वीरगञ्ज (अस) । वीरगञ्ज भन्सारले वीरगञ्ज महागनरपालिकालाई १०० ओटा सिलिण्डर पठाएको छ । सिलिण्डरको अभावमा कोरोना संक्रमितको उपचारमा समस्या भएपछि भन्सारले शनिवार महानगरलाई सिलिण्डिर पठाएको हो ।
विगत ४/५ वर्षदेखि जाँचपास नभएर भन्सारको गोदाममा थन्किएका सिलिण्डर अहिलेको आपत्कालीन अवस्थामा प्रयोग गर्न महानगरलाई पठाइएको वीरगञ्ज भन्सारका प्रमुख भन्सार अधिकृत हरिहर पौडेलले जानकारी दिए । वीरगञ्ज महानगरले भन्सारको गोदाममा थन्किएका सिलिण्डिर पठाएर संक्रमितको उपचारमा सहयोग गरिदिन भन्सारलाई आग्रह गरेको थियो ।
लामो समयदेखि गोदाममा राखिएका सिलिण्डिरको गुणस्तर परीक्षण गरी प्रयोग गर्न भन्सारले महानगरलाई पत्राचार गरेको छ । कोरोना महामारी नियन्त्रणमा आएपछि फिर्ता गर्नेगरी महानगरले सिलिण्डर प्राप्त गरेको हो ।
कोरोना संक्रमित बढेपछि अक्सिजनको खपत ह्वात्तै बढेको छ । स्थानीय उद्योगले अक्सिजन उत्पादन गरे पनि सिलिण्डरको अभावले भर्न पाएका छैनन् । बारा पर्साका तीनओटा अक्सिजन उद्योगले दैनिक १५ सय सिलिण्डर अक्सिजन उत्पादन गर्न सक्दछन् ।
