वैशाख १०, काठमाडौं । वैशाख महीनाको पहिलो साताको कारोबारमा धितोपत्र दोस्रो बजारको पूँजीकरण रू. १ खर्ब १८ अर्ब १८ करोड १९ लाखले घटेको छ ।
गत साताको अन्तिम कारोबार दिन रू. ३४ खर्ब २६ अर्ब १० करोड ८८ लाख रहेको कुल बजार पूँजीकरण यो साताको अन्तिम कारोबार दिन रू. ३३ खर्ब ७ अर्ब ९२ करोड ६५ लाख कायम भएको हो ।
यो साता समग्र धितोपत्र कारोबार मापक नेप्से परिसूचक गत साताभन्दा ८९ दशमलव ७९ अंक तल झरेको छ । नेप्से परिसूचक घटेसँगै कम्पनीहरुको धितोपत्र मूल्यमा कमि आउँदा कुल बजार पूँजीकरण घट्न पुगेको हो ।
गत साताको अन्तिम कारोबार दिन २ हजार ४१५ दशमलव २४ विन्दुमा रहेको नेप्से परिसूचक यो साता २ हजार ३२५ दशमलव ४५ विन्दुमा झरेको हो । गत साता दुई दिन सार्वजनिक विदा परेकाले तीन दिन मात्र बजार सञ्चालन भएको थियो । यो साता भने पाँच दिननै बजार खुला भएको थियो ।
यो साता पाँच कारोबार दिनमा दुई दिन नेप्से परिसूचक बढेको छ भने तीन दिन घटेको छ । साताको पहिलो कारोबार दिन २९ दशमलव ६० अंकले र दोस्रो दिन ४१ दशमलव ७७ अंकले घटेको नेप्से तेस्रो दिन १३ दशमलव ३७ अंकले बढेको थियो । चौथो दिन ३६ दशमलव ७३ अंकले पुनः घटेको नेप्से अन्तिम कारोबार दिन ४ दशमलव ९४ अंकले घटेर बन्द भएको हो ।
यो साता ठूला कम्पनीहरुको मात्र कारोबार मापक सेन्सेटिभ इन्डेक्स १२ दशमलव ९५ अंक तल झरेको छ । गत साता ४५६ दशमलव शून्य ९ विन्दुमा रहेको नेप्से परिसूचक यो साता ४४३ दशमलव १४ विन्दुमा झरेको हो ।
वित्तीय प्रणालीमा तरलता अभावको असर केहि समयदेखि धितोपत्र दोस्रो बजारमा परिरहेको छ । लगानीकर्ताहरु तरलता सहज होला भन्ने पखाईमै रहेको देखिन्छ । साथै दोस्रो बजार लगानीकर्ताको मनोबलको आधारमा सञ्चालन हुने प्रबृति देखिदै आएकाले पछिल्लो समय लगानीकर्ताको मनोबल बढ्ने खालका नीति तथा कार्यक्रम नआएकाले पनि प्रभावित बन्दै गएको अनुमान जानकारहरुको छ ।
यद्यपी बजार यतिबेला निकै न्यून विन्दुमा आएको र सूचीकृत कम्पनीहरुको धितोपत्रको मूल्य पनि निकै सस्तिएकाले आगामी दिनमा सस्तो मूल्यमा शेयर किन्न लगानीकर्ताहरु सक्रिय हुने सम्भावनालाई पनि जानकारहरुले औल्याएका छन् ।
यो साता गत साताको भन्दा कारोबार दिन बढी भएकाले पनि कारोबार रकम र कित्ता बढेको छ । गत साता तीन कारोबार दिनमा रू. ५ अर्ब २६ करोड १४ लाखभन्दा बढीको १ करोड २२ लाख ७७ हजार ५०१ कित्ता धितोपत्र कारोबार भएकोमा यो साता रू. ७ अर्ब ३८ करोड ६१ लाख ८८ हजार बराबरको १ करोड ८० लाख ५७ हजार ८३४ कित्ता धितोपत्र खरीदविक्री भएको छ ।
यो साता कारोबारमा आएका सबै समूहगत उपसूचकहरु घटेका छन् । गत साताको तुलनामा यो साता वित्त समूहको उपसूचक सर्वाधिक ९ दशमलव ५३ प्रतिशत घटेको हो ।
गत साता १ हजार ८४७ दशमलव १५ विन्दुमा रहेको वित्त समूहको उपसूचक यो साता १ हजार ६७१ दशमलव शून्य ४ विन्दुमा झरेको हो ।
त्यस्तै यो साता जलविद्युत् समूहको उपसूचक ६ दशमलव ३५ प्रतिशत, निर्जीवन बीमाको ५ दशमलव ८६ प्रतिशत, अन्य समूहको ४ दशमलव ६१ प्रतिशत, लगानी समूहको ४ दशमलव ३८ प्रतिशत, विकास बैंक समूहको ४ दशमलव १५ प्रतिशत, जीवन बीमा समूहको ४ दशमलव १० प्रतिशत, उत्पादन तथा प्रशोधनको ३ दशमलव ९७ प्रतिशतले घटेको छ ।
त्यस्तै होटल्स तथा पर्यटन समूहको ३ दशमलव ८२ प्रतिशत, लघुवित्त समूहको २ दशमलव ३७ प्रतिशत, व्यापारिक समूहको २ दशमलव ३२ प्रतिशत, बैंकिङ समूहको २ दशमलव २१ प्रतिशत र म्युचअल फण्ड समूहको सबैभन्दा कम १ दशमलव ३२ प्रतिशत उपसूचक घटेको छ ।
