि घटेको छ ।
यस दिन परिसूचक १ दशमलव ६४ प्रतिशत घटेर २ हजार १६४ दशमलव ३१ विन्दुमा झरेको छ । कारोबार खुलेपछि उकालो लागेको नेप्से २ हजार २०६ विन्दुमाथि उक्लिएको थियो । त्यसपछि घट्न थालेको नेप्सेमा उतारचढाव देखिएको थियो । सोमवार रू. ४ अर्ब ७३ करोड बराबरको शेयर कारोबार भएकोमा मंगलवार २ अर्ब ९१ करोडमा झरेको छ ।
आइतवार मौद्रिक नीतिमार्फत शेयर धितो कर्जाको विद्यमान जोखिम भारसम्बन्धी व्यवस्था पुनरवलोकन गर्ने समाचार आएसँगै उच्च गतिमा बढेको बजार सोमवारदेखि घट्न थालेको हो ।
आइतवार बजार बन्द भएपछि भएको पत्रकार सम्मेलनमा गर्भनर महाप्रसाद अधिकारीले ५० लाख रुपैयाँसम्मको शेयर धितो कर्जामा मात्र शत प्रतिशत जोखिम भार रहने व्यवस्था परिमार्जन गरिएको जानकारी दिएपछि सोमवारदेखि बजारमा विक्रेता हाबी भएका हुन् ।
शेयर धितो कर्जामा रकमको सीमा नतोकी सबैमा शत प्रतिशत जोखिम भार रहनुपर्ने आम लगानीकर्ताको माग छ ।
मंगलवार सेन्सेटिभ फ्लोट इन्डेक्स १ दशमलव ८१ प्रतिशत, फ्लोट इन्डेक्स १ दशमलव ८४ प्रतिशत र सेन्सेटिभ फ्लोट इन्डेक्स २ दशमलव १३ प्रतिशत घटेको छ ।
यस दिन कारोबारमा आएका २६७ धितोपत्रको ७७ लाख १६ हजार २७७ कित्ता शेयर ५३ हजार ५७० पटकमा रू. २ अर्ब ९१ करोड बराबरको कारोबार भएको छ । कारोबारमा आएका धितोपत्रमध्ये किसान लघुवित्त वित्तीय संस्थाको शेयर मूल्यमा सकारात्मक सर्किट लागेको छ । यससँगै कम्पनीको शेयर मूल्य प्रतिकित्ता रू. ९५८ दशमलव ३० पुगेको छ । शेयर मूल्य सर्वाधिक बढ्ने कम्पनीको सूचीमा दोस्रोमा सिटी होटल लिमिटेड छ । कम्पनीको शेयर मूल्य ७ दशमलव ७४ प्रतिशत बढेर रू. ७४३ दशमलव ४० पुगेको छ ।
मंगलवार सबैभन्दा बढी नबिल डिबेञ्चर २०८५ नामक ऋणपत्रको मूल्य ६ दशमलव ८७ प्रतिशत घटेको छ । डिबेञ्चर मूल्य प्रतिकित्ता रू. ७८५ मा झरेको छ । त्यस्तै दोस्रोमा बिपिडब्लु लघुवित्त वित्तीय संस्थाको शेयर मूल्य ५ दशमलव २३ प्रतिशत घटेर रू. १ हजार ३५६ मा झरेको छ ।
यस दिन सर्वाधिक शेयर खरीदविक्रीको हिस्सा सोल्टी होटलले ओगटेको छ । कम्पनीको रू. १५ करोड २७ लाख बराबरको शेयर कारोबार भएको छ । यस कम्पनीको शेयर मूल्य प्रतिकित्ता रू. ४७३ कायम भएको छ ।
सर्वाधिक शेयर खरीदविक्री हुने कम्पनीको सूचीमा दोस्रोमा शिवम् सिमेन्ट्स छ । कम्पनीको रू. १० करोड ३९ लाख बराबरको शेयर खरीदविक्री भएको हो ।
यस दिन कारोबारमा आएका १३ समूहगत परिसूचकमध्ये होटल तथा पर्यटन समूहको परिसूचक १ दशमलव २२ प्रतिशत वृद्धि भएको छ भने बाँकी सबै समूहको परिसूचक घटेको छ । समूहगत परिसूचक घट्नेमा सबैभन्दा बढी बैंकिङ्ग समूह छ । उक्त समूहको परिसूचक २ दशमलव ७५ प्रतिशत घटेको छ ।
